កុមារីអាយុ១២ឆ្នាំមួយក្រុម មក​ពីខេត្តព្រៃវែង ហៅឈ្មោះ​ក្រុមខ្លួនឯងថា Takor Girls បានបង្កើតអេបទូរស័ព្ទដៃ “រៀនអក្ខរក្រមភាសាខ្មែរ” ដើម្បី​ជួយកុមារ​ពីអាយុ១ឆ្នាំ ដល់៣ឆ្នាំឱ្យចេះអានអក្សរមុនពេលចូលរៀន បានជាប់ជ័យលាភីសហគ្រិនវ័យក្មេងថ្នាក់ជាតិកម្រិតបឋមសិក្សា ក្នុងកម្មវិធីប្រកួតប្រជែងថ្នាក់ជាតិ “តិចណូវេសិន និងអនាគតទេពកោសល្យឌីជីថល ឆ្នាំ២០២៥”។

កុមារី រដ្ឋា សុខដាវីន ជាសិស្សថ្នាក់ទី៦ នៃបឋមសិក្សាតាកោ និងជាតំណាងក្រុមជ័យលាភីសហគ្រិនវ័យក្មេងថ្នាក់ជាតិកម្រិតបឋមសិក្សា បានប្រាប់ AMS Education ថា រូបគេ និងក្រុមចូលរួមប្រកួតក្នុងកម្មវិធីនេះ ក៏ព្រោះតែចូលចិត្តផ្នែកបច្ចេកវិទ្យាឌីជីថល ហើយចង់បញ្ចេញសមត្ថភាព និងភាពក្លាហានទៅឱ្យគណៈកម្មការ លោកគ្រូ អ្នកគ្រូ ក៏ដូចជាអាណព្យាបាល ក៏ដូចជាសិស្សានុសិស្សផ្សេង​ទៀតបានឃើញ។ ជាពិសេស ចង់ទទួលបានជ័យលាភីក្នុងការប្រកួតយកមុខមាត់ជូនសាលា។

តំណាងក្រុម Takor Girls រូបនេះ បន្ថែមថា គម្រោងដែលក្រុមខ្លួនដាក់ប្រកួត គឺអេបទូរស័ព្ទដៃ “រៀនអក្ខរក្រមភាសាខ្មែរ” សម្រាប់សិស្សថ្នាក់ទី១ ដល់ថ្នាក់ទី៣ ដោយ​ក្នុង​នោះ មានរៀនអំពីមូលដ្ឋានគ្រឹះភាសាខ្មែរមុនចូលរៀននៅសាលា។ សុខដាវីន បន្តថា អេបរៀនអក្ខរក្រមភាសាខ្មែរ មានលក្ខណៈពិសេសសម្រាប់កុមាររៀនភាសាខ្មែរដំបូង ដោយមានបង្ហាញទាំងព្យព្ជានៈ រូបភាព និងសំឡេង ដែលមានភាពងាយស្រួលក្នុងការរៀនភាសាខ្មែរ។

“កុមារដែលមិនទាន់បានចូលរៀននៅសាលាក៏អាចរៀនតាមអេបនេះបាន ហើយនៅពេលគ្រប់អាយុចុះឈ្មោះចូលរៀន កុមាររៀនឆាប់ចេះ ហើយគ្រូងាយស្រួលបង្រៀន”

កុមារី រដ្ឋា សុខដាវីន បន្ថែមទៀតថា នៅពេលក្រុមរបស់ខ្លួនបានជាប់ជ័យលាភីសហគ្រិនវ័យក្មេងថ្នាក់ជាតិកម្រិតបឋមសិក្សា គឺពិតជាមានអារម្មណ៍សប្បាយរីករាយ។ សុខដាវីន ក៏ចង់ឃើញកុមារតូចៗមានសមត្ថភាពក្លាហាន មានគំនិតបង្កើតកម្មវិធីអប់រំថ្មី។ ទន្ទឹមនេះ នាង​ក៏ចង់ឃើញសិស្សានុសិស្ស​ផ្សេងទៀត​ចូលរួមបញ្ចេញសមត្ថភាពក្នុងការប្រកួតនានា ដើម្បីពង្រឹងសមត្ថភាពខ្លួនឯង និងផ្ដល់កិត្តិយសដល់គ្រួសារ​ និងសាលារៀន។

លោក សុខ​ ជា ជាគ្រូបង្គោលឌីជីថល នៃសាលាបឋមសិក្សាតាកោ ខេត្តព្រៃវែង និងជាគ្រូដឹកនាំរបស់ក្រុម Takor Girls មានប្រសាសន៍ថា លោកពិតជាកោតសរសើរប្អូនៗបានខិតខំប្រឹងប្រែរយៈពល១២សប្ដាហ៍ក្នុងការប្រកួត ដោយ​លោក​មើលឃើញថា ពួកគេចង់ចេះ ចង់ដឹង ឧស្សាហ៍ព្យាយាម មានសាមគ្គីភាព មានសេចក្ដីក្លាហាន និងមានទេពកោសល្យ។ លោក សុខ​ ជា បន្តថា លោករីករាយនៅពេលឃើញពួកគាត់ខិតខំប្រឹងប្រែងហើយទទួលបានលទ្ធផលល្អ។

គ្រូបង្គោលឌីជីថលរូបនេះ បន្ថែមថា ការបំផុសឱ្យបង្កើតកម្មវិធីទូរស័ព្ទរៀនអក្ខរក្រមភាសាខ្មែរនេះ គឺដើម្បីឆ្លើយតប​ទៅនឹង​អ្វីដែលជាបញ្ហាសិស្សមិនចេះអានអក្សរ ហើយអាចដោះស្រាយបាននៅពេលក្មេងបានប្រើប្រាស់កម្មវិធីនេះ ដោយ​ពួកគេ​អាចស្គាល់អក្សរ អានតាម និងអាចទទួលបានចំណេះដឹងបណ្ដើរៗមុនចូលរៀននៅសាលា។

លោក សុខ​ ជា បញ្ជាក់ថា កម្មវិធីទូរស័ព្ទដៃនេះ មាន៣ចំណុចសំខាន់ ទី១.រៀនព្យព្ជានៈ ទី២.រៀនស្រៈខ្មែរ និងទី៣ រៀនលេខខ្មែរ។ ក្នុងនោះ ការរៀនព្យញ្ជានៈ និងរៀនស្រៈខ្មែរ មានបង្កើតជារូបភាព សំឡេង និងឧទាហរណ៍។ ចំណែក ការរៀនលេខខ្មែរ មានបង្កើតជារូបភាព សំឡេង និងលំហាត់។ លើសពីនេះ អេបរៀនអក្ខរក្រមភាសាខ្មែរនេះ ក៏បានដាក់ឱ្យប្រើប្រាស់ជាសាធារណៈផងដែរ។

ជាមួយគ្នានេះ លោក សុខ​ ជា ក៏លើកទឹកចិត្តដល់ប្អូនៗសិស្សានុសិស្សត្រូវមានចិត្តចង់រៀន ចង់ចេះផ្នែកបច្ចេកវិទ្យា ព្រោះសម័យនេះ មិនថាជាសិស្សប្រុស ឬសិស្សស្រី គឺមានសមត្ថភាពស្មើគ្នាក្នុងការចាប់យកឱកាសដើម្បីបង្ហាញសមត្ថភាព ទទួលបានបទពិសោធន៍ ចូលរួមអភិវឌ្ឍខ្លួនឯង ជួយសង្គមជាតិ និងជួយវិស័យអប់រំឱ្យរីកចម្រើនទៅមុខដូចប្រទេសអភិវឌ្ឍដែរ៕