អង្គការទស្សនៈពិភពលោកអន្តរជាតិ ប្រចាំនៅកម្ពុជា (WVI-C) នឹងរៀបចំយុទ្ធនាការអំណានឮៗជាលើកទី៣ នាថ្ងៃទី២៣ ខែមីនា ឆ្នាំ២០២៤ ខាងមុខ នៅបរិវេណ Factory Phnom Penh។ គោលបំណងចម្បងនៃយុទ្ធនាការនេះ គឺកៀរគរអំណោយជាសៀវភៅចំនួន ១ម៉ឺនក្បាល ដើម្បីផ្តល់ជូនបណ្ណាល័យ និងជុំរុំអំណានចំនួន ២១៦ នៅសហគមន៍ដាច់ស្រយាល នៅខេត្តក្រចេះ ព្រះវិហារ និងបន្ទាយមានជ័យ ។

លោក នី សុផារ៉ាន នាយកប្រតិបត្តិនៃអង្គការទស្សនៈពិភពលោកអន្តរជាតិ ប្រចាំនៅកម្ពុជា មានប្រសាសន៍ថា យុទ្ធនាការអំណានឮៗ លើសពីការកៀរគរសៀវភៅអាន តែវាកត្តាជំរុញឱ្យមានការចាប់អារម្មណ៍លើការអាន និងការសិក្សារបស់កុមារ។ តាមរយៈយុទ្ធនាការនេះ  លោកមានបំណងបង្កើតផលវិជ្ជមានយូរអង្វែង តាមរយៈការផ្តល់ឱ្យកុមារនូវលទ្ធភាពទទួលបានសម្ភារៈអានប្រកបដោយគុណភាព និងបណ្តុះក្តីស្រលាញ់ចំពោះសៀវភៅ។

លោក សុផារ៉ាន បញ្ជាក់បន្ថែមថា អក្ខរកម្មមានតួនាទីសំខាន់ជួយជំរុញឱ្យកុមារបញ្ចេញនូវរាល់សក្តានុពល និងបំភ្លឺអនាគតរបស់ពួកគេ។ ទោះជាយ៉ាងណាក៏ដោយ របាយការណ៍របស់ធនាគារពិភពលោក បានលើកឡើងពីបញ្ហាប្រឈមផ្នែកអក្ខរកម្មរបស់ប្រទេសកម្ពុជា ដែលកុមារជាង ៥០% មានបញ្ហលើការអាន ឬការយល់ពីសាច់រឿងសាមញ្ញៗ ក្រោយពីបញ្ចប់ថ្នាក់បឋមសិក្សា។ ការរំខានដែលបណ្តាលមកពីការបិទសាលាដោយសារជំងឺរាតត្បាតបានធ្វើឱ្យបញ្ហាប្រឈមទាំងនេះកាន់តែធ្ងន់ធ្ងរ ដែលរារាំងដល់សមត្ថភាពអានរបស់សិស្សបន្ថែមទៀត។ ទោះជាយ៉ាងណាក៏ដោយ ការសិក្សាបានបង្ហាញថា ការផ្តល់សៀវភៅរឿងដែលមានគុណភាពខ្ពស់ និងការបង្កើតបណ្តាញគាំទ្រការអាន ជាកត្តាមួយក្នុងចំណោមកត្តាផ្សេងទៀត ដែលអាចធ្វើឱ្យលទ្ធផលអានមានភាពប្រសើរឡើង។

កញ្ញា ផាន់ រាសី អ្នកគ្រប់គ្រងទូទៅ SP Building Management – អគារ GIA Tower បានបញ្ជាក់ថា​ ភាសា ទំនាក់ទំនង និងការអាន គឺជាមូលដ្ឋានគ្រឹះនៃការសិក្សាទាំងអស់។ កញ្ញា ជឿជាក់ថាភាពជាដៃគូនេះនឹងផ្តល់ភាពងាយស្រួលបន្ថែមទៀតដល់កុមារ នៅតំបន់ដាច់ស្រយាល ដើម្បីបង្កើនបទពិសោធន៍ ការគិត និងការសន្ទនាតាមរយៈការអាន។

