ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ម្តងម្កាលគ្រប់គ្នាសុទ្ធតែស្ថិតក្នុងដំណាក់កាលមួយគឺការគិតច្រើនលើសលប់ ឬគិតលើសពីអ្វីដែលខ្លួនអាចគ្រប់គ្រងបាន ឬក៏ពេលខ្លះគ្រប់គ្រងបានតិចតួច យ៉ាងណាក៏ដោយការគិតអវិជ្ជមានយូរៗទៅ បានប៉ះពាល់ទៅកាន់សុខភាពផ្លូវចិត្ត និងផលអវិជ្ជមានយ៉ាងច្រើន។ តាមរយៈ Power of positivity បានប្រាប់អំពីវិធីសាស្រ្ត៣ចំណុច ក្នុងការទប់ស្កាត់កុំឱ្យគិតច្រើនហួសហេតុ និងការពង្រឹងនូវសុខភាពផ្លូវចិត្ត។
១. អនុវត្តន៍ភ្លាមៗនូវសកម្មភាពដែលពាក់ព័ន្ធនឹងការអប់រំចិត្ត ៖ រៀងរាល់ពេលដែលវិភាគ ឬសង្កេតឃើញថា ខ្លួនឯងកំពុងធ្លាក់ចូលស្ថានភាពនៃការគិតជ្រុលហួសហេតុពេក គួរអនុវត្តន៍សកម្មភាពបែបណាក៏បានឱ្យតែអាចសង្រួបសង្រួមចិត្តឱ្យស្ថិតក្នុងបច្ចុប្បន្នភាពវិញ តួយ៉ាងសកម្មភាពដែលគេដឹងជាទូទៅគឺការផ្តោតលើផ្លូវដង្ហើមខ្លួនឯង កត់សម្គាល់អំពីរូបភាពនិងសម្លេងដែលកើតមាននៅជុំវិញខ្លួន និងមានកត្តាជាច្រើនទៀតដែលលោកអ្នករកឃើញថា អាចផ្តល់ភាពងាយស្រួលទៅកាន់ខ្លួនឯងក្នុងការអនុវត្ត។
ការចាកចេញពីការគិតអំពីអតីតកាល ការគិតអវិជ្ជមាន និងការគិតទៅលើសកម្មភាពដែលខ្លួនគ្រប់គ្រងមិនបាន ពុំមែនជារឿងងាយស្រួលក្នុងការប្រត្តិបត្តិឱ្យទៅជាភាពវិជ្ជមានប៉ុន្មាននោះទេ ប៉ុន្តែការដាក់វិន័យខ្លួនឯងឱ្យអនុវត្តន៍សកម្មភាពដែលពាក់ព័ន្ធនឹងការអប់រំចិត្ត វានឹងបង្កើតបានទៅជាទម្លាប់មួយដែលពង្រឹងសុខភាពផ្លូវចិត្ត។
២. កំណត់ភ្លាមៗថា តើអ្វីទៅជាកត្តារាំងស្ទះមិនឱ្យគិតរឿងល្អៗបាន ៖ ការកំណត់អំពីបុព្វហេតុដែលបណ្តាលឱ្យគិតរឿងមិនល្អ គិតច្រើន ឬគិតលើសពីអ្វីដែលខ្លួនអាចគ្រប់គ្រងបាន គឺជាចំណែកក្នុងការកាត់បន្ថយ ឬជៀសវាង។ ការសិក្សាក៏បានបង្ហាញដែរថា ខួរក្បាលក្នុងមួយថ្ងៃៗផលិតការគិតរាប់ពាន់គំនិត រួមទាំងគិតអំពីបទពិសោធន៍ចាស់ៗទៀតផង! រួមទាំងការចាក់បញ្ចូលគំនិតបន្ថែមពីបណ្តាញសង្គមបច្ចុប្បន្ន រឹងរឹតតែធ្វើឱ្យមនុស្សកាន់តែច្របូកច្របល់ ពិបាកបែងចែកការគិតណាល្អ និងការគិតណាដែលមិននាំជាប្រយោជន៍ រួមទាំងបន្ថែមបាននូវភាពស្មុគស្មាញ។ មានតែការកំណត់ដឹងដោយខ្លួនឯងប៉ុណ្ណោះ ទើបអាចរកឃើញដំណោះស្រាយបានល្អ។
៣. រំខានខ្លួនឯងជាមួយនឹងរឿងដទៃ ៖ ខណៈដែលការគិតកាន់តែរវើរវាយ ហើយពិបាកក្នុងការគ្រប់គ្រងអ្វីដែលគួរសាកល្បងបន្ថែម គឺការរិះរកសកម្មភាពថ្មីៗដើម្បីធ្វើបន្លប់ ឬធ្វើឱ្យកើតជាប្រយោជន៍សម្រាប់បច្ចុប្បន្ន។ ការធ្វើសកម្មភាពបន្ថែមទៀតសោត គួរតែជាសកម្មភាពដែលផ្តល់នូវអារម្មណ៍ល្អ ឬឆ្លើយតបនឹងតម្រូវការប្រចាំថ្ងៃ ក៏ដូចជាសកម្មភាពដែលពុំធ្លាប់ធ្វើពីមុនៗជាដើម ដែលទាំងនេះជាវិធីសាស្រ្តកាត់បន្ថយការគិតច្រើនដែលមិនផ្តល់ប្រយោជន៍៕
