សហរដ្ឋអាមេរិកទំនងជានឹងធ្លាក់ចុះចំនួននិស្សិតអន្តរជាតិ ចន្លោះពី ៣០ ទៅ៤០ភាគរយ នៅរដូវស្លឹកឈើជ្រុះឆ្នាំនេះ ដែលបណ្ដាលឱ្យខាត់បង់ទឹកប្រាក់ប្រមាណ ៧ពាន់លានដុល្លារអាមេរិក និងការងារជាង ៦ម៉ឺនកន្លែង, នេះបើយោងតាមការស្រាវជ្រាវថ្មីមួយ​ដែលធ្វើឡើងដោយសមាគមអ្នកអប់រំអន្តរជាតិ (NAFSA)។

សមាគមអ្នកអប់រំអន្តរជាតិ (NAFSA) និង JB International ដែលជាដៃគូបច្ចេកវិទ្យាអប់រំអន្តរជាតិបង្ហាញថា សកម្មភាពថ្មីៗដូចជា ការហាមប្រាមទិដ្ឋាការ និងការរំខាន ក្នុងការសម្ភាសន៍ ដើម្បីទទួលបានទិដ្ឋាការ អាចប៉ះពាល់យ៉ាងខ្លាំង ដល់សេដ្ឋកិច្ចអាមេរិក។

នៅក្នុងការវិភាគចុងក្រោយរបស់ពួកគេ NAFSA ដែលជាអង្គការមិនរកប្រាក់ចំណេញ និង JB International បានពិនិត្យទិន្នន័យ ពីប្រព័ន្ធព័ត៌មានសិស្ស និងការផ្លាស់ប្តូរអ្នកទស្សនា (SEVIS) និងក្រសួងការបរទេស។

លោកស្រី Fanta Aw នាយកប្រតិបត្តិ និងជានាយកប្រតិបត្តិនៃ NAFSA បាននិយាយនៅក្នុងសេចក្តីថ្លែងការណ៍មួយនៅលើគេហទំព័ររបស់អង្គការនេះថា «ការវិភាគនេះជាលើកដំបូង ដែលគណនាអំពីផលប៉ះពាល់នៃសក្តានុពលសេដ្ឋកិច្ច ដែលបណ្ដាលមកពីចំនួននិស្សិតអន្តរជាតិតិចជាងមុននៅតាមទីក្រុង និងទីប្រជុំជនទូទាំងប្រទេស ហើយរឿងនេះគួរតែអំពាវនាវឱ្យមានការបញ្ជាក់ទៅកាន់ក្រសួងការបរទេសថា ក្រសួងត្រូវធ្វើសកម្មភាពដើម្បីធានាថានិស្សិត និងបញ្ញាវន្តអន្តរជាតិ នឹងបន្តការសិក្សានៅអាមេរិកនៅរដូវស្លឹកឈើជ្រុះឆ្នាំនេះ។»

យោងតាមការស្រាវជ្រាវ ការផ្អាកការសម្ភាសន៍ទិដ្ឋាការរបស់ក្រសួងការបរទេសចាប់ពីថ្ងៃទី២៧ ខែឧសភា ដល់ថ្ងៃទី១៨ ខែមិថុនា រួមជាមួយនឹងនីតិវិធីពិនិត្យសុខភាពថ្មី បានបណ្តាលឱ្យមានការពន្យារពេលនៅស្ថានទូតអាមេរិកទូទាំងពិភពលោក ដែលនេះជាហេតុផលចម្បងមួយ បណ្ដាលឱ្យថយចុះអត្រានិស្សិតអន្តរជាតិចុះឈ្មោះចូលរៀន។

និស្សិតមកពីទីផ្សារសំខាន់ៗមានដូចជា ឥណ្ឌា ចិន នីហ្សេរីយ៉ា និងជប៉ុន បង្ខំចិត្តបោះបង់គម្រោងបន្តការសិក្សានៅអាមេរិកឆ្នាំនេះ។ ក្នុងនោះប្រទេសឥណ្ឌា និងចិន មានរហូតដល់ ៥៤ភាគរយ បានថយចុះបើធៀបទៅនឹងឆ្នាំមុន ខណៈដែលនីហ្សេរីយ៉ា និងជប៉ុនស្ថិតនៅចំណាត់ថ្នាក់ទី៧ និងទី១៣ រៀងគ្នា។

លើសពីនេះទៀត ការរឹតបន្តឹងដែលបានប្រកាសតាមរយៈបទបញ្ជាប្រតិបត្តិនៅថ្ងៃទី៤ ខែមិថុនា ឆ្នាំ២០២៥ ប៉ះពាល់ដល់ប្រទេសចំនួន ១៩ ហើយអាចបន្ថែម ៣៦ប្រទេសទៀត ដែលអាចខាតបង់ទឹកប្រាក់ ៣ពាន់លានដុល្លារក្នុងមួយឆ្នាំៗ និងលុបបំបាត់ការងារនៅអាមេរិកជាង ២ម៉ឺន ៥ពាន់កន្លែង៕