ការសម្រេចចិត្តថាផ្តាច់ចោលរាល់ភេសជ្ជៈស្រវឹង វានឹងធ្វើ​ឱ្យ​យើងមានការផ្លាស់ប្តូរជាច្រើនចំពោះស្មារតី ចិត្ត និងសុខភាពរាងកាយ ។ ប៉ុន្តែភាពខុសប្លែកទាំងនោះ មិនដូចគ្នាទាំងស្រុងទេ គឺផ្អែកទៅតាមសុខភាព នៃបុគ្គលម្នាក់ៗ ឬបរិមាណដែលទទួលទាន និងរបៀប នៃការប្រើប្រាស់អាល់កុលប៉ុណ្ណោះ។ យ៉ាងណាមិញ បើក្នុងកាលៈទេសៈដែលលោកអ្នកត្រូវបោះបង់ចោល បញ្ឈប់ ឬកាត់បន្ថយការទទួលទានគ្រឿងស្រវឹង គេហទំព័រ verywellmind បានបង្ហាញអំពីរឿងរ៉ាវដែលអាចនឹងជួបប្រទះ រួមទាំងតាមដំណាក់កាលមួយៗ។

តើនឹងមានអ្វីកើតឡើងពេលផ្តាច់គ្រឿងស្រវឹង?

ដើមចមនៃការរំពឹងទុកពីការចង់បាននូវសុខភាពមាំមួន ឬដែលមានភាពប្រសើរជាមុន មិនថាផ្លូវចិត្ត ឬផ្លូវកាយនោះទេ ការត្រៀមខ្លួនរួចរាល់ក្នុងការបោះបង់ចោលនូវទម្លាប់ប្រើប្រាស់គ្រឿងស្រវឹងខណៈដែលកំពុងតែមានទម្លាប់ទទួលទានប្រចាំថ្ងៃ គឺជាហេតុផលសំខាន់មួយ។ ទន្ទឹមគ្នានោះមុនពេលអនុវត្តន៍ គួរតែដឹងអំពីអាការៈ និងលទ្ធផលកំឡុងពេលផ្តាច់ចោលរាល់ភេសជ្ជៈមានជាតិអាល់កុលទាំងឡាយ។

– បន្ទាប់ពីមួយថ្ងៃ (១ថ្ងៃ) ៖  ចាប់ផ្តើមថ្ងៃដំបូង គឺជាថ្ងៃដែលលំបាក់បំផុត ហើយក៏ជាជំហានដ៏សំខាន់មួយដែលមិនអាចរំលងបាន។ បន្ទាប់ពីបន្ស៉ាំរាងកាយឱ្យឃ្លាតឆ្ងាយពីជាតិអាល់កុលក្នុងរយៈពេល២៤ម៉ោងកន្លងផុតទៅ រាងកាយចាប់ផ្តើមបន្សាបជាតិពុលបន្តិចម្តងៗ ក្នុងស្ថានភាពនេះ មនុស្សមួយចំនួនអាចនឹងមានអាការៈរសាប់រសល់ អន្ទះអន្ទែងក្នុងចិត្ត។ ស្ថិតក្នុងកាលៈទេសៈបែបនេះ សូមចាំថា គ្រាន់តែកើតមានក្នុងរយៈខ្លីប៉ុណ្ណោះ វានឹងមានការថមថយក្នុងរយៈពេលពីរទៅបីថ្ងៃខាងមុខ។ យ៉ាងណា ចំពោះអ្នកដែលមានទម្លាប់ទទួលទានភេសជ្ជៈស្រវឹងប្រចាំថ្ងៃ ឬអ្នកដែលមានអាការៈញៀនស្រា ឬជាតិអាល់កុលខ្លាំង អាការៈអន្ទះសា មិនមែនជាចំណុចសាមញ្ញពេកឡើយក្នុងការតទល់ ដែលចាំបាច់ត្រូវការជំនួយពីអ្នកជំនាញ ឬពេទ្យដែលមានឯកទេសច្បាស់លាស់ដើម្បីពិគ្រោះ។

-​​ ក្រោយរយៈពេលបីថ្ងៃ ( ៣ថ្ងៃ ) ៖ ក្រោយផ្តាច់ចោលនូវជាតិអាល់កុលក្នុងរយៈពេលបីថ្ងៃ ជាលទ្ធផលគឺជំរុញឱ្យមានការពេញចិត្ត និងបង្កើនភាពស្និទ្ធស្នាលជាមួយខ្លួនឯងបន្ថែម។ ប៉ុន្តែមិនមែនមានន័យថាអាការៈអន្ទះអន្ទែងបានបាត់ទាំងស្រុងចេញពីរាងកាយ ឬពីចិត្តនោះទេចំពោះបុគ្គលដែលមានអាការៈញៀនជាតិអាល់កុលខ្លាំងវិញ ពួកគាត់អាចនឹងមានអារម្មណ៍រសាប់រសល់ ឆាប់រំជើបរំជួល ឬការនៅមិនសុខជាដើម។ អ្នកដែលមានទម្លាប់ទទួលទានស្រាក្នុងរយៈពេលយូរ គឺត្រូវប្រើពេលយូរដូចគ្នាដើម្បីដោះស្រាយ។

