នៅក្នុងបរិយាកាសការងារមមារញឹក លំហូរការងារតែងផ្លាស់ប្ដូរ និងប្រែប្រួលគ្រប់ពេល ដែលតម្រូវឱ្យអ្នកមានសមត្ថភាពខ្ពស់ក្នុងការសម្របខ្លួនទៅក្នុងបរិយាកាស ឬកាលៈទេសៈថ្មីៗ ដែលកើតមានជាប្រចាំ។ ក្នុងបរិយាកាសការងារបែបនេះ អ្នកអាចនឹងមានភាពមមាញឹក និងតានតឹងច្រើន ដែលទាមទារឱ្យមានការកំណត់គោលដៅច្បាស់លាស់ ការខិតខំប្រឹងប្រែងធ្វើការខ្លាំង ការអំណត់ ការតាំងចិត្ត ការអត់ធ្មត់ និងភាពធន់ ដើម្បីសម្រេចការងារដោយជោគជ័យ។

តើបរិយាកាសការងារមមារញឹកទាមទារឱ្យមានអ្វីខ្លះ?

ការធ្វើការនៅក្នុងបរិយាកាសការងារ ដែលមានភាពមមារញឹកអាចមានលក្ខណៈខុសៗគ្នា អាស្រ័យលើប្រភេទការងារ ដែលអ្នកកំពុងធ្វើ។ អ្នកខ្លះអាចរវល់ ដោយអង្គុយធ្វើការងារក្នុងការិយាល័យយ៉ាងមមារញឹក រីឯអ្នកខ្លះទៀតអាចរវល់ធ្វើការងារនៅខាងក្រៅ។ ប៉ុន្តែទោះការងារក្នុង ឬក្រៅការិយាល័យ តែងតែទាមទារឱ្យអ្នកមានជំនាញមួយចំនួនដូចជា ៖

• ការបង្កើតទំនាក់ទំនងល្អជាមួយក្រុមការងារ
• ការគ្រប់គ្រងពេលវេលាប្រកបដោយប្រសិទ្ធភាព
• អាកប្បកិរិយា ដែលពោរពេញដោយមហិច្ឆតា និងកម្លាំងជំរុញពីក្នុងខ្លួន
• ភាពមិនភ័យខ្លាចក្នុងការផ្តួចផ្ដើមគំនិត និងធ្វើជាអ្នកដឹកនាំ។

លើសពីនេះ នៅពេលដែលបំពេញការងារក្នុងបរិយាកាស ដែលមមារញឹក អ្នកនឹងឃើញពីភាពសាមញ្ញមួយចំនួន នៃបរិយាកាសនោះ មានដូចជា​៖

• ធ្វើការក្រោមពេលកំណត់ដែលតឹងតែងខ្លាំង
• ទាមទារឱ្យមានការសម្របខ្លួន និងបត់បែនសម្រាប់គម្រោងថ្មីៗ
• ធ្វើកិច្ចការច្រើនក្នុងពេលតែមួយ
• ត្រូវបញ្ចប់កិច្ចការក្នុងរយៈពេលខ្លី
• ទាមទារឱ្យកំណត់គោលដៅជាប្រចាំ និងសម្រេចគោលដៅនោះភ្លាមៗ។

ដូច្នេះ អ្នកចាំបាច់ត្រូវអភិវឌ្ឍជំនាញមួយចំនួន ដើម្បីអាចធ្វើការក្នុងបរិយាកាសការងារ ដែលមមារញឹកបានល្អ។ ជាមួយគ្នា អ្នកក៏ត្រូវដឹងអំពីគន្លឹះ ដើម្បីអភិវឌ្ឍសមត្ថភាពបំពេញការងារផងដែរ។

៥គន្លឹះ បំពេញការងារក្នុងបរិយាកាសដែលមមារញឹក

យោងតាមគេហទំព័រ Better Up ក្នុងបរិយាកាសការងារដែលមមារញឹក អ្នកចាំបាច់ត្រូវអនុវត្តគន្លឹះចំនួន៥ ដើម្បីអាចបំពេញការងារបានល្អ និងទទួលភាពជោគជ័យ។

១. កំណត់ការងារអាទិភាព ៖ ក្នុងការបំពេញការងារប្រចាំថ្ងៃ តែងតែមានកិច្ចការដែលសំខាន់ខ្លាំងជាងគេ ដែលអ្នកត្រូវធ្វើមុនគេ។ ការរៀនអំពីរបៀបគ្រប់គ្រងពេលវេលា នឹងជួយអ្នកឱ្យបំពេញការងារដោយមានរបៀបរៀបរយ និងមានលំដាប់លំដោយត្រឹមត្រូវ។ ល្បឿនលឿននៃការងារទាមទារឱ្យអ្នកមានការត្រៀមខ្លួនគ្រប់ពេល យល់អំពីទិន្នន័យលម្អិតរបស់គម្រោង និងមានសមត្ថភាពឆ្លើយតបនឹងការងារបន្ទាន់។ អ្នកត្រូវមានកាលវិភាគការងារជាក់លាក់ ហើយកិច្ចការដែលអ្នកត្រូវធ្វើទាំងអស់ត្រូវមាននៅលើប្រតិទិន ព្រមទាំងធ្វើបញ្ជីការងារចាប់ពីសំខាន់ខ្លាំង រហូតដល់ការងារមិនបន្ទាន់។

