យុវជន ទាមទារនូវសមត្ថភាព ហើយក្នុងការពន្លឿនបាននូវសមត្ថភាព ត្រូវមានការចូលរួមទាំងអស់គ្នា តាមរយៈការពង្រឹងរបៀបរៀនសូត្រ ការទទួលបានអាហារូបករណ៍ ឱកាសការងារ និងការធានាបាននូវយុត្តិធម៌សង្គម។

ក្នុងវេទិកាយុវជនថ្នាក់ជាតិនៅកម្ពុជា ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាអនុប្រធានប្រចាំការ នៃក្រុមប្រឹក្សាជាតិកម្ពុជាដើម្បីអភិវឌ្ឍយុវជន លើកឡើងថា ក្រសួងអប់រំ បានរៀនចំកំណែទម្រង់ ដោយមានការរឹតបន្តឹងការប្រឡង ឱ្យតម្លៃលើអ្នកចេះគឺជាប់ ក៏ដូចជា ផ្តល់ឱកាសការងារ ផ្តល់ឱកាសអាហារូបករណ៍ជួយទៅដល់យុវជនជនជាតិដើមភាគតិច ឬក៏យុវជនរស់ក្នុងតំបន់ក្រីក្រ ដែលធ្វើពួកគាត់ជាយុវជនមានឱកាសការងារ មានឱកាសរៀនសូត្រ ទាំងនេះស្ថិតក្នុងទម្រង់កែលម្អ ផ្តល់អាទិភាពដើម្បីផ្តល់ឱកាសឱ្យយុវជនមានការគាំទ្រ។

ជាមួយគ្នានេះ បើតាម​ប្រសាសន៍ឯកឧត្តមរដ្ឋមន្រ្តី ក្នុងសម័យ​ឌីជីថល យុវជន ត្រូវ​តែចេះជំនាញឌីជីថល ដើម្បីចូលរួមចំណែក​ក្នុង​ការ​អភិវឌ្ឍសេដ្ឋកិច្ច​សង្គម។

ក្នុងសម័យឌីជីថល យុវជនត្រូវតែចេះជំនាញឌីជីថល អ៊ីចឹង! ជំនាញឌីជីថលនេះ យុវជនខ្លួនឯងត្រូវខំប្រឹង ហើយរដ្ឋាភិបាលក៏ត្រូវតែផ្តល់ឱកាសដែរ ដើម្បីអភិវឌ្ឍន៍ខ្លួន ហើយដើម្បីចូលរួមចំណែកក្នុងការអភិវឌ្ឍសេដ្ឋកិច្ចសង្គម។

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ

នៅក្នុងវេទិកាយុវជនថ្នាក់ជាតិនៅកម្ពុជាឆ្នាំ២០២៤ ឯកឧត្តមរដ្ឋមន្ត្រីបានផ្តល់ជាអនុសាសន៍បន្ថែមថា យុវជនត្រូវតែចាប់យកទាំងវិទ្យាសាស្រ្តពិត និងនិងវិទ្យាសាស្រ្តសង្គម។ ដូច្នេះត្រូវតែមានការផ្លាស់ប្តូរស្វែងយល់អំពីគ្នា រវាងយុវជនប្រទេសនីមួយៗ ដែលសិក្សាពាក់ព័ន្ធនឹងវប្បធម៌មកពីចម្រុះជាតិសាសន៍ផ្សេងៗគ្នា។ ទន្ទឹមគ្នានោះ ត្រូវមានការលើកទឹកចិត្តឱ្យមានកិច្ចសហការ ឱ្យមានការផ្លាស់ប្តូរ ក៏ដូចជាផ្តល់នៅការគាំទ្រនៅផ្នែកគោលនយោបាយ ការគាំទ្រនូវផ្នែកហិរញ្ញវត្ថុដើម្បីឱ្យមានកិច្ចសហការរវាងយុវជនក្នុងតំបន់ខុសគ្នា រួមទាំងយកចិត្តទុកដាក់អភិវឌ្ឍន៍ទាំងនៅទីក្រុង និងនៅតាមជនបទ។

ក្នុងនោះ ឯកឧត្តមបណ្ឌិតសភាចារ្យ ក៏បានជំរុញឱ្យយុវជនដឹងអំពីរឿងបម្រែបម្រួលអាកាសធាតុជាចំណែកសំខាន់ដូចគ្នា ដែលជាហេតុមានការស្នើសុំឱ្យបញ្ចូលនូវការអប់រំទាក់ទងនឹងបម្រែបម្រួលអាកាធាតុចូលក្នុងកម្មវិធីសិក្សា ក្នុងគោលបំណងឱ្យយុវជនបានយល់ ហើយបានត្រៀមខ្លួនសម្រាប់អនាគត។ កត្តាទាំងអស់នេះហើយ សុទ្ធសឹងតែជាធាតុចូលមួយចំនួនដែលក្រសួងអប់រំធ្លាប់បានសម្របសម្រួលក្នុងកម្មវិធីយុវជនអាស៊ាន។ យុវជនមានភាសារួមគឺ ភ្លេង ចំណង់ចំណូលចិត្ត និងប្រភេទអាហារដែលគាត់បរិភោគ ដែលបង្ហាញឱ្យឃើញថា យុវជនមានការគិតខុសពីមនុស្សចាស់ ដូច្នេះការគិតអំពីអនាគត គឺត្រូវតែមានសម្លេងយុវជន ជាក់ស្ដែងវេទិកាយុវជនថ្នាក់ជាតិនៅកម្ពុជាឆ្នាំ២០២៤ គឺជាការផ្តល់ឱកាសឱ្យយុវជនបានចូលរួម៕