សាមណសិស្ស ៣៤៥អង្គមានព្រះជន្មចន្លោះពី៣ – ២០ព្រះវស្សាកំពុងទទួលបានការអប់រំ និងបណ្ដុះបណ្ដាលចំណេះដឹងពីអក្សរសាស្ត្រខ្មែរ ភាសាបាលី វិជ្ជានព្វន្ត និងការប្រតិបត្តិខ្លួនតាមគន្លងអប់រំសីលធម៌ព្រះពុទ្ធសាសនានៅវត្តប្រាសាទនាងខ្មៅ ។ សាមណសិស្សកំពុងទទួលការសិក្សានៅទីនេះ ស្ថិតក្រោមការគ្រប់គ្រង និងទំនុកបម្រុងដោយព្រះធម្មវិជ្ជា ជួន កក្កដា បច្ចុប្បន្នជានាយកសាលាពុទ្ធិកបឋមសិក្សាប្រាសាទនាងខ្មៅ ។

សាមណសិស្សដែលទទួលបានការបណ្ដុះបណ្ដាលនៅសាលាពុទ្ធិកបឋមសិក្សាប្រាសាទនាងខ្មៅ ភាគច្រើនមកពីគ្រួសារមានជីវភាពក្រីក្រ កូនចៅពុទ្ធបរិស័ទចំណុះជើងវត្ត និងក្មេងកំព្រាគ្មានទីពឹងមកពីបណ្ដាខេត្តនានា ។ សាមណសិស្សមួយចំនួនដែលបានឆ្លងកាត់ការសិក្សានៅទីនេះ បានបន្តការសិក្សានៅពុទ្ធិកសិក្សានានា ព្រមទាំងបានបន្តការសិក្សានៅសាកលវិទ្យាល័យជាបន្តបន្ទាប់ ។

ព្រះធម្មវិជ្ជា ជួន កក្កដា នាយកសាលាពុទ្ធិកបឋមសិក្សាប្រាសាទនាងខ្មៅ មានថេរដីកាថា សាមណសិស្សដែលបានបួសរៀននៅវត្តប្រាសាទនាងខ្មៅ មានឱកាសទទួលបានការអប់រំត្រឹមត្រូវក្នុងសំណាក់ព្រះពុទ្ធសាសនា ។ ជាមួយគ្នានេះ សកម្មភាពដែលព្រះអង្គកំពុងធ្វើ (បង្រៀន) គឺកំពុងជួយឱ្យសាមណសិស្សទទួលបានចំណេះដឹងពីវិស័យពុទ្ធចក្រ និងផ្តល់ភាពកក់ក្តៅចេញពីអារាម ។

អាត្មាធ្លាប់ឆ្លងកាត់ជីវិតជាកូនអ្នកក្រខ្សត់ពុំមានធនធាន ដូច្នេះអាត្មាមានបំណងចង់ឱ្យក្មេងៗដែលមកទីនេះ មានឱកាសបន្តការសិក្សា និងអភិវឌ្ឍន៍ចំណេះដឹងចេញពីការអប់រំបានត្រឹមត្រូវ

ព្រះធម្មវិជ្ជា ជួន កក្កដា នាយកសាលាពុទ្ធិកបឋមសិក្សាប្រាសាទនាងខ្មៅ

សូមជម្រាបថា នៅក្នុងសាលាពុទ្ធិកបឋមសិក្សាវត្តប្រាសាទនាងខ្មៅ មានបែងចែកកម្រិតសិក្សាផ្ដើមចេញពីថ្នាក់មត្តេយ្យសិក្សាកម្រិតក កម្រិតខ និងកម្រិតគ រហូតដល់ថ្នាក់បញ្ចប់កម្រិតបឋមសិក្សា ហើយទំនងមានតែទីនេះហើយដែលមានសាលាមត្តេយ្យសិក្សាកម្រិតសម្រាប់សាមណសិស្ស ។ ទន្ទឹមគ្នានេះ សាមណសិស្សក៏ទទួលបានការបណ្ដុះបណ្ដាលជំនាញកុំព្យូទ័រ និងភាសាអង់គ្លេសផងដែរ ។

សាលាពុទ្ធិកបឋមសិក្សាវត្តប្រាសាទនាងខ្មៅ ស្ថិតនៅវត្តប្រាសាទនាងខ្មៅ មានទីតាំងស្ថិតនៅភូមិចារ ឃុំរវៀង ស្រុកសំរោង ខេត្តតាកែវ ។ វត្តនេះបានសាងសង់ឡើងនៅក្បែរនឹងប្រាសាទនាងខ្មៅ ដែលប្រាសាទនេះសង់ឡើងនៅរវាងសត្សវត្សទី១០ ក្នុងរាជព្រះបាទជ័យវរ្ម័នទី៤ ៕