ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការដើរប្រមាណបួនពាន់ជំហាន (៤,០០០) ក្នុងមួយថ្ងៃ អាចសម្រួសដល់ការកាត់បន្ថយបញ្ហាសុខភាព និងបញ្ចៀសហានិភ័យនានា នេះបើតាម លោក Maciej Banach អ្នកជំនាញខាងសុខភាពបេះដូង។ កត្តានេះហើយបង្ហាញឱ្យឃើញថា សម្រាប់អ្នកមិនមានទម្លាប់ទៅហាត់ប្រាណជាប្រចាំ ក៏អាចប្រើប្រាស់វិធីសាស្រ្តងាយៗ តាមរយៈការដើរ និងអាចធ្វើឱ្យសុខភាពរឹងប៉ឹងបានដែរ។
នៅក្នុងគេហទំព័រ knowridge បានបកស្រាយបន្ថែមថា ដើម្បីចូលរួមចំណែកកាត់បន្ថយហានិភ័យនៃការកើតមានជំងឺបេះដូង ដំបូងៗ គួរតែដាក់គោលដៅត្រឹមតែ ពីរពាន់បីរយ (២,៣០០) ជំហានសិន។ បន្តិចម្តងៗ លោកអ្នកនឹងឃើញពីលទ្ធផលយ៉ាងអនេក រួមទាំងមានលទ្ធភាព នៃការបង្កើនជំហានជាបន្តបន្ទាប់។ កាលណាជំហាននៃការដើរ កាន់តែកើនឡើងពីមួយថ្ងៃទៅមួយថ្ងៃ នោះក៏បង្ហាញឱ្យឃើញពីប្រសិទ្ធភាព នៃលទ្ធផលពីការដើរផងដែរ។ បន្ថែមត្រឹមមួយពាន់ជំហានក្នុងមួយថ្ងៃ ក៏អាចកាត់បន្ថយហានិភ័យនៃការបាត់បង់ជីវិតមុនអាយុបានរហូតទៅដល់១៥ភាគរយ។ ទម្លាប់ដើរឱ្យបានច្រើនឆ្លើយតបទៅនឹងមនុស្សគ្រប់វ័យ មិនថាចាស់ ឬក្មេងនោះទេ។ ការដើរ គេអាចធ្វើបានគ្រប់ទីន្លែង គ្រប់តំបន់ រួមទាំងផ្តល់ប្រសិទ្ធភាពខ្ពស់ទៀតផង។
គិតទូទាំងពិភពលោក មានមនុស្សមួយចំនួនមិនបានធ្វើចលនារាងកាយ ឱ្យបានទៀតទាត់ទេ នៅពេលរាងកាយមិនទទួលបានការថែទាំបានត្រឹមត្រូវ គឺជាហេតុបណ្តាលឱ្យមានផលប៉ះពាល់ជាច្រើនទៅកាន់សុខភាព ដូចជា ប្រឈមនឹងជំងឺបេះដូង និងផលវិបាកដទៃទៀត បូករួមទាំងសុខភាពផ្លូវចិត្ត និងផ្លូវកាយ បញ្ហានេះដែរ កើតឡើងជាពិសេសនៅប្រទេសដែលមានជីវភាពល្អ និងកើតមានចំពោះស្រ្តី។
ទម្លាប់នៃការទុកឱ្យរាងកាយ មិនធ្វើសកម្មភាពបានច្រើន មានជាប់ទាក់ទងនឹងការបាត់បង់ជិវិតមនុស្សជាងបីលាននាក់ជារៀងរាល់ឆ្នាំ។ ដែលជាហេតុបង្ហាញឱ្យឃើញថា ការហាត់ប្រាណ ការដើរចលនា គឺជាចំណែកដ៏សំខាន់ដើម្បីជំរុញសុខភាពឱ្យកាន់តែរឹងមាំ។
ការដើរឱ្យបានជាប្រចាំ មិនត្រឹមតែផ្តល់គុណតម្លៃទៅកាន់សុខភាពប៉ុណ្ណោះទេ ប៉ុន្តែជាការចំណាយតិចក្នុងផែនការទ្រទ្រង់សុខភាព និងការពន្យារយៈពេលនៃការរស់នៅបានយូរជាងមុន រួមទាំងជាការបង្ហាញអំពីការគិតគួរបានវែងឆ្ងាយសម្រាប់អនាគត៕
