ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការចំណាយពេលអានសៀវភៅជាមួយកូនៗ មិនត្រឹមតែជាមធ្យោបាយមួយដើម្បីពង្រឹងទំនាក់ទំនងជាមួយកូនៗនោះទេ ប៉ុន្តែក៏ជាការបណ្ដុះកុមារឱ្យមានទម្លាប់ល្អៗ ដូចជា ពង្រឹងស្មារតីផ្ដោតអារម្មណ៍អំឡុងពេលអានសៀវភៅ បណ្ដុះចំណូលចិត្តកុមារឱ្យចង់សិក្សាអំពីសង្គម និងជំរុញឱ្យកុមារទំនុកចិត្តលើខ្លួនឯង នៅពេលបញ្ចេញមតិទៅលើរឿងអ្វីមួយ។ បច្ចុប្បន្ន មានសៀវភៅជាច្រើន ត្រូវបានបោះពុម្ពសម្រាប់កុមារ។ ដូច្នេះ តើម្ដាយឪពុកគួរជ្រើសរើសប្រធានបទអ្វី សម្រាប់អានជាមួយកូនៗ? ផ្អែកតាមការសិក្សារបស់ Kinderkloud បានបង្ហាញថា មានប្រធានបទសំខាន់ៗចំនួន ៥ ដែលអ្នកអាចជ្រើសរើស ដើម្បីអានជាមួយកូនៗ។
១. មិត្តភាព ៖ ប្រធានបទអំពីមិត្តភាព អាចជាប្រធានបទមួយ ដែលកុមារចូលចិត្តស្ដាប់ និងរីករាយក្នុងការជជែកជាមួយឪពុកម្ដាយ។ អ្នកអាចស្វែងរកឈ្មោះមិត្តភក្តិរបស់កូនៗអ្នកជាមុនសិន ដើម្បីងាយស្រួលជជែកជាមួយគេ និងធ្វើឱ្យកុមារកាន់តែរីករាយនៅពេលបានឮឈ្មោះមិត្តភក្តិរបស់ខ្លួន។ បន្ទាប់មក អ្នកអាចអាន ឬនិយាយពីប្រធានបទាក់ទងនឹងមិត្តភាពដូចជា របៀបចាប់ផ្ដើមមិត្តភាពជាមួយអ្នកដទៃ, រឿងដែលធ្វើឱ្យកុមាររីករាយក្នុងការបង្កើតមិត្តភាព ឬក៏ជម្លោះ ដើម្បីបណ្ដុះភាពចង់ដឹងចង់ឃើញរបស់កុមារ អំពីការង្កើត ឬរក្សាទំនាក់ទំនង។
២. ភាពក្លាហាន ៖ ការបង្រៀនកុមារឱ្យមានភាពក្លាហារមិនត្រឹមតែអាចបង្រៀនតាមរយៈការអប់រំ ឬឱ្យដំបូន្មានដោយផ្ទាល់ប៉ុណ្ណោះទេ អ្នកក៏អាចបង្រៀនពួកគេតាមរយៈការអានសៀវភៅរឿងនិទាន ឬសៀវភៅផ្សេងៗផងដែរ។ ដើម្បីបង្កើនភាពរីករាយ និងធ្វើឱ្យកូនកាន់តែចង់ស្ដាប់រឿងដែលអ្នកអាន អ្នកអាចប្រើឈ្មោះរបស់គេ ជាតួអង្គសំខាន់ ដែលមានភាពក្លាហាន និងហ៊ានការពារភាពត្រឹមត្រូវ ឬយុត្តិធម៌ជាដើម។ កុមារនឹងយល់ថា ភាពក្លាហានគឺជារឿងល្អ និងជាអ្វីដែលពួកគេត្រូវធ្វើ ព្រោះកុមាររៀន និងអនុវត្តសកម្មភាព តាមរយៈគម្រូ និងរឿងដែលពួកគេធ្លាប់ឮ។
៣. ទុក្ខព្រួយ និងភាពសោកសៅ ៖ ការអានសៀវភៅ អំពីទុក្ខព្រួយ ឬភាពសោកសៅ ជាមួយកុមារ ជាពិសេសនៅពេលពួកគេមានអាយុចាប់ពី ៥ ទៅ៨ឆ្នាំ អាចធ្វើឱ្យកុមារយល់ដឹងអំពីអារម្មណ៍ទាំងនេះ បានច្បាស់ និងដឹងពីវិធី ដើម្បីទប់ទល់ជាមួយអារម្មណ៍ទាំងនេះ។ លើសពីនេះ ការអានរឿង ដែលមានខ្លឹមសារ និងរូបភាពទាក់ទាញ អាចជួយឱ្យកុមារ មានការស្រមើស្រមៃកាន់តែស៊ីជម្រៅ អំពីអារម្មណ៍សោកសៅ ភាពខកចិត្ត ឬខឹង និងប្រភេទអារម្មណ៍ផ្សេងៗទៀត។
៤. ការកំណត់អត្តសញ្ញាណខ្លួនឯង ៖ ជាធម្មជាតិរបស់កុមារ ពួកគេតែងតែព្យាយាមស្វែងរកអត្តសញ្ញាណរបស់ខ្លួន ។ ដូច្នេះ ជាការល្អ ប្រសិនបើឪពុកម្ដាយ អាចអានរឿង ដែលទាក់ទាងទៅនឹងការកំណត់អត្តសញ្ញាណខ្លួនឯងសម្រាប់កូនៗ ដើម្បីឱ្យពួកគេ ងាយស្រួលស្វែងយល់ពីខ្លួនឯង និងដឹងពីរបៀបស្វែងរកខ្លួនឯង។ លើសពីនេះ នៅអំឡុងពេលអានសៀវភៅ អ្នកក៏អាចចោទជាសំណួរផ្សេងៗ ដែលពាក់ព័ន្ធនឹងការកំណត់អត្តសញ្ញាណខ្លួនឯង ដើម្បីឱ្យកូនរបស់អ្នកឆ្លើយផងដែរ។ សំណួរទាំងនោះអាចជា តើកូនចូលចិត្តមនុស្សបែបណា? តើកូនចូលចិត្តពណ៌អ្វី? តើចូលចិត្តនិយាយអំពីរឿងនេះ ឬរឿងនោះដែរទេ? ។ល។
៥. គ្រួសារ ៖ ប្រធានបទអំពីគ្រួសារ អាចជាប្រធានបទមួយ ដែលគួរឱ្យចាប់អារម្មណ៍បំផុតសម្រាប់កុមារ។ ការចំណាយពេល ជាមួយកូន ដើម្បីអានសៀវភៅអំពីប្រធានបទនេះ អាចធ្វើឱ្យពួកគេកាន់តែរីករាយ និងស្គាល់អំពីតម្លៃនៃគ្រួសារកាន់តែច្បាស់៕
