ការរៀបចំទម្លាប់រស់នៅសម្រាប់ពេលព្រឹកព្រលឹម អាចជួយ​យើង​ក្នុង​ការ​កាត់បន្ថយភាពតប់ប្រមល់ បង្កើនភាពស្រស់បស់ ជាចំណែកជំរុញផលិតភាពការងារក៏ដូចជាការសិក្សា និងអភិវឌ្ឍន៍សុខភាពផ្លូវចិត្ត។  គេហទំព័រ homesandgardens បានបង្ហាញគន្លឹះមួយចំនួន ដើម្បីឆ្លើយតបនឹងការ រក្សាទម្លាប់ល្អពេលព្រឹក ដែលមានរៀបរាប់លម្អិតដូចតទៅ៖

១. រៀបចំសម្លៀកបំពាក់ទុកពីល្ងាចឱ្យហើយ ៖ សម្រាប់អ្នកធ្វើការ អ្នកសិក្សា ឬក៏មានកិច្ចប្រជុំនានា ភាគច្រើនគឺត្រូវការសម្លៀកបំពាក់ដែលស្របទៅនឹងស្ថានភាព នីមួយៗ ដែលចំណុចទាំងនេះហើយ ចាំបាច់ត្រូវប្រើពេលគិត ក្នុងការរៀបចំ ដោយមិនប្រញាប់ប្រញាល់ពេកឡើយ។ ដូច្នេះបើសិនជាបានរៀបចំទុកដាក់រួចស្រេចតាំងពីល្ងាច វាជាគន្លឹះកាត់បន្ថយភាពមមាញឹក នៅពេលព្រឹកព្រលឹមបានមួយផ្នែកដែរ។ ម្យ៉ាងវិញទៀត កត្តានេះក៏ផ្តល់ឱកាសឱ្យលោកអ្នក អាចពិនិត្យបានល្អិតល្អន់ រក្សាអនាម័យខោអាវ និងកាត់ចោលនៅអ្វីដែលមិនចាំបាច់។

២. ប្រើប្រាស់គ្រឿងសង្ហារិមដើម្បីទុកដាក់របស់រប ៖ ប្រសិនបើលោកអ្នក ចូលចិត្តឆុងកាហ្វេនៅផ្ទះដោយខ្លួនឯងគឺជារឿងមួយល្អហើយ ប៉ុន្តែទន្ទឹមគ្នានោះ សម្ភារៈដែលត្រូវប្រើប្រាស់កំប៉ិកកំប៉ុកទាំងឡាយក៏កាន់តែកើនមានដូចគ្នា។ ដូច្នេះកាលដែលមានទូរសម្រាប់ដាក់គ្រឿងឆុងកាហ្វេឬទុកដាក់សម្ភារៈផ្សេងៗ ជាវិធីមួយជួយកាត់បន្ថយការចំណាយពេលច្រើន នាព្រឹកព្រលឹមបានដែរ។

៣ . រក្សាផលិតផលថែទាំស្បែកនៅមួយកន្លែងតែមិនមែនដាក់ក្នុងបន្ទប់ទឹក ៖ ប្រសិនបើលោកអ្នក ជាមនុស្សដែលមិនចូលចិត្តឱ្យមានសម្ភារៈច្រើននៅក្នុងផ្ទះ នោះលោកអ្នកអាចកាត់ចោលចំណុចមួយនេះក៏បានដែរ។ បច្ចុប្បន្នផលិតផល មានច្រើនប្រភេទណាស់ ដែលមនុស្សជ្រើសយកមកប្រើប្រាស់។ តែយ៉ាងណា មិនថាវាមានច្រើនម៉ូតប៉ុន្មាននោះទេ សូមរក្សាវាទុកនៅមួយកន្លែង ប៉ុន្តែមិនគួរទុកនៅក្នុងបន្ទប់ទឹកនោះទេ ព្រោះវានាំឱ្យខូចគុណភាព និងឆ្លងមេរោគ ហើយក៏អាចប៉ះពាល់ទៅកាន់ ការរស់នៅប្រចាំថ្ងៃផងដែរ។

៤. ទុកចន្លោះនិងមានក្ដីមេត្តាចំពោះខ្លួនឯង ៖ ចំណុចនេះស្ដាប់មើលទៅហាក់ចម្លែកបន្តិច ប៉ុន្តែវាពិតជាសំខាន់ចំពោះខ្លួនឯង ដោយហេតុថា ប្រសិនបើមិនអាចអនុវត្តន៍បានភ្លាមៗទាំងស្រុង ក៏ពុំគួរបង្ខំខ្លួនឯងពេកនោះដែរ ពីព្រោះការកែប្រែអ្វីមួយ គឺត្រូវការពេលវេលាជាចាំបាច់៕