ក្រោកពីគេង ដោយអារម្មណ៍មានកម្លាំងថាមពល បានជះឥទ្ធិពលល្អ ក្នុងរយៈពេលពេញមួយថ្ងៃ ។ ការយកចិត្តទុកដាក់ជាមួយនឹងអារម្មណ៍ខ្លួនឯងនៅពេលព្រឹក ប្រៀបដូចជា ការគិតគូរអំពីផលិតភាពការងារ ក៏ដូចជាការសិក្សា។ ដូច្នេះគួរឆ្លៀតពេលថែទាំខ្លួន ដើម្បីឱ្យប្រាកដថា ការចំណាយពេលពេញមួយថ្ងៃរបស់អ្នក មានប្រសិទ្ធភាពទៅតាមការកំណត់។ យោងតាមគេហទំព័រ everydayhealth បានបង្ហាញគន្លឹះប្រាំពីរចំណុច ដែលអ្នកចិត្តសាស្រ្តតែងអនុវត្តន៍ និងលើកទឹកចិត្តឱ្យមនុស្សឯទៀតធ្វើនាពេលព្រឹកព្រលឹម មុនពេលចាប់ផ្តើមការងារនាថ្ងៃបន្ទាប់។

១. គិតអំពីអ្វីដែលត្រូវការបន្ថែម ៖ ក្រោកពីគេងរួចភ្លាម គួរទុកចន្លោះពេលវេលាខ្លះ និងដកដង្ហើមឱ្យវែងៗ ដើម្បីអង្គុយគិត អំពីសកម្មភាពដែលត្រូវសម្រេច និងតម្រូវការផ្ទាល់ខ្លួន ឬការងារឱ្យបានយ៉ាងហោចណាស់បីចំណុច គឺដើម្បីសម្រួចគោលដៅ ឱ្យកាន់តែមុតមាំបន្ថែមទៀត ព្រមទាំងកាត់បន្ថយភាពស្មុគស្មាញលើកិច្ចការដែលមិនចាំបាច់។

២. បិទសម្លេងសារក្នុងទូរស័ព្ទដៃ ៖ ចាប់ផ្តើមអនុវត្តន៍ ដោយការបិទសម្លេងរំខាននៅលើអេក្រង់អេឡិចត្រូនិច ជាពិសេសក្នុងទូរស័ព្ទដៃ គិតចាប់ពីពេលចូលគេង ឬក៏កំណត់ឱ្យជាក់លាក់តែម្តង ចាប់ពីម៉ោង១០យប់ រហូតដល់ម៉ោង៨ព្រឹក ដោយមិនឆែកសារអ្វីទាំងអស់នៅលើទូរស័ព្ទ។

៣. ធ្វើសកម្មភាពល្អៗមុនពេលចូលគេង ៖ បង្កើតទម្លាប់ល្អៗ ឬសកម្មភាពវិជ្ជមានមុនពេលចូលគេងប្រៀបដូចជា ការរៀបចំបង្កើតឱ្យមានថ្ងៃថ្មីល្អៗ ដូច្នោះដែរ តាមរយៈសកម្មភាពដូចជា អានសៀវភៅ ហាត់ប្រាណតិចៗ មើលកាលវិភាគ និងធ្វើបច្ចុប្បន្នភាពប្រចាំថ្ងៃ ឬក៏និយាយពាក្យល្អៗលើកទឹកចិត្តជាដើម ព្រមទាំងសកម្មភាពទាំងឡាយណាដែលផ្តល់នូវភាពរីករាយ និងភាពវិជ្ជមានទៅកាន់ការរស់នៅ។

