ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
Serotonin គឺជាអរម៉ូនអារម្មណ៍ល្អ ដែលដើរតួនាទីយ៉ាងសំខាន់នៅក្នុងសុខុមាលភាពផ្លូវអារម្មណ៍ និងផ្លូវចិត្ត។ អរម៉ូននេះ មានសមត្ថភាពបង្កើនអារម្មណ៍វិជ្ជមាន ធ្វើឱ្យអារម្មណ៍មានស្ថេរភាព។ Serotonin មិនគ្រាន់តែជាអរម៉ូនដែលកើតឡើងពីធម្មជាតិ មានឥទ្ធិពលទៅលើអារម្មណ៍ និងផ្នត់គំនិតរបស់អ្នកប៉ុណ្ណោះទេ វាថែមទាំងជួយគ្រប់គ្រងការគេង ការរំលាយអាហារ ដង់ស៊ីតេឆ្អឹង ចំណង់អាហារ និងការចងចាំទៀតផង។ ដោយសារតែ Serotonin មានឥទ្ធិពលស្ទើរគ្រប់ផ្នែកនៃរាងកាយ និងសុខភាពទូទៅ យើងគួរស្វែងយល់ពីវិធីគ្រប់គ្រង និងជំរុញឱ្យអរម៉ូននេះដំណើរការបានល្អ។ មានវិធីសាមញ្ញចំនួន ៥ដែលយើងអាចជំរុញឱ្យ Serotonin ដំណើរការបានល្អ៖
១. ហាត់ប្រាណទៀងទាត់ ៖ លោកវេជ្ជបណ្ឌិត David Seitz ជានាយកវេជ្ជសាស្ត្រ នៃស្ថាប័ន Ascendant Detox ក្នុងទីក្រុង New York បានលើកឡើងថា ការហាត់ប្រាណទៀងទាត់ គឺជាមធ្យោបាយដ៏ល្អ និងមានប្រសិទ្ធភាព ដែលជួយពង្រឹងកម្រិត Serotonin ក្នុងរាងកាយ។ យោងតាមការសិក្សារបស់ American Psychological Association ក៏បានបង្ហាញដែរថា សារធាតុ Serotonin ដែលបញ្ចេញដោយសកម្មភាពរាងកាយ អាចគ្រប់គ្រងភាពអស់កម្លាំងបានយ៉ាងល្អ។ លើសពីនេះ ការរួមបញ្ចូលគ្នានៃការហាត់ប្រាណ និងការបញ្ចេញ Serotonin អាចជួយឱ្យអ្នកមានអារម្មណ៍ប្រសើរ និងបង្កើនភាពស្វាហាប់។
២. អាហារដែលសម្បូរសារធាតុ Tryptophan៖ អាហារដែលសម្បូរទៅដោយសារធាតុ Tryptophan (អាស៊ីតអាមីណូកើតឡើងពីធម្មជាតិមាននៅក្នុងអាហារ) អាចជួយបង្កើតកម្រិត Serotonin ក្នុងរាងកាយ។ អាហារដែលមានសារធាតុ Tryptophan ខ្ពស់ មានដូចជា ស្រូវសាលី ចេក គ្រាប់ធញ្ញជាតិ ស៊ុត សាច់ត្រីសាមុន និងតោហ៊ូ។ ត្រង់ចំណុចនេះ លោកវេជ្ជបណ្ឌិត David Seitz សង្កត់ធ្ងន់ថា របបអាហារត្រឹមត្រូវ គឺជាផ្នែកមួយដែលធ្វើឱ្យអ្នកមានសុខភាពមាំមួន។
៣. តុល្យភាពអាហារ ៖ លោកវេជ្ជបណ្ឌិត David Seitz បានលើកឡើងថា ការទទួលទានរបបអាហារ មានតុល្យភាព (រួមបញ្ចូលទាំងអាហារដែលផ្ទុកសារធាតុ Tryptophan ខ្ពស់) គឺមានសារៈសំខាន់ក្នុងការគ្រប់គ្រងកម្រិត Serotonin។ លោកបន្ថែមថា «ការទទួលទានផ្លែឈើ បន្លែស្រស់ និងប្រូតេអ៊ីនគ្មានខ្លាញ់ នឹងធានាថា រាងកាយរបស់អ្នកទទួលបានសារធាតុចិញ្ចឹមសំខាន់ៗ ដែលយើងត្រូវការចាំបាច់។»
៤. គេងឱ្យបានគ្រប់គ្រាន់ ៖ ការគេងមិនបានគ្រប់គ្រាន់អាចប៉ះពាល់យ៉ាងធ្ងន់ធ្ងរដល់សុខុមាលភាពទូទៅរបស់មនុស្ស។ ជាពិសេស សុខភាពបេះដូង សុខភាពផ្លូវចិត្ត ការចងចាំ និងការរំលាយអាហារ។ លើសពីនេះ ការគេងមិនគ្រប់គ្រាន់ ក៏ជាផ្នែកមួយ ដែលធ្វើឱ្យកម្រិត Serotonin ធ្លាក់ចុះផងដែរ។ ហេតុនេះការគេងឱ្យបានគ្រប់គ្រាន់ពិតជាមានសារៈសំខាន់ ។ លោកវេជ្ជបណ្ឌិត Seitz បានផ្ដល់ដំបូន្មានឱ្យមនុស្សពេញវ័យ គួរគេងឱ្យបានយ៉ាងតិច ៧ម៉ោង ក្នុងមួយថ្ងៃ ដើម្បីជំរុញអរម៉ូន Serotonin ឱ្យកើនឡើង។
៥. ទំនាក់ទំនងល្អក្នុងសង្គម ៖ ការចំណាយពេលជាមួយមនុស្សជាទីស្រឡាញ់ ក៏អាចបង្កើនការផលិតអរម៉ូន Serotonin ក្នុងរាងកាយផងដែរ។ លោកវេជ្ជបណ្ឌិត Seitz មានប្រសាសន៍ថា «ការចំណាយពេលជាមួយមិត្តភក្តិ និងគ្រួសារ ជាវិធីសាស្ត្រដ៏មានប្រសិទ្ធភាព ដែលអាចជួយបង្កើនកម្រិត Serotonin តាមបែបធម្មជាតិ។» សកម្មភាពសន្ទនា និងធ្វើសកម្មភាពសប្បាយៗជាមួយអ្នកជិតស្និទ្ធ នឹងផ្ដល់ឱ្យអ្នកនូវអារម្មណ៍កក់ក្ដៅ និងផាសុកភាព ដែលជំរុញឱ្យខួរក្បាលបញ្ចេញអរម៉ូនអារម្មណ៍ល្អ ក្នុងនោះក៏មាន Serotonin ផងដែរ៕
