នៅចុងឆ្នាំ២០២៤ មជ្ឈមណ្ឌលស្រាវជ្រាវ Pew បានចេញផ្សាយរបាយការណ៍អំពីការស្ទង់មតិចុងក្រោយ អំពីក្មេងជំទង់អាមេរិក ដែលមានអាយុចន្លោះពី ១៣ ដល់ ១៧ឆ្នាំ។ ទោះជាមានការព្រួយបារម្ភខ្លាំង អំពីឥទ្ធិពលប្រព័ន្ធផ្សព្វផ្សាយមកលើសុខភាពផ្លូវចិត្តក្មេងជំទង់ ការហាមឃាត់មិនឱ្យប្រើទូរស័ព្ទដៃក្នុងសាលា និងការឹតបន្តឹងលើការប្រើប្រាស់ប្រពន្ធផ្សព្វផ្សាយសង្គមសម្រាប់អនីតិជនក៏ដោយ។ លទ្ធផលនៅតែរកឃើញថា ក្មេងជំទង់ បានប្រើទូរស័ព្ទច្រើនជាងពេលណាទាំងអស់។ ជាងពាក់កណ្ដាលនៃអ្នកចូលរួមស្ទង់មតិលើកឡើងថា ពួកគេបានអនឡាញស្ទើរតែគ្រប់ពេល។

ការសិក្សាបានរកឃើញថា ក្មេងជំទង់ប្រមាណ ៩០ភាគរយបានប្រើប្រាស់យូធូប ខណៈ ៦៣ភាគរយ និយាយថា ពួកគេប្រើប្រាស់តិកតុកជារៀងរាល់ថ្ងៃ។ ខណៈបច្ចេកវិទ្យាបញ្ញាសិប្បនិម្មិត ក៏កំពុងតែទទួលបានការចាប់អារម្មណ៍ ពីសំណាក់ក្មេងជំទង់ដែរ។

ជីវិតក្មេងជំទង់ នឹងបន្តមានទំនាក់ទំនងយ៉ាងស៊ីជម្រៅជាមួយនឹងបច្ចេកវិទ្យា និងប្រព័ន្ធផ្សព្វផ្សាយនៅឆ្នាំ២០២៥។ ជួសឱ្យការដាក់បំរាម ឬហាមឃាត់ពួកគេមិនឱ្យប្រើប្រាស់បច្ចេកវិទ្យានេះ Psychology Today បានបញ្ជាក់ថា ក្មេងជំទង់ត្រូវការ ការគាំទ្រពីសំណាក់អាណាព្យាបាល ដើម្បីជួយពួកគេឱ្យប្រើប្រាស់បច្ចេកវិទ្យាបានត្រឹមត្រូវ។

សម្រាប់ការប្រើប្រាស់វេទិកាយូធូប ដែលត្រូវបានគេរកឃើញថា មានការពេញនិយមក្នុងចំណោមក្មេងជំទង់ របាយការណ៍របស់សមាគមន៍អ្នកចិត្តសាស្ត្រអាមេរិក បានគូសបញ្ជាក់ថា អាណាព្យាបាល និងអ្នកថែទាំកុមារ មានតួនាទីសំខាន់ណាស់ក្នុងការបង្ហាញពីឥទ្ធិពលនៃមាតិកា មានមកលើពួកគេ។ របាយការណ៍បានណែនាំថា ដើម្បីជួយកុមារឱ្យប្រើប្រាស់យូធូបបានត្រឹមត្រូវ អាណាព្យាបាល ត្រូវគ្រប់គ្រងមាតិកា ដែលនាំឱ្យប៉ះពាល់ដល់ការគិត និងផ្លូវចិត្តកុមារ ដូចជា អំពើហិង្សា, អាកប្បកិរិយាគ្រោះថ្នាក់, មាតិកា ដែលនាំឱ្យមានការស្អប់លើបណ្ដាញសង្គម, រូបភាពរាងកាយដែលមិនសមរម្យ និងមាតិកាអវិជ្ជមានជាច្រើនទៀត។

ផ្ទុយទៅវិញ អាណាព្យាបាលត្រូវលើកទឹកចិត្តឱ្យកុមារមើលមាតិកាដែលនាំមកនូវផលវិជ្ជមានដូចជា ការសិក្សាអប់រំ, ការស្វែងយល់ពីអារម្មណ៍ និងសុខុមាលភាព និងការកម្សាន្តបែបវិជ្ជមាន។ លើសពីនេះ អាណាព្យាបាលត្រូវមានទំនាក់ទំនងល្អជាមួយកូន និងប្រាដកថា ពួកគេទស្សនាមាតិកា ដែលត្រឹមត្រូវ និងអាចទុកចិត្តបាន។

ក្រៅពីវេទិកាយូធូប បច្ចេកវិទ្យាបញ្ញាសិប្បនិម្មិត (AI) ត្រូវបានក្មេងជំទង់ប្រើប្រាស់នៅគ្រប់ទីកន្លែងក្នុងឆ្នាំ២០២៥។ បច្ចេកវិទ្យានេះ ត្រូវបានបំពាក់នៅលើ Youtube, Snapchat, Reddit, Discord, Roblox, Spotify និងសូម្បីតែ​ Google Search។ ទន្ទឹមនឹងការប្រើប្រាស់បច្ចេកវិទ្យាបញ្ញាសិប្បនិម្មិត កាន់តែទូលំទូលាយ ក្មេងជំទង់ត្រូវមានចំណេះដឹងក្នុងការកំណត់ព័ត៌មានមិនត្រឹមត្រូវ, ការពារទិន្នន័យផ្ទាល់ខ្លួន, យល់ដឹងអំពីក្រមសីលធម៌ប្រើប្រាស់ AI និងហានិភ័យ ដែលមានសក្តានុពលមួយចំនួនទាក់ទងនឹងការប្រើប្រាស់​ AI ។

ចំណុចពិសេសមួយទៀត គឺទម្រង់នៃការប្រើប្រាស់បណ្ដាញសង្គម ត្រូវបានផ្លាស់ប្ដូរ។ ការសិក្សារកឃើញថា ក្មេងជំទង់ប្រើប្រាស់បណ្ដាញសង្គម លើសពីការទំនាក់ទំនង។ ជាក់ស្ដែង ពួកគេបានប្រើ យូធូប និងតិកតុក ជំនួស google ដើម្បីស្វែងរកព័ត៌មាន និងស្រាវជ្រាវ។ ការស្រាវជ្រាវដោយ សាកលវិទ្យាល័យ ឈីកាហ្គោ បានរកឃើញថា ជាង ៦០ភាគរយនៃមាតិកាអំពីសុខភាព បានបង្ហោះដោយ អ្នកផលិតមាតិកា ដែលមិនមែនជាអ្នកជំនាញ ដែលនាំឱ្យមានទិន្នន័យ និងព័ត៌មានមួយចំនួនមិនត្រឹមត្រូវ៕