វិធីសាស្ត្រ ៧ចំណុចជួយឱ្យកូនឃ្លាតចេញពីទម្លាប់ញៀនវីដេអូហ្គេម

ខណៈបច្ចេកវិទ្យាទំនើបៗកំពុងរីកចម្រើននាពេលបច្ចុប្បន្ន ឪពុកម្តាយពិតជាលំបាករារាំងកូនឱ្យគេចចេញពីបច្ចេកវិទ្យានោះ ជាពិសេសកម្មវិធីកីឡាអេឡិកត្រូនិកមួយចំនួន ឬវីដេអូហ្គេម ដែលកូនបានឃើញនិងកំពុងកាន់នៅនឹងដៃ។ ទន្ទឹមគ្នានេះកម្មវិធីកម្សាន្តមួយចំនួនមានក្នុងទូរស័ព្ទដៃក៏កំពុងពង្វក់ស្មារតីក្មេងៗ ឱ្យងប់ងល់ទៅតាមនោះដែរ ដូចជាញៀននឹងបណ្តាញសង្គមផ្សេងៗទាំងវ័យក្មេងជាដើម។ និយាយពីវីដេអូហ្គេមសម្រាប់កុមារ ឪពុកម្តាយគួរមានវិធីសាស្ត្រគ្រប់គ្រងឱ្យបានច្បាស់លាស់លើការប្រើប្រាស់របស់កូន ទោះបីមិនសូវមានពេលវេលាគ្រប់គ្រាន់នៅជាមួយកូន។ ខាងក្រោមនេះ ជាវិធីប្រាំពីរចំណុចអាចបង្កាជាមុនក្នុងពេលដែលកូនរបស់អ្នកមិនទាន់វក់ខ្លាំងជាមួយល្បែងហ្គេមលើទូរស័ព្ទដៃ ឬនៅលើកុំព្យូទ័ររបស់ពួកគេ។

១. ចំណាយពេលលេងហ្គេមជាមួយកូន ៖ ទោះអ្នកមិនយល់ ឬមិនធ្លាប់លេងហ្គេមក្តី ប៉ុន្តែអ្នកគួរសាកល្បងឱ្យកូនរបស់អ្នកពន្យល់ពីហ្គេម ឬរៀនទាំងអស់គ្នា។ នេះជាឥរិយាបថអប់រំមួយបង្ហាញទៅកាន់កូនថា លេងហ្គេមមិនមែនជារឿងអាក្រក់នោះទេ ហើយឆ្លៀតពេលពន្យល់ទៅកូនពីគុណសម្បត្តិនិងគុណវិបត្តិនៃការចំណាយពេលវេលាទៅលើហ្គេម។

២. កត់ត្រាពេលវេលាលេងហ្គេមនេះជាមួយគ្នា ៖ ត្រូវកំណត់និងកត់ត្រាពេលវេលាដែលអ្នកនិងកូនបានចំណាយទៅលើការលេងហ្គេម បន្ទាប់មកគណនាចំនួនពេលវេលាសរុបដែលបានចំណាយពេញមួយសប្តាហ៍ ដើម្បីបង្ហាញតួលេខប្រាកដទៅឱ្យពួកគេមើលថា តើការចំណាយពេលវេលាលេងហ្គេមកន្លងទៅមានប្រយោជន៍កម្រិតណា? ទទួលបានលទ្ធផលអ្វីខ្លះ? ឬប្រៀបធៀបទៅនឹងសកម្មភាពផ្សេងឱ្យកូនមើលឃើញពីតម្លៃនៃពេលវេលា។

៣. បង្ហាញឬលើកឧទាហរណ៍សកម្មភាពមានប្រយោជន៍ ៖“កូនអាចប្រើប្រាស់ពេលវេលាប្រហាក់ប្រហែលទៅនឹងការលេងហ្គេមដើម្បីធ្វើរឿងអស្ចារ្យជាច្រើនសម្រាប់ជីវិត ហ្គេមគ្រាន់តែជាផ្នែកមួយសម្រាប់ការកម្សាន្តបណ្តោះអាសន្នតែប៉ុណ្ណោះ” ពន្យល់ទៅកាន់កូនដូច្នេះ ដោយភ្ជាប់នឹងការគណនាពេលវេលាលេងហ្គេមពេញមួយសប្តាហ៍ ឬមួយខែ និងមួយឆ្នាំ នោះនឹងអាចរំលឹកស្មារតីឱ្យងាយទៅធ្វើរឿងមានប្រយោជន៍ជាច្រើនជំនួសវិញ។

