ក្នុងយុគសម័យឌីជីថលនេះ ទម្លាប់នៃការសម្លឹងមើលអេក្រង់ (Screen Time) ច្រើនម៉ោង​បាន​ក្លាយជារឿងធម្មតាទៅហើយ ជាពិសេសសម្រាប់អ្នកធ្វើការជាមួយកុំព្យូទ័រជាចាំបាច់ ឬអ្នកប្រើប្រាស់បណ្ដាញសង្គមញឹកញាប់។ ទោះជាយ៉ាងណាក៏ដោយ ទម្លាប់​នៅមុខ​ស្រ្កីនច្រើន​ម៉ោង គឺបានជះឥទ្ធិពលអវិជ្ជមានយ៉ាងខ្លាំងទៅលើគុណភាពដំណេក និងផលិតភាពការងារពេញមួយថ្ងៃ។ ដូច្នេះ ការបង្កើតទម្លាប់ដែលនាំមកនូវភាពស្ងប់ស្ងាត់មុនពេលចូលគេង គឺជាគន្លឹះដ៏សំខាន់ដែលអនុញ្ញាតឱ្យរាងកាយ និងខួរក្បាលមានឱកាសសម្រាក និងបញ្ចូលថាមពលឡើងវិញ។

ក្នុងនោះសម្រាប់អ្នកដែលកំពុងប្រឈមនឹងបញ្ហាថប់បារម្ភ និងស្ត្រេសរ៉ាំរ៉ៃ ការកាត់ផ្ដាច់ខ្លួនពីប្រព័ន្ធផ្សព្វផ្សាយ និងអេក្រង់អេឡិចត្រូនិច គឺជាជម្រើសដ៏ត្រឹមត្រូវបំផុត។ ការកាត់បន្ថយ ឬឈប់ប្រើប្រាស់បណ្ដាញសង្គម មិនត្រឹមតែជួយឱ្យស្ថានភាពផ្លូវចិត្តមានភាពប្រសើរឡើងប៉ុណ្ណោះទេ ថែមទាំងជួយជំរុញគុណភាពនៃការគេង និងសុខុមាលភាពរួមបានទៀតផង។

យោងតាមគេហទំព័រ Verywellmind បានណែនាំនូវវិធីសាស្រ្តកាត់បន្ថយទម្លាប់នៅមុខអេក្រង់ ឬបណ្ដាញសង្គមដូចដែលបានរៀបរាប់លម្អិតខាងក្រោម៖

ការចាប់ផ្តើមសាកល្បងបែបស្រួលៗ ៖ សាកល្បងទុកចោលប្រព័ន្ធផ្សព្វផ្សាយប្រហែល៣០នាទី ឬក៏មួយម៉ោងពេញមុនចូលគេង ឱ្យបានមួយអាទិត្យពេញ! ឬក៏វិធីមួយទៀត ក្នុងមួយសប្តាហ៍កាត់ការប្រើប្រាស់កន្លះថ្ងៃ។ ហើយជាកិច្ចបន្ទាប់ គួរកត់សម្គាល់និងឆ្លុះបញ្ចាំងអំពីស្ថានភាពអារម្មណ៍របស់ខ្លួនថា តើវាមានភាពខុសប្លែកគ្នាយ៉ាងដូចម្តេចខ្លះ បើប្រៀបធៀបកាលពីពេលមិនបានដាក់ផែនការក្នុងការកាត់ផ្តាត់ ឬកាត់បន្ថយ។ ប្រាកដណាស់ តិចឬច្រើន លទ្ធផលវិជ្ជមាននឹងលេចចេញមក គ្រាន់តែកម្រិតនៃប្រសិទ្ធភា​​ពអាស្រ័យលើស្ថានភាពផ្ទាល់ខ្លួន ប្រសិនបើអារម្មណ៍តប់ប្រមល់មានកម្រិតខ្លាំង នោះក៏ត្រូវការពេលវេលាក្នុងការជៀសពីបណ្តាញសង្គមក្នុងរយៈពេលវែងដូចគ្នា។ ការកត់សម្គាល់ ជាវិធីមួយដ៏ឆ្លាតវៃក្នុងការតាមដានឱ្យឃើញនូវលទ្ធផល និងជាវិធីសាស្រ្តក្នុងការជំរុញកម្លាំងចិត្តឱ្យបន្តសកម្មភាពទៅមុខទៀត។

ការទទួលស្គាល់ ៖​ ការចាប់ផ្តើមថ្ងៃដំបូងៗគឺជាថ្ងៃដែលទទួលបាននូវបទពិសោធន៍មួយដែលលំបាកជាងគេ កាលដែលទទួលស្គាល់ចំណុចនេះ ឬក៏ការដឹងមុនឱ្យហើយ ជាការត្រៀមខ្លួនក្នុងការអនុវត្តជាក់ស្តែងឱ្យកាន់តែមានប្រសិទ្ធភាព។ គួរចងចាំថា ការបំបែកទម្លាប់នីមួយៗ ជាកិច្ចការដ៏មានភាពស្មុគស្មាញ និងពិបាកបំផុតប្រសិនបើមិនមានវិន័យក្នុងការរក្សាការតាំងចិត្ត នោះលេសជាច្រើននឹងកើតមាន ហើយនាំឱ្យការអនុវត្តន៍សកម្មភាពមិនបានជាប់លាប់ រួមទាំងប៉ះពាល់ផលិតភាពការងារ និងការសិក្សាក្នុងរយៈពេលវែងបាន។

ជំរុញផលិតភាព ៖ ការរំខានពីមជ្ឈដ្ឋានខាងក្រៅតាមរយៈសម្លេង ឬក៏រូបភាពដែលមើលឃើញនឹងភ្នែក វាងាយនឹងដាស់សតិឱ្យប្រមូលផ្តុំត្រឡប់មកវិញ ប៉ុន្តែការរំខានដោយប្រយោលតាមរយៈបណ្តាញសង្គមមួយចំនួន បណ្តាលឱ្យការប្រើប្រាស់ពេលដោយឥតបានការ និងមិនមានផលជះជាវិជ្ជមានត្រឡប់មកវិញដោយមិនដឹងខ្លួន។ ការកាត់បន្ថយការរំខានជាច្រើនម៉ោងពីការប្រើស្រ្កីនដែលមិនចាំបាច់ ឬក៏ការប្រើប្រាស់បណ្តាញសង្គមតាមរយៈកម្មវិធីណាមួយ គឺជាការសន្សំថាមពល និងការផ្តោតទៅលើកិច្ចការដែលជាតម្រូវការចាំបាច់ដើម្បីបង្កើនផលិតភាព៕