ការមានគោលដៅសម្រាប់ជីវិត ឬអាជីពរយៈពេលវែង អាចផ្ដល់ឱ្យអ្នកនូវទិសដៅ ការជំរុញទឹកចិត្ត និងការពេញចិត្តចំពោះការងារ។ ប៉ុន្តែ​តើ​អ្នក​អាច​ប្រែក្លាយ​ចក្ខុវិស័យ​នោះ​ទៅ​ជា​ការពិត​ដោយ​របៀបណា? ការបំបែកគោលដៅរបស់អ្នកទៅជាជំហានតូចៗដែលអ្នកអាចសម្រេចបាន អាចជួយអ្នករៀបចំផែនការ កំណត់អាទិភាព និងអាចវាស់វែងនូវអ្វីដែលអ្នកចង់សម្រេចឱ្យបានជោគជ័យ។ នេះគឺជាគន្លឹះចំនួន ៦ ដែលអ្នកអាចអនុវត្ត ដើម្បីសម្រេចគោលដៅប្រក​បដោយប្រសិទ្ធភាព។

១. កំណត់គោលដៅរបស់អ្នក ៖ ជំហានដំបូងគឺត្រូវកំណត់គោលដៅអាជីពរយៈពេលវែងរបស់អ្នកឱ្យបានច្បាស់លាស់ និងជាក់លាក់។ តើមុខតំណែង តួនាទី ឬមុខងារអ្វី ដែលអ្នកចង់បានក្នុងរយៈពេលប្រាំ ដប់ ឬម្ភៃឆ្នាំខាងមុខ? តើគោលដៅនោះ ស្របគ្នានឹងគុណតម្លៃ ចំណង់ចំណូលចិត្ត និងភាពខ្លាំងរបស់អ្នកដែរឬទេ? តើអ្វីជាអត្ថប្រយោជន៍ និងបញ្ហាប្រឈមនៃការបន្តគោលដៅនេះ? ចូលសរសេរគោលដៅរបស់អ្នកចូលក្នុងក្រដាស និងអានវាសារចុះសារឡើងជារាងរាល់ថ្ងៃ។

២. គូសផែនទីចំណុចសំខាន់ៗ ៖ ជំហានបន្ទាប់ត្រូវកំណត់អត្តសញ្ញាណសំខាន់ៗ ដែលអ្នកចាំបាច់ត្រូវសម្រេចនៅចន្លោះពេលដែលអ្នកឆ្ពោះទៅរកគោលដៅរបស់អ្នក។ លទ្ធផលនៃចំណុចសំខាន់ៗទាំងនោះ នឹងធ្វើឱ្យអ្នកដឹងថា ជីវិតអ្នកកំពុងរីកចម្រើន និងកំពុងដើរលើផ្លូវត្រូវ។ ឧទាហរណ៍ថា ប្រសិនបើគោលដៅរបស់អ្នក ចង់ក្លាយជាអ្នកគ្រប់គ្រងជាន់ខ្ពស់ ព្រឹត្តិការណ៍ ឬចំណុចសំខាន់ៗដែលអ្នកត្រូវសម្រេច​ គឺ ការឡើងដំណែង ការបញ្ចប់វគ្គបណ្ដុះបណ្ដាលភាពជាអ្នកដឹកនាំ ឬបញ្ចប់វគ្គគ្រប់គ្រងគម្រោងជាដើម។ អ្វីដែលរឹតតែសំខាន់នោះគឺ អ្នកត្រូវគិតអំពីជំនាញ ចំណេះដឹង និងបទពិសោធន៍ ដែលអ្នកត្រូវការ ដើម្បីឈានទៅដល់ដំណាក់កាលនីមួយៗ។

