ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រៅពីការប្រើប្រាស់សម្ភារៈ ឯកសារ និងវិធីសាស្រ្តដែលមានស្រាប់ ការប្រមូល និងរៀបចំសៀវភៅរូបមន្តដោយខ្លួនឯង កែច្នៃទៅលើការរៀនសូត្រ ឧស្សាហ៍ពិនិត្យមើលលទ្ធផល និងការរៀបចំឡើងវិញសុទ្ធសឹងតែជាចំណែកពុំអាចខ្វះបាននៅក្នុងវិធីសាស្រ្តរៀបចំសម្ភារៈសិក្សា។
តាមរយៈគេហទំព័រ Moderndiplomacy បានលម្អិតបន្ថែមថា ការបង្កើតសម្ភារៈសិក្សា រៀបចំឯកសារ គឺជាជំហានដ៏សំខាន់មួយ ដើម្បីបង្កើនប្រសិទ្ធភាពសិក្សា និងបង្កើនភាពងាយស្រួល ដោយមានរៀបរាប់លម្អិតដូចតទៅ ៖
ការកំណត់ប្រធានបទជាគោល ៖ ដើម្បីសន្សំ ក៏ដូចជាការជ្រើសរើសម្ភារៈសិក្សាដែលឆ្លើយតបទៅនឹងតម្រូវការខ្លួនឯង ឬមុននឹងទៅហាងទិញសម្ភារៈសិក្សា ត្រូវកំណត់ទុកជាមុនថា អ្វីដែលជាសម្ភារៈសំខាន់ពុំអាចខ្វះបាន ហើយអ្វីដែលសិស្សអាចបង្កើតបានដោយខ្លួនឯង។ ការកំណត់ទុកជាមុន មិនត្រឹមតែរួមចំណែកដល់ការសន្សំពេល និងថវិកាប៉ុណ្ណោះទេ ប៉ុន្តែជាការរួមចំណែកដល់ការប្រើប្រាស់ធនធានឱ្យអស់ពីលទ្ធភាព ក៏ដូចជាការបង្កើនភាពច្នៃប្រតិដ្ឋ និងកាត់បន្ថយការទិញសម្ភារៈលើសលប់នាំឱ្យមានភាពស្មុគស្មាញបន្ថែម។ ឧទាហរណ៍ប្រភេទឯកសារខ្លះ មិនចាំបាច់ទិញជាសៀវភៅនោះទេ ពេលខ្លះអាចប្រើជាប្រភេទឯកសារ អេឡិចត្រូនិចក៏បាន រួមទាំងមានវិធីសាស្រ្តជាច្រើនទៀត អាស្រ័យលើស្ថានភាពមនុស្សម្នាក់ៗ។
ជ្រើសរើសសម្ភារៈមានគុណភាព ៖ ការជ្រើសសៀវភៅ ឯកសារ និងសម្ភារៈបន្ថែម ក៏ត្រូវមើលអំពីបច្ចុប្បន្នភាពថា តើទាន់ស្ថានការណ៍ ឬមានគុណភាពខ្ពស់កម្រិតណា? ទិញសៀវភៅបោះពុម្ពចុងក្រោយ ឬសម្ភារៈតែមួយ តែប្រើប្រាស់បានច្រើនដំណាក់កាល រួមទាំងការកែច្នៃអ្វីដែលមានឱ្យក្លាយតម្រូវការបច្ចុប្បន្ន។
ប្រើប្រាស់តាមដំណាក់កាល ៖ មិនថាឯកសារយោង និងសម្ភារៈបន្ថែមនោះទេ ការដាក់ឯកសារសិក្សាជាក្រុមៗ តាមលំដាប់លំដោយ បានផ្តល់ភាពងាយស្រួលនៅពេលដែលត្រូវការប្រើប្រាស់ និងជាការរួមចំណែកសន្សំពេលផងដែរ។
ការរៀបចំសម្ភារៈ ៖ ដើម្បីឱ្យការរៀបចំកាន់តែមានប្រសិទ្ធភាព ជាពិសេសឯកសារ ប្រសិនបើរកឃើញថា វាហួសសុពលភាព សូមកុំស្ទាក់ស្ទើរក្នុងការប្រមូលទុកកន្លែងដែលឆ្ងាយពីដៃ ឬប្រមូលបរិច្ចាគ ហើយបើនៅក្នុងឧបករណ៍អេឡិចត្រូនិច គួរណាស់តែលុបចោលតែម្តង។ ការផាត់ចេញរាល់ឯកសារដែលពុំចាំបាច់ វាផ្តល់ភាពលឿនរហ័សក្នុងការស្វែងរកឯកសារសំខាន់ៗ និងការចំណាយពេលតិច៕
