កណ្តាល – នៅក្នុងពិធីអបអរសាទរខេត្តកណ្តាលទទួលបានជ័យលាភីជាខេត្តបញ្ចប់ការបន្ទោបង់ពាសវាលពាសកាល (ODF) ថ្ងៃទី២២ ខែធ្នូ ឆ្នាំ២០២២ ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ មានប្រសាសន៍ថា វិស័យផ្គត់ផ្គង់ទឹកស្អាត និងអនាម័យជនបទ គឺជាតម្រូវការចាំបាច់សម្រាប់ប្រជាពលរដ្ឋកម្ពុជា ហើយវិស័យនេះជាអាទិភាពមួយក្នុងចំណោមវិស័យជាអាទិភាពផ្សេងៗទៀតរបស់រាជរដ្ឋាភិបាលកម្ពុជា ។ ក្រសួងអភិវឌ្ឍន៍ជនបទកំពុងបន្តពន្លឿនសកម្មភាពលើកកម្ពស់ការប្រើប្រាស់ទឹកស្អាត និងបង្គន់អនាម័យជនបទ ស្របតាមគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យជនបទ ឆ្នាំ២០២៥ ។

ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ៖

“ការអភិវឌ្ឍជនបទជាសកម្មភាពចម្រុះប្រទាក់ក្រឡាគ្នា និងអន្តរវិស័យ ដើម្បីកែប្រែតំបន់ទីជនបទ រួមទាំងស្ថានភាពសេដ្ឋកិច្ច សង្គមរបស់ពលរដ្ឋនៅទីជនបទឱ្យមានភាពប្រសើរឡើង”

របាយការណ៍ជាតិស្តីពីលទ្ធផលចុងក្រោយនៃជំរឿនទូទៅប្រជាជនកម្ពុជាឆ្នាំ២០១៩ របស់វិទ្យាស្ថានជាតិស្ថិតិក្រសួងផែនការ ឆ្នាំ២០២០ បានឱ្យដឹងថា ប្រមាណ ៧៣% នៃគ្រួសារកម្ពុជាមានប្រភពទឹកស្អាតសម្រាប់ប្រើប្រាស់នៅឆ្នាំ២០១៩ នៅតំបន់ទីប្រជុំជន គ្រួសារដែលមានប្រភពទឹកស្អាតសម្រាប់ទទួលទានមាន ៨៤% ។ ក្នុងនោះប្រមាណ ៧៣,២% នៃគ្រួសារនៅទីប្រជុំជនមានប្រភពផ្គត់ផ្គង់ទឹកស្អាតសម្រាប់ទទួលទាននៅក្នុងបរិវេណគេហដ្ឋាន ខណៈគ្រួសារនៅជនបទមានតែ ៥៨% ដែលមានប្រភពផ្គត់ផ្គង់ទឹក ស្អាតសម្រាប់ទទួលទាន ។

ជុំវិញលទ្ធផលការងារលើកកម្ពស់ស្ថានភាពទឹកស្អាតនេះ នៅក្នុងពិធីអបអរសាទរខេត្តកណ្តាលទទួលបានជ័យលាភីជាខេត្តបញ្ចប់ការបន្ទោបង់ពាសវាលពាសកាល (ODF) ថ្ងៃទី២២ ខែធ្នូ ឆ្នាំ២០២២ ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានវាយតម្លៃថា តាមតួលេខខាងលើនេះ បង្ហាញឱ្យឃើញថា ការផ្គត់ផ្គង់ទឹកស្អាតសម្រាប់ប្រើបា្រស់នៅគេហដ្ឋានរបស់ប្រជាជនកម្ពុជាមានការរីកចម្រើនជាងបណ្តាឆ្នាំកន្លងមក ។

ចំណែកស្ថានភាពអនុវត្តអនាម័យវិញ គឺប្រមាណ ៨២,៨៣% នៃគ្រួសារកម្ពុជាមានបង្គន់អនាម័យប្រើប្រាស់ ក្នុងនោះតំបន់ទីប្រជុំជន ៩០.៤១% និងជនបទ ៧៨.៣១% ។ ចំពោះគ្រួសារកម្ពុជាដែលមិនមានបង្គន់អនាម័យប្រើមាន ១៧.១៧% ក្នុងនោះទីប្រជុំជនមាន ៩.៥៩% និងជនបទ ២១.៦៩% បានន័យថា គ្រួសារកម្ពុជាឆ្នាំ២០១៩ មានបង្គន់អនាម័យប្រើប្រាស់ ០៩គ្រួសារ ក្នុងចំណោម១០គ្រួសារនៅ​ទី​ប្រជុំជន និង ០៨គ្រួសារនៅជនបទ ។

ទិន្នន័យបានបង្ហាញថា ក្នុងចំណោមតួលេខខាងលើមានប្រមាណ ៤៩,៦% នៃគ្រួសាររស់នៅទីប្រជុំជនប្រើប្រាស់បង្គន់ចាក់ទឹក ឬចុចបង្ហូរទឹក តភ្ជាប់ទៅប្រព័ន្ធលូ ចំណែកឯនៅ​ជន​បទមានត្រឹមតែ ២៤,៨% ប៉ុណ្ណោះ ។

ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ មានប្រសាសន៍ថា ផ្អែកតាមគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យជនបទ បានបង្កើតឡើងតាំងពីឆ្នាំ២០០០ មានទស្សនៈវិស័យកំណត់ថា នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់ក្នុងបរិស្ថានដែលមាន អនាម័យប្រកបដោយនិរន្តរភាព ។

សូមជម្រាបថា ផ្អែកលើយុទ្ធសាស្រ្តចតុកោណរបស់រាជរដ្ឋាភិបាល ក្រសួងអភិវឌ្ឍន៍ជនបទ បានបង្កើតឡើងគោលនយោបាយអភិវឌ្ឍន៍ជនបទ ឆ្នំា២០១៩-២០២៣ ដែលបានកំណត់គោលនយោបាយច្បាស់លាស់មួយគឺ “លើកកម្ពស់គុណភាព និងគុណតំលៃនៃជីវិតរស់នៅរបស់ប្រជាជនជនបទ ប្រកបដោយបរិយាបន្ន ទាំងផ្នែក សេដ្ឋកិច្ច សង្គម និងវប្បធម៌” ក្នុងគោលបំណងជំរុញកំណើនប្រាក់ចំណូលតាមគ្រួសារនៅជនបទ និងលើកកម្ពស់សុខុមាលភាពប្រជាជនជនបទ ។

គិតត្រឹមចុងឆ្នាំ២០២២ កម្ពុជាមានខេត្តបញ្ចប់ការបន្ទោបង់ពាសវាលពាសកាល ឬខេត្ត ODF ចំនួនបីរួមមាន ខេត្តស្វាយរៀង ខេត្តព្រៃវែង និងខេត្តកណ្តាល ។ ខេត្តដែលបានប្រកាសជាជ័យលាភីខេត្តបញ្ចប់ការបន្ទោបង់ពាសវាលពាសកាល គឺគ្រប់គ្រួសារប្រជាជនរស់នៅទូទាំងខេត្តមានបង្គន់អនាម័យប្រើប្រាស់ ប្រជាជនយល់ដឹងពីទម្លាប់អនុវត្តអនាម័យ ព្រមទាំងបរិស្ថានសាធារណៈមានលក្ខណៈល្អប្រសើរ ៕