៣. បំបែកចំណុចសំខាន់ៗជាសកម្មភាពតូចៗ ៖ ជំហានទីបី គឺត្រូវបំបែកដំណាក់កាលនីមួយៗទៅជាកិច្ចការតូចៗ និងអាចគ្រប់គ្រងបាន។ ឧទាហរណ៍ថា ប្រសិនបើសកម្មភាពធំ និងសំខាន់របស់អ្នកត្រូវធ្វើ គឺបញ្ចប់វគ្គសិក្សាភាពជាអ្នកដឹកនាំ មានន័យថា សកម្មភាពតូចៗដែលអ្នកត្រូវធ្វើមានដូចជា ការស្រាវជ្រាវអំពីវគ្គសិក្សាដែលល្អបំផុតសម្រាប់អ្នក ការដាក់ពាក្យចូលរៀន សម្ភារៈសិក្សា និងការប្រឡង។ ក្នុងជំហានទីបីនេះ ការកំណត់កាលបរិច្ឆេទ និងអាទិភាពចំពោះការងារនីមួយៗ គឺរឿងសំខាន់។ លើសពីនេះ អ្នកត្រូវតាមដានអ្វីដែលអ្នកសម្រេចបានជាប្រចាំ។

៤. ពិនិត្យ និងកែសម្រួល ៖ នៅពេលដែលអ្នកអនុវត្តផែនការ ដែលអ្នកបានរៀបចំនោះ អ្នកនឹងជួបប្រទះនូវឱកាសថ្មីៗ ឧបសគ្គ ឬក៏មតិកែលម្អផ្សេងៗ ដែលមានឥទ្ធិពលលើគោលដៅរបស់អ្នក។ លើសពីនេះ អ្នកក៏អាចរកឃើញចំណង់ចំណូលចិត្តថ្មីៗ របៀបគិតថ្មីៗ ឬក៏អាជីព ដែលផ្លាស់ប្តូរការរំពឹងទុករបស់អ្នកជាដើម។ ដូច្នេះ ទាមទារឱ្យអ្នកមានភាពបត់បែន និងមានឆន្ទៈក្នុងការកែសម្រួលផែនការរបស់អ្នកទៅតាមកាលៈទេសៈជាក់ស្ដែង។ អ្វីដែលរឹតតែសំខាន់នោះគឺ ត្រូវហ៊ានសាទរនឹងសមិទ្ធផល ហើយរៀនសូត្រពីភាពបរាជ័យរ​បស់ខ្លួន។

៥. ស្វែងរកការគាំទ្រ ៖ ការស្វែងរកការគាំទ្រពីអ្នកដទៃ ដែលអាចជួយអ្នកឱ្យសម្រេចបាននូវគោលដៅរបស់អ្នក គឺជាចំណុចសំខាន់។ ការគាំទ្រនេះទៀតសោត អ្នកអាចស្វែងរកពី អ្នកណែនាំ (Mentor) មិត្តភក្តិ គ្រួសារ ឬក្រុមការងារជាដើម ហើយពួកគេក៏អាចផ្ដល់ការណែនាំ មតិកែលម្អ ដំបូន្មាន ឬការលើកទឹកចិត្តអ្នកផងដែរ។ លើសពីនេះ អ្នកអាចភ្ជាប់ទំនាក់ទំនងជាមួយបុគ្គល ដែលមានគោលដៅស្រដៀងគ្នា​ ឬបំពេញគ្នាទៅវិញទៅមកជាមួយអ្នក ហើយអាចចែករំលែកបទពិសោធន៍ ចំណេះដឹង និងធនធានសម្រាប់អ្នក។

៦. រីករាយជាមួយនឹងដំណើរឆ្ពោះទៅរកគោលដៅរបស់អ្នក ៖ ខណៈពេលដែលអ្នកកំពុងផ្ដោតទៅលើគោលដៅ ដែលអ្នកត្រូវសម្រេច អ្នកក៏ត្រូវរីករាយជាមួយនឹងដំណើរ​នៃការឆ្ពោះទៅរកគោលដៅដូចគ្នា។ ទទួលស្គាល់សមិទ្ធផល មិនថាតូច ឬធំ ហើយផ្ដល់រង្វាន់សម្រាប់ខ្លួនឯង ចំពោះការខិតខំប្រឹងប្រែង។ ម្យ៉ាងទៀត អ្នកត្រូវព្យាយាមរក្សាតុល្យភាពរវាងការងារ ជីវិតផ្ទាល់ខ្លួន និងសុខុមាលភាពឱ្យបានល្អ៕