ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងស្ថានទូតឥណ្ឌាប្រចាំកម្ពុជា បានសម្ពោធដាក់ឱ្យប្រើប្រាស់ “បណ្ណាល័យវិទ្យាសាស្ត្រ” នៅក្នុងវិទ្យាល័យ ហ៊ុន សែន ត្រែង ក្នុងស្រុករតនមណ្ឌល ខេត្តបាត់ដំបង ដើម្បីរួមចំណែកដល់ចក្ខុវិស័យអភិវឌ្ឍន៍​ដែលផ្អែកលើបច្ចេកវិទ្យា។

បណ្ណាល័យវិទ្យាសាស្ត្រនេះត្រូវបានកសាងឡើងក្រោមជំនួយឥតសំណងរបស់រដ្ឋាភិបាលឥណ្ឌា តាមរយៈគម្រោងឆ្លើយតបលឿន (Quick Impact Project) នៃក្របខ័ណ្ឌកិច្ចសហប្រតិបត្តិការមេគង្គ-ហ្កានហ្កា ដើម្បីជំរុញការអប់រំផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (ស្ទែម) សម្រាប់សិស្សានុសិស្សនៅ​ក្នុង​តំបន់ដាច់ស្រយាល។ អគារបណ្ណាល័យនេះត្រូវបានបំពាក់ដោយបរិក្ខារបច្ចេកទេសទំនើបៗ រួមមានឧបករណ៍ពិសោធន៍វិទ្យាសាស្ត្រ ប្រព័ន្ធម៉ាស៊ីនត្រជាក់ដើរដោយថាមពលព្រះអាទិត្យ និងប្រព័ន្ធចម្រោះទឹកស្អាត ដែលឧបត្ថម្ភដោយរដ្ឋាករទឹកស្វយ័តក្រុងភ្នំពេញ ដើម្បីបង្កលក្ខណៈងាយស្រួលដល់ការសិក្សា និងការស្រាវជ្រាវ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​សង្កត់ធ្ងន់ថា បណ្ណាល័យវិទ្យាសាស្ត្រនេះ នឹងរួមចំណែកកសាងមូលធនមនុស្សនៅក្នុងមូលដ្ឋាន។ ឯកឧត្តមមានប្រសាសន៍ថា “មូលធនមនុស្សគឺជាគន្លឹះសម្រាប់លើកកម្ពស់សមត្ថ​ភាព ប្រកួតប្រជែងរបស់កម្ពុជា ក្នុងយុគសម័យ​ឌីជីថល។ យើងខ្ញុំសង្ឃឹមយ៉ាងមុតមាំថា បណ្ណាល័យវិទ្យាសាស្ត្រនេះ នឹងក្លាយជាផ្ទះទីពីរ​ដ៏កក់ក្តៅសម្រាប់សិស្សា​នុសិស្ស​ដែលស្រឡាញ់ការសិក្សា និងមានស្មារតីចង់ចេះចង់ដឹង។”

ឯកឧត្តមក៏បានលើកទឹកចិត្តដល់សិស្សានុសិស្សទាំងអស់ ឱ្យខិតខំក្រេបជញ្ជក់ចំណេះដឹងពីធនធាន​ទាំងនេះ ដើម្បីបណ្តុះបណ្តាលខ្លួនឱ្យក្លាយជា “គ្រាប់ពេជ្រ” ជំនាន់ថ្មីដ៏មានតម្លៃសម្រាប់អនាគតកម្ពុជា។

ឯកឧត្តម Shri Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជា បានលើកឡើងថា គម្រោងនេះគឺជា​សក្ខីភាពដែលឆ្លុះបញ្ចាំងពីជំនឿចិត្តរួមគ្នារវាងប្រទេសទាំងពីរ ដែលចាត់ទុកការអប់រំផ្នែកវិទ្យាសាស្ត្រ ជាកត្តា​ចាំបាច់មិនអាចខ្វះបាន សម្រាប់ការអភិវឌ្ឍប្រកបដោយចីរភាព។ ឯកឧត្តមបានបន្ថែមថា បណ្ណាល័យនេះនឹងជំរុញ ឱ្យអ្នកសិក្សាវ័យក្មេង មិនត្រឹមតែចំណាយពេលអានប៉ុណ្ណោះទេ ប៉ុន្តែថែមទាំងអាចអនុវត្តការពិសោធន៍ ចេះចោទ សួរ និងមានភាពច្នៃប្រឌិតខ្ពស់។

ទន្ទឹមនឹងការសម្ពោធសមិទ្ធផលថ្មីនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងស្ថានទូតឥណ្ឌាប្រចាំកម្ពុជា ក៏បានចុះអនុស្សរណៈនៃការយោគយល់ ដើម្បីសាងសង់បណ្ណាល័យវិទ្យាសាស្ត្រទីពីរ​ក្នុង​ស្រុកសង្កែ។ ក្នុងក្របខ័ណ្ឌនៃគោលនយោបាយ “Act East” របស់ឥណ្ឌា កម្ពុជាបានទទួល​ការគាំទ្រលើគម្រោង QIP សរុបចំនួន ៦៦ គម្រោង រួមទាំងគំនិតផ្តួចផ្តើមសាងសង់បណ្ណាល័យវិទ្យាសាស្ត្រទាំងពីរ ដែលក្នុងនោះគម្រោង ៤៧ ត្រូវបានបញ្ចប់។

តាមការរំពឹងទុក គំនិត​ផ្ដួច​ផ្ដើមនេះនឹងផ្តល់អត្ថប្រយោជន៍ដោយផ្ទាល់ដល់សិស្សានុសិស្សប្រមាណ ១៥០០នាក់ព្រមទាំងរួមចំណែកគាំទ្រចក្ខុវិស័យកម្ពុជាឆ្នាំ២០៥០ ដែលបានកំណត់យកវិស័យស្ទែមជាកាតាលីករគន្លឹះ ក្នុងការជំរុញ​កំណើន​សេដ្ឋ​កិច្ចក្នុងបរិបទនៃបដិវត្តន៍ឧស្សាហកម្ម ៤.០៕