៤. រៀបចំសកម្មភាពកម្សាន្តបន្ថែមសម្រាប់កូនទាំងនៅក្នុងផ្ទះ និងនៅក្រៅផ្ទះ៖ ត្រង់នេះបើតឹងតែងពេកអាចជាសម្ពាធផ្លូវចិត្តសម្រាប់កុមារ ដោយសារក្មេងទាមទារការយកចិត្តទុកដាក់ច្រើនបន្តិចពីម្តាយឪពុក។ ទន្ទឹមគ្នានេះ ដើម្បីបង្វែរចំណាប់អារម្មណ៍ចេញពីហ្គេមលើទូរស័ព្ទដៃ អ្នកអាចរៀបចំផែនការសកម្មភាពប្រចាំថ្ងៃទាំងការរៀនសូត្រ ឬសកម្មភាពកម្សាន្តផ្សេងទៀតៗដល់កូន ដើម្បីបំពេញបន្ថែមលើពេលទំនេររបស់ពួកគេមាន។ ច្នៃប្រឌិតល្បែងគួរលេងខ្លះដែលមិនពាក់ព័ន្ធនឹងអេឡិកត្រូនិកហ្គេមគួរធ្វើដែរ ដូចជាល្បែងដែលឪពុកម្តាយធ្លាប់លេងពីកុមារ។ ធ្វើដូចនេះ វានឹងក្លាយទៅជាទម្លាប់សម្រាប់កូន។

៥. សាកល្បងធ្វើគម្រោងរយៈពេលវែងសម្រាប់កូនរបស់អ្នក ៖ កូនរបស់អ្នកប្រហែលមានគោលបំណងធ្វើអ្វីមួយដោយខ្លួន ដែលជាចំណង់ចំណូលចិត្តរបស់គេដូចជាក្លាយជាកីឡាករបាល់ទាត់ឆ្នើមម្នាក់ ឬក្លាយជាអ្នកលេងឧបករណ៍តន្ត្រីដ៏ចំណាន ឬការងារក្នុងក្តីស្រមៃរបស់របស់ពួកគេ។ ឪពុកម្តាយគួរជួយស្វែងរកវិធីរៀបចំពេលវេលាឱ្យពួកគេចាប់ផ្តើមកិច្ចការងារទាំងនោះ ទោះបីជាមួយឬពីរម៉ោងក្នុងមួយសប្តាហ៍។ ទម្លាប់បណ្តុះកូនឱ្យលើនិស្ស័យ ប្រសើរជាងបង្ខំកូនឱ្យធ្វើតាមចិត្តម្តាយឪពុក។

៦. ព្យាយាមពន្យល់និងប្រៀបធៀបហ្គេមនិងជីវិតពិត៖ ហ្គេមមិនមែនជារឿងអាក្រក់នោះទេ ហើយក៏មិនអត់ប្រយោជន៍ដែរ ប៉ុន្តែអ្នកគួរពន្យល់កូនឱ្យច្បាស់ពីរបៀបនៃការទាញយកប្រយោជន៍ពីហ្គេម ភាពឆ្លាតវៃ ការគិត និងរបៀបដោះស្រាយបញ្ហា។ សូមរំលឹកទៅកាន់កូនថា សកម្មភាពក្នុងវីដេអូហ្គេមមិនអាចអនុវត្តនៅក្នុងជីវិតរស់នៅជាក់ស្តែងបានទាំងអស់ឡើយ។

៧. ទម្លាប់ទទួលទានអាហារជុំគ្នាក្នុងគ្រួសារ៖ ពេលព្រឹកឬពេលល្ងាចទទួលទានអាហារជុំគ្នាជាមួយសមាជិកគ្រួសារទាំងអស់ ជាឱកាសដ៏ល្អបំផុតដើម្បីសមាជិកគ្រួសារមានទំនាក់ទំនងគ្នាកាន់តែល្អ។ វេលានេះឪពុកម្តាយមានពេលជជែកលេងជាមួយកូន បង្ហាញពីភាពស្និទស្នាល ការយកចិត្តទុកដាក់ ការរំលឹកដាស់តឿនកូន ព្រមទាំងទទួលបានការឆ្លើយតប សំណូមពរ ឬការយល់ឃើញផ្សេងៗពីកូនវិញក្នុងដំណាក់កាលនេះ៕

លោក ស៊ុន លី | Mr. San Sounly

ជីវប្រវត្តិ: ធ្លាប់បំពេញការងារជាអ្នកបកប្រែអត្ថបទសារព័ត៌មានជាភាសាខ្មែរជាមួយនឹងស្ថាប័នព័ត៌មានមួយចំនួនរយៈពេល៧ឆ្នាំ។ បទពិសោធបកប្រែប្រភេទព័ត៌មានអន្តរជាតិនយោបាយសេដ្ឋកិច្ចនិងកីឡាផង។ បច្ចុប្បន្នកំពុងបំពេញការងារជាអ្នកបកប្រែអត្ថបទសារព័ត៌មានសេដ្ឋកិច្ចអន្តរជាតិឱ្យសារព័ត៌មាន AMS Education និង AMS Economy ។