– មួយអាទិត្យក្រោយមក ( ៧ថ្ងៃ )  ៖ បន្សាំខ្លួនជាមួយនឹងទម្លាប់គ្មានការប្រើប្រាស់ជាតិអាល់កុលក្នុងរយៈពេលមួយសប្តាហ៍ អាការៈរសាប់រសល់ និងហានិភ័យនៃជំងឺសរសៃឈាមបេះដូង ក៏ត្រូវបានកាត់បន្ថយ។ ដោយហេតុថា គ្រឿងស្រវឹងឬភេសជ្ជៈមានជាតិអាល់កុលខ្ពស់ គឺជាកត្តាបង្កើនឱ្យសម្ពាធឈាមមិនស្របនឹងតម្រូវការរាងកាយ ដូចជាបេះដូងលោតញាប់ខ្លាំងជាដើម។ យ៉ាងណា ការកាត់ផ្តាច់គ្រឿងស្រវឹងជាចំណែកក្នុងការសម្រួលឱ្យសុខភាពថ្លើមមានដំណើរការប្រសើរឡើងវិញ។

-​​ កន្លងផុតរយៈពេលមួយខែ (១ខែ ) ៖ អាចថា ជាសមិទ្ធផលដ៏ប្រសើរមួយ ក្រោយពេលកាត់ផ្តាច់ចោលនូវគ្រឿងស្រវឹងបានក្នុងរយៈពេលមួយខែ ហើយជាទូទៅចំណុចនេះក៏ជាចំណែកនាំឱ្យមនុស្សបង្កើនភាពរីករាយបានមួយផ្នែកដែរ ហើយភាពអន្ទះអន្ទែងនៃការខ្វះគ្រឿងស្រវឹងមិនបាន ក៏ត្រូវកាត់បន្ថយបានច្រើនគួរសម។ ដូច្នេះអាការៈថប់បារម្ភ និងបង្កើននូវផ្នត់គំនិតវិជ្ជមានក៏មានការរីកដុះដាលមួយកម្រិតបន្ថែម។ កន្លងផុតរយៈពេលមួយខែដែលគ្មានជាតិអាល់កុលចូលខ្លួន គឺជាដំណាក់កាលមួយ អនុញ្ញាតិឱ្យខួរក្បាលចាប់ផ្តើមដំណើរការល្អជាងពេលដែលងប់ងល់នឹងគ្រឿងស្រវឹង ប្រមាណជា ២ភាគរយ នេះបើផ្អែកតាមរយៈឯកសារស្រាវជ្រាវ។

-​​ បន្ទាប់ពីប្រាំមួយខែ (៦ខែ )  ៖ កន្លះឆ្នាំដោយគ្មានជាតិអាល់កុល ប្រៀបដូចជាផ្តល់រង្វាន់មួយទៅកាន់រាងកាយ ចំណែកឯហានិភ័យដែលធ្វើឱ្យកើតជំងឺមហារីកមានសភាពធូរស្រាល ហើយមុខងារនៃសុខភាព​ថ្លើមក៏មានភាពល្អប្រសើរ។ ចំណុចមួយទៀតដែលគួរឱ្យកត់សម្គាល់ដែរ គឺសុខភាពរាងកាយទូទៅមានការប្រែប្រួលទៅរកភាពល្អប្រសើរ បង្កើនកម្លាំងថាមពល រួមទាំងភាពស្រស់ថ្លានៃស្បែកផងដែរ។

-​​​ រយៈពេលមួយឆ្នាំ (១ឆ្នាំ ) ៖ មួយឆ្នាំនៃការកាត់ផ្តាច់ជាតិអាល់កុល ហានិភ័យដែលនាំឱ្យកើតជាជំងឺគ្រប់ប្រភេទនឹងត្រូវបានកាត់បន្ថយក្នុងកម្រិតខ្ពស់ បើប្រៀបទៅនឹងដំណាក់កាលមុនៗ។ ប៉ុន្តែគួររំឮកដែរថា អាការៈនឹងភាពប្រែប្រួល មានសភាពខុសគ្នាពីមនុស្សម្នាក់ទៅមនុស្សម្នាក់ ហើយកត្តាដែលជំរុញចិត្តឱ្យកាត់ផ្តាត់ពីគ្រឿងស្រវឹងក៏អាស្រ័យលើ ថា តើបានដឹងអំពីអត្ថប្រយោជន៍ នៃការផ្តាច់គ្រឿងស្រវឹងបានប៉ុន្មាន ផ្តល់តម្លៃទៅកាន់សុខភាពកម្រិតណា និងមានការតាំងចិត្តបែបណា ដោយហេតុថា ការបោះបង់នូវការពិសាគ្រឿងស្រវឹងសម្រាប់អ្នកមានអាការៈញៀនមិនងាយស្រួលពេកនោះទេ៕