ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ថ្លែងក្នុងពិធីប្រកាសលទ្ធផលជ័យលាភីប្រកួតផ្នែកអានអត្ថបទ ស្មូតកំណាព្យ និងតែងនិពន្ធពានរង្វាន់ «សម្តេចតេជោ ហ៊ុន សែន» កាលពីពេលថ្មីៗនេះ លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា វិស័យស្នូលនៃការអភិវឌ្ឍន៍ គឺមានមូលដ្ឋានគ្រឹះពីការសិក្សា និងការអប់រំ។ ប្រសិនបើគ្មានការសិក្សា និងការអប់រំទេ យើងមិនអាចក្លាយជាធនធានសម្រាប់វិស័យផ្សេងៗនោះឡើយ។
លោកជំទាវ ទន់ សាអ៊ីម បញ្ជាក់បន្ថែមថា នៅក្នុងប្រទេសកម្ពុជាដើម្បីក្លាយជាធនធានមនុស្សដ៏ខ្លាំង ទាមទារឱ្យមានការបន្តវេន។ ការបន្តវេននេះ គឺសំដៅថែរក្សាការពារ និងអភិវឌ្ឍសម្បត្តិវប្បធម៌ជាតិរបស់ខ្លួន ទឹកដី អត្តសញ្ញាណជាតិ បូរណភាពទឹកដី និងអភិវឌ្ឍគ្រប់ផ្នែកទាំងអស់ធ្វើឱ្យប្រទេសជាតិដើរទាន់បណ្ដាប្រទេសនៅក្នុងពិភពលោក ។
លោកជំទាវ ទន់ សាអ៊ីម មានប្រសាសន៍ «យើងទាំងអស់គ្នាអភិវឌ្ឍដើម្បីអភិរក្ស ហើយអភិរក្សដើម្បីអភិវឌ្ឍ ហើយក៏ជាអ្នកបន្តវេន» ។
ជាមួយគ្នានេះ លោក ជំទាវ សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា កម្មវិធីប្រកួតផ្នែកអានអត្ថបទ ស្មូតកំណាព្យ និងតែងនិពន្ធនេះ មិនត្រឹមតែជាសក្ខីភាពទិវាជាតិអំណានលើកទី៨ ប៉ុន្តែបានបង្ហាញពីការចូលរួមយ៉ាងសកម្មបំផុតប្រកបដោយភាពថ្លៃថ្នូរ ជាអារ្យជនដ៏ល្អ នៅក្នុងសង្គមជាតិ ក្នុងដំណើរលើកកម្ពស់ ការពារ ថែករក្សា វប្បធម៌ អក្សរសាស្រ្ត អក្សរសិល្ប៍ជាតិរបស់យើង។
អនុរដ្ឋលេខាធិការក្រសួងអប់រំ បន្ថែមថា ការបង្កើតឱ្យមានការប្រឡង គឺកាន់តែមានប្រសិទ្ធភាពជួយដល់ដំណើរការនៃការកសាងធនធានមនុស្សឱ្យក្លាយទៅជាមូលធនមនុស្សពិតប្រាកដសម្រាប់ដំណើរឆ្ពោះទៅកាន់ទិសដៅ គឺការអភិវឌ្ឍន៍ប្រទេសជាតិឱ្យក្លាយជាប្រទេសមានប្រាក់ចំណូលកម្រិតខ្ពស់ឆ្នាំ២០៣០ និងជាប្រទសអភិវឌ្ឍន៍ពេញលក្ខណៈឆ្នាំ២០៥០។
លោក ជំទាវ សឿ សុជាតា មានប្រសាសន៍ «ក្មួយៗដែលជាបេក្ខជនទោះបីជាក្មួយៗមានអារម្មណ៍ក្ដុកក្ដួល ភ័យព្រួយ លោកគ្រូ អ្នកគ្រូទាំងអស់ក៏ភ័យព្រួយ ឪពុកម្ដាយមានវត្តមាននៅទីនេះក៏ភ័យព្រួយ ប៉ុន្តែចង្វាក់បេះដូងរបស់ក្មួយៗជាបេក្ខជនទាំងអស់ គឺបានដើរនៅក្នុងចង្វាក់តែមួយស្របគ្នាលើកកម្ពស់វប្បធម៌ជាតិ» ។
ក្នុងឱកាសនោះ ក្រសួងអប់រំក៏បានរកឃើញម្ចាស់ជ័យលាភីប្រកួតផ្នែកអានអត្ថបទ ស្មូតកំណាព្យ និងតែងនិពន្ធពានរង្វាន់ «សម្តេចតេជោ ហ៊ុន សែន» ដោយក្នុងនោះ វិញ្ញាសាផ្នែកអានអត្ថបទ រួមមាន ជ័យលាភីលេខ១ បានទៅលើ កុមារី លេខា សៀវម៉ី មកពីវិទ្យាល័យប៊ុនរ៉ានីហ៊ុនសែនអនុវត្ត ខេត្តកណ្ដាល, ជ័យលាភីលេខ២ បានទៅលើ កុមារី សៅ ចេងហួយ មកពីសាលាបឋមសិក្សាស្អិន ស្រុកស្ទោង ខេត្តកំពង់ធំ និងជ័យលាភីលេខ៣ បានទៅលើ កុមារី សីម ស្រីលក្មណ៍ មកពីសាលាបឋមសិក្សាឡាមីកូ ខេត្តកែប។
ចំពោះ វិញ្ញាសាផ្នែកស្មូត្រកំណាព្យ រួមមាន ជ័យលាភីលេខ១ បានទៅលើ យុវនារី សាត់ ស្រីនុច មកពីវិទ្យាល័យសម្ដេចឪសម្ដេចម៉ែបរសែត ខេត្តកំពង់ស្ពឺ, ជ័យលាភីលេខ២ បានទៅលើ យុវជន នៅ កោសល្យ មកពីវិទ្យាល័យហ៊ុនសែន ១០០ខ្នង រាជធានីភ្នំពេញ និងជ័យលាភីលេខ៣ បានទៅលើ យុវជន សំរេច រួន មកពីអនុវិទ្យាល័យពោធិ៍វង្សឧត្តរមានជ័យ។
ដោយឡែក វិញ្ញាសាតែងនិពន្ធ រួមមាន ជ័យលាភីលេខ១ បានទៅលើ យុវនារី ហឹម សូនីតា មកពីវិទ្យាល័យតេជោហ៊ុនសែនរលាំងឈូក ខេត្តកមពង់ស្ពឺ, ជ័យលាភីលេខ២ បានទៅលើ យុវនារី អ៊ឹម អែម មកពីវិទ្យាល័យកំពង់ធំ ខេត្តកំពង់ធំ និងជ័យលាភីលេខ៣ បានទៅលើ យុវជន សុភាច វិសិទ្ធិ មកពីវិទ្យាល័យមេសាង ខេត្តព្រៃវែង៕