៤. លំហាត់ប្រាណសាមញ្ញៗនៅតាមដងផ្លូវ ៖ ក្រោកពីគេងហើយ ទៅដើរ ឬរត់នៅតាមដងផ្លូវ បានជំរុញឱ្យសុខភាពផ្លូវចិត្តរឹងមាំ និងការផ្តោតសតិបានមួយផ្នែកដែរ ដូច្នេះគួរពង្រឹងឱ្យក្លាយជាទម្លាប់ យ៉ាងហោចណាស់១០នាទីក្នុងមួយថ្ងៃ ប៉ុន្តែក៏ត្រូវគិតគួរអំពីសុវត្ថិភាពដែរ។

៥. ធ្វើយូហ្កា ៖ ចំណាយពេលត្រឹមតែ១៥នាទី ក្នុងការធ្វើយូហ្កាឱ្យបានទៀងទាត់រៀងរាល់ព្រឹក ក៏អាចជួយឱ្យការចាប់ផ្តើមថ្ងៃថ្មី ប្រកបដោយសិរីសួស្ដីបានដែរ។ បើមិនដឹងថាត្រូវចាប់ផ្តើមដោយរបៀបណា លោកអ្នកអាចល្បងមើលនិងរៀនតាម អ៊ីនធឺណិត យូធូប ឬសួរយោបល់ពីអ្នកមានបទពិសោធន៍ ។ ស្វែងរកព័ត៌មានមូលដ្ឋានគ្រឹះជាមុនសិន សឹមចាប់ផ្តើមធ្វើ នេះបើក្នុងករណីលោកអ្នកមិនធ្លាប់បានធ្វើពីមុនមក។

៦. ផ្លាស់ប្តូរទៅរកអ្វីដែលមានន័យ ៖ ផ្លាស់ប្តូរ ជាចំណុចសំខាន់ ប៉ុន្តែរាល់ការផ្លាស់ប្តូរទម្លាប់ទៅរកអ្វីមួយ ត្រូវប្រាកដថា សកម្មភាពដែលធ្វើថ្មីនោះ ផ្តល់នូវភាពវិជ្ជមានទៅកាន់ខ្លួនឯង។ ឧទាហរណ៍ ដូចជាទម្លាប់ធ្វើយូហ្កាពី១០នាទី ទៅ២៥នាទី ឬក៏ប្តូរទម្លាប់ទៅជាដើហាត់ប្រាណជាមួយអ្នកជិតខាង ឬបន្ថែម៤៥នាទីជាដើម។ ជារួមមានន័យថា រាល់សកម្មភាពដែលោកអ្នកផ្លាស់ប្តូរ គឺដើម្បីឱ្យមានការផ្តោតជាមួយនឹងខ្លួនឯងច្រើនជាងមុន។

៧. ផ្ទៀតផ្ទាត់ខ្លួនឯង ៖ រៀងរាល់ពេលដែលចាប់ផ្តើមធ្វើសកម្មភាពនៅថ្ងៃថ្មី គួរតែពិនិត្យនិងផ្ទៀងផ្ទាត់ និងពិនិត្យខ្លួនឯងទាំងសុខភាពរាងកាយផ្លូវចិត្ត តាមរយៈការបំផុសសំណួរ ដូចជា តើខ្ញុំកំពុងតែធ្វើអ្វី? អារម្មណ៍របស់ខ្ញុំបច្ចុប្បន្ននេះយ៉ាងម៉េចដែរ? បន្ទាប់មក សរសេរចម្លើយ និងកត់សម្គាល់ទៅកាន់ខ្លួនឯង ជាជាងការគិតបន្ទោសអំពីសកម្មភាពអ្នកដទៃធ្វើមិនគប្បីចំពោះខ្លួនឯង។ តែយ៉ាងណាការផ្លាស់ប្តូរទម្លាប់ល្អប្រចាំថ្ងៃដោយភាពវិជ្ជមាន ឬអារម្មណ៍ល្អនៅពេលព្រឹក មិនមែនប្រើពេលមួយថ្ងៃក្នុងការសម្រេចនោះទេ គឺត្រូវការកត់សម្គាល់  អត់ធ្មត់ និងសេចក្ដីព្យាយាម៕