២. ហ្វឹកហាត់គ្រប់គ្រងភាពតានតឹង ៖ ជំនាញសំខាន់បំផុតក្នុងការបំពេញការងារ ជាពិសេសការងារដែលតម្រូវឱ្យធ្វើឱ្យបានលឿន គឺការចេះគ្រប់គ្រងភាពរតានតឹង។ ក្នុងការបំពេញការងារ អ្នកនឹងទទួលរងនូវសម្ពាធ និងភាពតានតឹងនៅក្នុងដំណាក់កាលណាមួយ ហេតុនេះ អ្នកត្រូវដឹងពីវិធីថែសុខភាពខ្លួន​ឯងចាំបាច់។ អ្នកគួរចំណាយពេលខ្លះ ដើម្បីស្ដាប់នូវអ្វីដែលរាងកាយអ្នកកំពុងប្រាប់អ្នក។ ដូចជា តើអ្នកឈឺក្បាលដែរទេ? តើក្រពះរបស់អ្នកមានបញ្ហាដែរឬអត់? តើអ្នកបានញ៉ាំអាហារទៀងទាត់ទេ? ជាដើម ការគ្រប់គ្រងភាពតានតឹង និងថែសុខភាពបានល្អ នឹងផ្ដល់ឱ្យអ្នកនូវថាមពល និងកម្លាំង ដែលអាចបំពេញការងារបានច្រើន និងមិនងាយឈឺ។

៣. ស្វែងរកជំនួយពីសមាជិកក្រុម ៖ ចូលចងចាំថា អ្នកគឺជាផ្នែកមួយនៃក្រុមការងារ ដូច្នេះកិច្ចសហការគឺជារឿងសំខាន់។ ការសហការគ្នានៅកន្លែងធ្វើការអាចជួយឱ្យអ្នកបំពេញការងារកាន់តែប្រសើរនៅក្នុងបរិយាកាសការងារដែលមមារញឹក។ ជំនួសឱ្យការប្រកួតប្រជែងគ្នាជាមួយក្រុមការងារនៅកន្លែងធ្វើការ អ្នកគួរសហការគ្នា ដើម្បីសម្រេចគោលដៅរួមជាមួយគ្នា។ ការធ្វើការងារជាក្រុមជួយឱ្យអ្នកសម្រេចក្ដីសុបិន និងគោលដៅបានកាន់តែរហ័ស ដូច្នេះកុំមានអារម្មណ៍ថាខ្មាសអៀនក្នុងការសុំជំនួយ។

៤. ផ្ដោតអារម្មណ៍ឱ្យបានល្អ៖ មានរឿងរ៉ាវជាច្រើន​ ដែលព្យាយាមឆក់យកចំណាប់អារម្មណ៍អ្នក និងធ្វើឱ្យអ្នកបែកអារម្មណ៍ពេលធ្វើការ ។ ប៉ុន្តែនៅពេលដែលអ្នកមានការងារច្រើនត្រូវបញ្ចប់ អ្នកចាំបាច់ត្រូវតែផ្ដោតអារម្មណ៍ឱ្យបានល្អ។ ដូច្នេះ ខណៈពេលដែលអ្នកដាក់អារម្មណ៍ធ្វើការ កុំភ្លេចបិទសំឡេងទូរស័ព្ទ ឬអ្វីមួយដែលរំខានការផ្ចង់អារម្មណ៍ ដើម្បីជួយពង្រឹងស្មារតីផ្ចង់អារម្មណ៍។ ម្យ៉ាងទៀត ត្រូវប្រាកដថា ទំហំតុធ្វើការរបស់អ្នក ត្រូវរៀបចំឡើង ដោយផ្ដល់ភាពងាយស្រួលក្នុងការផ្ដោតអារម្មណ៍។

៥. ត្រូវហ៊ានសួរសំណួរ ៖ ក្នុងករណីដែលអ្នកទទួលការងារទាំងដែលមិនយល់ច្បាស់ពីអ្វីដែលអ្នកដាក់ឱ្យចង់បាន អាចធ្វើឱ្យអ្នកមានអារម្មណ៍ច្របូកច្របល់។ ហេតុនេះត្រូវសួរ ឬសុំការពន្យល់ពីគេឱ្យបានច្បាស់មុននឹងទទួលការងារ ព្រោះការធ្វើបែបនេះ នឹងជួយការឱ្យការងាររបស់អ្នកបំពេញទៅដោយរលូន ជោគ័យ និងមិនងាយបង្កកំហុស៕