ភ្នំពេញ- តាមរបាយការណ៍វាយតម្លៃលើកទី៤ របស់ក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC) ចេញផ្សាយឆ្នាំ២០០៧ បានបញ្ជាក់យ៉ាងច្បាស់ថា ភពផែនដីកំពុងប្រឈមនឹងការប្រែប្រួលអាកាសធាតុបង្កដោយសកម្មភាពមនុស្ស។ ទន្ទឹមគ្នានេះ បច្ចេកវិទ្យាថ្មីកំពុងបង្ហាញពីគន្លឹះជួយពិភពលោកសម្របខ្លួនទៅនឹងការប្រែប្រួលអាកាសធាតុ រួមមាន ប្រព័ន្ធផ្ដល់ដំណឹងទឹកជំនន់ ការបន្សាំអាកាសធាតុដោយប្រើបញ្ញាសិប្បនិមិ្មត (AI) និងប្រព័ន្ធ IoT សម្រាប់ការគ្រប់គ្រងទឹក ដើម្បីមនុស្សរៀនរស់នៅប្រឈមជាមួយផលប៉ះពាល់នៃការប្រែប្រួលអាកាសធាតុ។

ទី១.  ប្រព័ន្ធផ្ដល់ដំណឹងទឹកជំនន់ (Google Flood Hub)៖ ប្រព័ន្ធផ្ដល់ដំណឹងទឹកជំនន់ Flood Hub របស់ក្រុមហ៊ុន Google ប្រើបច្ចេកវិទ្យាម៉ាស៊ីនសិក្សា (Machine Learning) ដើម្បីផ្ដល់ដំណឹងដល់មនុស្សអំពីគ្រោះថ្នាក់ នៅពេលដែលទន្លេ មហាសមុទ្រ និងបឹង បង្កការគំរាមកំហែងដល់អាយុជីវិត ឬទ្រព្យសម្បត្តិប្រជាជន។ ប្រព័ន្ធនេះ បង្ហាញពីតំបន់ និងពេលវេលាដែលទឹកជំនន់អាចកើតមានឡើង ដើម្បីជូនដំណឹងដល់ប្រជាពលរដ្ឋអំពីគ្រោះធម្មជាតិ ហើយអាជ្ញាធរអាចជួយប្រជាជនប្រកបដោយប្រសិទ្ធភាព។ នៅឆ្នាំ២០២១ ប្រព័ន្ធនេះបានបញ្ជូនការជូនដំណឹងចំនួន ១១៥ លានដង ទៅកាន់មនុស្ស ២៣ លាននាក់តាមរយៈ Google Search និង Maps ដោយជួយសង្រ្គោះជីវិតមនុស្សរាប់មិនអស់។

ទី២. ការបន្សាំអាកាសធាតុដោយប្រើបញ្ញាសិប្បនិមិ្មត (AI)៖ យោងតាមក្រុមហ៊ុនផ្តល់ប្រឹក្សាយោបល់ (Boston Consulting Group-BCG) បានឱ្យដឹងថា បញ្ញាសិប្បនិម្មិត (AI) នឹងដើរតួយ៉ាងសំខាន់ក្នុងការសម្របខ្លួនទៅនឹងអាកាសធាតុ។ នៅក្នុងក្របខ័ណ្ឌនេះ ការប្រើប្រាស់បញ្ញាសិប្បនិមិ្មត (AI) ដើម្បីប្រយុទ្ធប្រឆាំងនឹងការប្រែប្រួលអាកាសធាតុ ក្រុមហ៊ុនផ្តល់ប្រឹក្សាយោបល់ BCG បានកំណត់តំបន់មួយចំនួនសម្រាប់ការបន្សាំអាកាសធាតុតាមរយៈការប្រើប្រាស់បញ្ញាសិប្បនិមិ្មត (AI)។

កម្មវិធីមួយរបស់ Pano AI ដែលមានមូលដ្ឋាននៅទីក្រុង San Francisco ប្រើប្រាស់បច្ចេកវិទ្យាដើម្បីស្វែងរកភ្លើងឆេះព្រៃ ជូនដំណឹងដល់ម្ចាស់ផ្ទះ និងជួយក្រុមពន្លត់អគ្គីភ័យក្នុងការគ្រប់គ្រងភ្លើង។ ម៉្យាងវិញទៀត បញ្ញាសិប្បនិមិ្មត (AI) អាចស្កែនវីដេអូរបស់កាមេរ៉ាលើភ្នំ ដើម្បីរកឃើញសញ្ញាដំបូងនៃភ្លើងឆេះព្រៃ បន្ទាប់មកវាជូនដំណឹងដល់ម្ចាស់ផ្ទះ និងអ្នកឆ្លើយតបដំបូងនៅក្នុងតំបន់។ នេះបើយោងតាមក្រុមហ៊ុនផ្តល់ប្រឹក្សាយោបល់ BCG បានលើកឡើង។

ទី៣. ប្រព័ន្ធ IoT សម្រាប់ការគ្រប់គ្រងទឹក៖ ការប្រើប្រាស់ទឹកឆ្លាតវៃនឹងមានសារៈសំខាន់នៅពេលដែលសីតុណ្ហភាពកើនឡើង ហើយគំរូទឹកភ្លៀងរងការរំខានដោយការប្រែប្រួលអាកាសធាតុ។ ប្រព័ន្ធ IoT នេះ កំពុងត្រូវបានប្រើប្រាស់នៅក្នុងគម្រោង SWAMP នៅប្រទេសប្រេស៊ីល អ៊ីតាលី និងអេស្ប៉ាញ ដើម្បីគ្រប់គ្រង និងបង្កើនផលប៉ះពាល់នៃការផ្គត់ផ្គង់ទឹកសម្រាប់ការប្រើប្រាស់កសិកម្មដែលមានសក្តានុពលសន្សំសំចៃទឹកប្រមាណពី ១៨%ទៅ ៣៨%។ នេះបើតាមរបាយការណ៍គណៈកម្មការសេដ្ឋកិច្ច និងសង្គមប្រចាំតំបន់អាស៊ី និងប៉ាស៊ីហ្វិក (ESCAP) ៕