សិស្សកម្ពុជាចំនួន១៧រូប បាននាំយកមេដាយមាសមកជូនកម្ពុជា ក្នុងការប្រកួតគណិតវិទ្យាអូឡាំព្យាដអន្តរជាតិសង្ហបុរី-អាស៊ី (SIMOC) ដែលបានធ្វើឡើងនៅប្រទេសសីង្ហបុរី ចាប់ពីថ្ងៃទី២០ដល់ថ្ងៃទី២៤ ខែកក្កដា ឆ្នាំ២០២៤។

ការប្រកួតគណិតវិទ្យាអូឡាំព្យាដអន្តរជាតិសង្ហបុរី-អាស៊ី (SIMOC) ឆ្នាំ២០២៤នេះ មានបេក្ខជនចូលរួមប្រកួតសរុបប្រមាណ ២៣០០នាក់មកពី៣០ប្រទេសជុំវិញពិភពលោក។ ក្នុងនោះ សិស្សកម្ពុជា ទទួលបានមេដាយសរុបចំនួន១២០គ្រឿង ដោយរួមមាន មេដាយមាស ចំនួន១៧គ្រឿង, មេដាយប្រាក់ចំនួន៣៦គ្រឿង និងមេដាយសំរឹទ្ធ ចំនួន៦៧គ្រឿង។

លោក យ៉ែម សុភ័ណ្ឌ ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី ដែលដឹកនាំសិស្សកម្ពុជាសម្រាប់ការ​ប្រកួតនេះ​មានប្រសាសន៍ថា ការប្រកួតគណិតវិទ្យាអូឡាំព្យាដអន្តរជាតិសង្ហបុរី-អាស៊ី (SIMOC) ធ្វើឡើងក្រោមវិញ្ញាសាចំនួន៣ រួមមាន ១. គណិតវិទ្យា ប្រកួតជាឯកទត្តជន (Math Olympiad) ២. វិញ្ញាសាល្បែងគិតលេខ ប្រកួតជាក្រុម (Math Warrior) និង៣. វិញ្ញាសាល្បែងប្រាជ្ញា ប្រកួតជាក្រុម (Mind Sport)។ លោកបន្តថា វិញ្ញាសារទាំង៣ គឺមានមេដាយរៀងៗខ្លួនដែលបេក្ខជនអាចទទួលបានមេដាយចំនួន៣ក្នុងការប្រកួតទាំង៣វិញ្ញាសានេះ។ បេក្ខជនដែលទទួលបានលទ្ធផលល្អទាំងបីវិញ្ញាសា អាចនឹងទទួលបានរង្វាន់ជាពានបន្ថែមទៀត ដែលរួមមាន Overall Champion, 1st Runner-up និង 2nd Runner-up ។

ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី បញ្ជាក់បន្ថែមថា ការប្រកួតជាក្រុមតម្រូវឱ្យបេក្ខជនកម្ពុជាដោះស្រាយវិញ្ញាសាជាក្រុមដែលមានសមាជិក៥នាក់មកពីបណ្តាប្រទេសខុសៗគ្នា។ តាមរយៈ​ការ​ប្រកួតជាក្រុមនេះ បេក្ខជនអាចប្រើប្រាស់និងអភិវឌ្ឍជំនាញប្រាស្រ័យទាក់ទងគ្នា ជំនាញធ្វើការជាក្រុម កិច្ចសហប្រតិបត្តិការ និងជំនាញភាពជាអ្នកដឹកនាំ ដែលសុទ្ធសឹងជាជំនាញសតវត្សទី២១។ 

សម្រាប់បេក្ខជនជ័យលាភីនឹងទទួលបានមេដាយមាស ប្រាក់ និងសំរឹទ្ធ រួមជាមួយនឹងពិន្ទុអាហារូបករណ៍សម្រាប់ចូលរួមកម្មវិធីបោះជំរុំភាពជាអ្នកដឹកនាំវ័យក្មេង (YALA) នាចុងឆ្នាំ២០២៤ នៅប្រទសចិន។ ហើយ​ជាមួយគ្នា​បេក្ខជនក៏​នឹងទទួលបាននូវអត្ថប្រយោជន៍ផ្សេងៗទៀតដូចជា ការបង្ហាញសមត្ថភាពលើឆាកអន្តរជាតិ ការអភិវឌ្ឍចំណេះដឹងគណិតវិទ្យារួមជាមួយនឹងជំនាញទន់តាមរយៈការប្រកួតជាក្រុម និងបង្កើតទំនាក់ទំនងជាមួយសិស្សពូកែៗមកពីបណ្តាប្រទេសទាំង៣០ប្រទេសជុំវិញពិភពលោក។

ជាការយល់ឃើញរបស់លោក យ៉ែម សុភ័ណ្ឌ ​សិស្សានុសិស្សកម្ពុជាមានការរីកចម្រើនទៅលើមុខវិជ្ជាគណិតវិទ្យាគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ដែលមានកំណើននៃបេក្ខជនដាក់ពាក្យចូលប្រកួត, ការខិតខំប្រឹងប្រែងរៀនសូត្ររបស់សិស្សផ្ទាល់ និងការជំរុញពីអាណាព្យាបាលសិស្ស។ ក្នុងនោះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ជាគម្រូក្នុងការបញ្ជូនកូនប្រុសឱ្យចូលរួមការប្រកួតគណិតវិទ្យាកម្រិតអន្តរជាតិបែបនេះ។

គួរជម្រាបជូនថា កម្ពុជាបានបញ្ជូនសិស្សចាប់ពីថ្នាក់ទី១ ដល់ថ្នាក់ទី១១ ចំនួន១១៩នាក់ ចូលរួមការប្រកួតគណិតវិទ្យាអូឡាំព្យាដអន្តរជាតិសង្ហបុរី-អាស៊ី (SIMOC) សម្រាប់ឆ្នាំ២០២៤ ។ ខណៈកាលពីឆ្នាំ២០២៣ មានបេក្ខជនកម្ពុជាចូលរួមការប្រកួតគណិតវិទ្យាអូឡាំព្យាដអន្តរជាតិសង្ហបុរី-អាស៊ី (SIMOC ) ត្រឹមតែចំនួន៣៧នាក់ ដោយ​ក្នុងនោះ ឈ្នះពានចំនួន១ និងមេដាយសរុបចំនួន៤២គ្រឿងជូនប្រទេសកម្ពុជា៕