ក្ដីរំពឹងជារួម ពីការរៀនជំនាញ ឬមុខវិជ្ជាណាមួយ គឺជាការទទួលបានឱកាសការងារល្អ ការដុសខាត់ជំនាញដើម្បីពង្រឹងខ្លួនឯង និងការរំពឹងទុកអំពីភាពរីកចម្រើនជាច្រើនទៀត។ ប៉ុន្តែតើក្រៅពីជំនាញដែលខិតខំពីសាលា នៅមានអ្វីដែលជាភាពចាំបាច់បន្ថែមទៀត?

តាមរយៈគេហទំព័រ Teen Life បានឱ្យដឹងត្រួសៗក្នុងការពន្លឿន ឬបន្ថែមភាពជោគជ័យ និងឱ្យឆ្លើយតបការចង់បានក្នុងនាមជានិស្សិត​ ឬអ្នកសិក្សាជំនាញ ដែលមានរៀបរាប់ខាងក្រោមនេះ ៖

គ្រប់គ្រងពេលវេលា ៖ កំឡុងពេលសិក្សាជំនាញ និងមហាវិទ្យាល័យ តម្រូវឱ្យមានភាពច្បាស់លាស់លើការគ្រប់គ្រងពេលជាងនៅកម្រិតវិទ្យាល័យ។ ព្រោះនៅវិទ្យាល័យផ្តោតលើទម្លាប់ល្អ​ និងការខិតខំយកលទ្ធផល​​ ប៉ុន្តែនៅជំហានបន្ទាប់តម្រូវឱ្យមានទំនួលខុសត្រូវលើជីវិតខ្លួនឯងបន្ថែម​ ហើយទំហំ នៃការធ្វើការងារសាលាក៏តម្រូវឱ្យមានឯករាជ្យភាពខុសពីមុន ជួនកាលត្រូវធ្វើការថែមម៉ោងបន្ថែមទៀត ដែលមានទាំងរបៀបជ្រើសរើសការងារ ការកំណត់អាទិភាព និងកាត់ចោលនូវសកម្មភាពដែលពុំចាំបាច់ជាដើម ធ្វើយ៉ាងណាមានពេលគ្រប់គ្រាន់ក្នុងការអាន ឬក៏រំលឹកមេរៀនមុនពេលចាប់ផ្តើមថ្ងៃថ្មី។

កំណត់គោលដៅ ៖ គោលបំណងរៀនជំនាញមានរួចហើយ ប៉ុន្តែព្រមជាមួយគ្នានោះ ក៏ត្រូវការឱ្យមានការកំណត់ជាបន្តបន្ទាប់ផងដែរ រួមទាំងដាក់និយមន័យឱ្យច្បាស់ៗ មិនថាគោលដៅនៃការសិក្សា គោលដៅការងារដែលពាក់ព័ន្ធ រួមទាំងគោលដៅផ្ទាល់ខ្លួនជាដើម។​ ការកំណត់ទាំងនេះជាការបង្ខិតក្ដីរំពឹង និងបង្កើនការជំរុញចិត្តឱ្យជ្រើសរើសតែសកម្មភាពដែលឆ្លើយតបនឹងតម្រូវការ។

ទំនាក់ទំនង ៖ ការទំនាក់ទនងត្រង់ចំណុចនេះ ចង់សំដៅជារួមទៅលើការ​រួមគ្នាដោះស្រាយបញ្ហា យោគយល់ ពង្រឹងចំណងមិត្តភាពជាមួយក្រុមដែលមានស្រាប់ រួមទាំងការស្វែងរកឱកាសបន្ថែមក្នុងការបង្កើតទំនាក់ទំនងជាមួយមនុស្សដែលមកពីប្រភពផ្សេងគ្នា​។ មិនថានៅក្នុងជំនាញមួយ ឬក៏មុខវិទ្យាមួយនោះទេ​ ត្បិតនៅក្នុងក្រុម ឬក្នុងថ្នាក់ទទួលបានការបណ្តុះបណ្តាលសិស្សឱ្យមានសមត្ថភាព​ប្រហាក់ប្រហែលគ្នា​ ប៉ុន្តែការមានជំនាញបន្ថែមក្នុងការប្រាស្រ័យទាក់ទងជាមួយមនុស្សដែលមកពីចម្រុះសហគមន៍ ឬជាតិសាសន៍បានបង្កើនភាពងាយស្រួល និងវិសាលភាពនៃព័ត៌មានបន្ថែមទៅក្នុងដំណើរនៃការសិក្សា ក៏ដូចជាការឆ្ពោះទៅរកអាជីពវិជ្ជាជីវៈ។

បង្កើតបណ្តាញ ៖ ក្រៅពីការផ្តោតលើការរៀនសូត្រ ការមានពេលក្នុងការកសាងបណ្តាញបន្ថែម ក៏បានរួមចំណែកយ៉ាងសំខាន់ក្នុងការរក្សាតុល្យភាពជីវិត​ និងការពង្រីកវិសាលភាពឱកាស ដែលមានដូចជា ការលេងហ្គេមនៅសាលា ការទទួលទានអាហារសាមគ្គី ការលេងកីឡា ធ្វើការងារក្រៅម៉ោង ឬក៏សកម្មភាពទាំងឡាយណាដែលរួមចំណែកទៅកាន់ការផ្សារភ្ជាប់ទំនាក់ទំនង ដូចជាចូលរួមក្នុងក្លឹបសិក្សា វគ្គចែកចំរំលែកចំណេះដឹង និងការអានជាដើម។

ឯករាជ្យក្នុងការសិក្សា ៖ ជាធម្មតានៅក្នុងថ្នាក់មានការបង្រៀន​ ឬក៏កន្លែងសម្រាប់សាកល្បង និងអនុវត្តន៍មួយចំនួន ប៉ុន្តែការចំណាយពេលសិក្សាបន្ថែមប្រកបដោយឯករាជ្យភាព បានដើរតួនាទីសំខាន់ក្នុងការពង្រឹងសមត្ថភាព​ ក៏ដូចជាការបណ្តុះភាពធន់ និងវិន័យចំពោះខ្លួនឯង។ ដោយចំណាយពេលយ៉ាងហោចណាស់ ២០​ ទៅ​ ៣០​ នាទីក្នុងការសិក្សាស្វែងយល់បន្ថែមមុនពេលថ្នាក់រៀនចាប់ផ្តើម។

ការរៀបចំហិរញ្ញវត្ថុ ៖ ការរៀបចំលុយកាក់ អាចថាជាជំនាញដែលត្រូវការវិភាគយ៉ាងស៊ីជ្រៅមួយផ្នែកដែរ តែទោះជាស្ថិតនៅក្នុងវ័យណាក៏ដោយ ក៏អាចចាប់ផ្តើមវិភាគ និងសិក្សាបន្ថែមបានដែរ។ ប្រសិនបើរកបានប្រាក់ចំណូលបន្ថែមតាមរយៈការងារក្រៅម៉ោង ទោះតិច ឬច្រើន ត្រូវរៀបនិងបែងចែក ព្រោះវាជាចំណែកមួយដែលបង្កភាពងាយស្រួលនៅពេលខាងមុខ។ ការបែងចែក គឺទៅតាមស្ថានភាពជាក់ស្តែង ប៉ុន្តែចាំបាច់ត្រូវតែមានចំណែកសន្សំ ព្រោះទម្លាប់នៃការសន្សំមិនត្រឹមតែបន្សល់នូវថវិកាប៉ុណ្ណោះទេ ប៉ុន្តែបង្កើនបាននូវភាពអត់ធ្មត់ វិន័យ និងការរៀបចំ៕