កញ្ញា ជួន ចាន់ណាក់ អ្នកសម្របសម្រួលព្រឹត្តិការណ៍របស់ Factory Phnom Penh បានបង្ហាញពីក្តីរំភើបរីករាយដែលបានចូលរួមចំណែកក្នុងយុទ្ធនាការដើម្បីលើកកម្ពស់ការអប់រំនៅតាមតំបន់ជនបទ និងបណ្តុះសហគមន៍អានដែលមានលក្ខណៈអំណោយផល។ កញ្ញា ចាន់ណាក់ បានគូសបញ្ជាក់ពីតួនាទីសំខាន់នៃការអាន ទាំងការរីកចម្រើនផ្ទាល់ខ្លួន និងការរីកចម្រើនរបស់ប្រទេសជាតិទាំងមូល ។

ទាំងតំណាង SP Building Management – អគារ GIA Tower និង Factory Phnom Penh ក៏ស្នើឱ្យមានការចូលរួមពីសាធារណៈជន សាលារៀន និងស្ថាប័ននានា ក្នុងយុទ្ធនាការនេះ ដោយសង្កត់ធ្ងន់លើកិច្ចខិតខំប្រឹងប្រែងរួមដែលចាំបាច់ ដើម្បីធ្វើឱ្យមានការផ្លាស់ប្តូរជាក់ស្តែងក្នុងជីវិតរបស់កុមារតាមរយៈអក្ខរកម្ម។

កុមារជាង ៥ ៥០០ នាក់ ស្រុកជាំក្សាន្ត ខេត្តព្រះវិហារ និងស្រុកព្រែកប្រសព្វ ខេត្តក្រចេះ បានទទួលផលពី ភាពជោគជ័យនៃយុទ្ធនាការសៀវភៅ ១ម៉ឺន ក្បាល ក្នុងឆ្នាំ២០២២ និងឆ្នាំ២០២៣ ។ កុមារ មុន្នី ឧត្តម ជាសិស្សថ្នាក់ទី៣ នៅស្រុករវៀង បានលើកឡើងថា រូបគេរីករាយណាស់ដែលសហគមន៍បានសាងសង់ជំរុំអាន ហើយមានសៀវភៅជាច្រើនសម្រាប់គាត់ និងមិត្តភក្តិបានអាន និងរីករាយជាមួយគ្នា។ ឧត្តម បន្តដោយភាពរីករាយថា “ខ្ញុំ និងមិត្តភក្តិតែងតែមកទីនេះដើម្បីគូររូប ឬខ្ចីសៀវភៅមកអាននៅផ្ទះជាមួយឪពុកម្តាយ និងបងប្អូនរបស់ពួកយើង”។ ឧត្តម និង​មិត្តភ័ក្តិរបស់គេ ចង់​ឃើញ​សកម្មភាព​ចែក​សៀវភៅ​បែប​នេះ ​ពង្រីក​ដល់​តំបន់​ដាច់​ស្រយាល​ផ្សេង​ទៀត។

ជំរុំអំណានចំនួន ៩៧០ របស់អង្គការទស្សនៈពិភពលោកអន្តរជាតិ ប្រចាំនៅកម្ពុជា នៅតាមបណ្តាខេត្តចំនួន ១០  កំពុងផ្តល់ផលដល់កុមារចំនួនជាង ៣ម៉ឺននាក់។ លើសពីនេះ ឪពុកម្តាយ និងអាណាព្យាបាល ចំនួនជាង ៤ម៉ឺន នាក់ ទទួលបានការបណ្តុះបណ្តាល ដើម្បីជំរុញបរិយាកាសសិក្សា និងការអាននៅផ្ទះ ដែលជួយជំរុញដល់ការអាន និងការរៀនសូត្ររបស់កូនៗពួកគេ។

គួរជម្រាបជូនថា យុទ្ធនាការអំណានឮៗ នៅឆ្នាំនេះ ចាប់ផ្តើមជាមួយនឹងសកម្មភាពដែលមានការចូលរួម  ភាពជាដៃគូ និងការសហការជាមួយអ្នកបង្កើតមាតិកាលើបណ្តាញសង្គម ដើម្បីបន្លឺសាររបស់យុទ្ធនាការ៕