ក្រសួងមហាផ្ទៃកាលពីពេលថ្មីៗនេះ បានប្រកាសការដាក់ឱ្យប្រើប្រាស់ជាផ្លូវការនូវប្លង់បង្គន់អនាម័យស្តង់ដាប្រកបដោយបរិយាបន្ន នៅតាមសាលាឃុំ សង្កាត់ ទូទាំងប្រទេស ដើម្បីលើកកម្ពស់អនាម័យបរិស្ថាន និងសោភ័ណភាពនៅតាមមូលដ្ឋាន ជួយសម្រួលដល់ប្រជាពលរដ្ឋ ចាស់ជរា ស្ត្រីមានផ្ទៃពោះ កុមារ ជនមានពិការភាពដែលមកស្នើសុំ និងទទួល​សេវារដ្ឋបាល នៅសាលាឃុំ សង្កាត់ និងក្រុមប្រឹក្សា បុគ្គលិកបម្រើការងារនៅរដ្ឋបាលឃុំ សង្កាត់អាចប្រើប្រាស់បានសមរម្យ ប្រកបដោយអនាម័យ និងផាសុខភាព។

បង្គន់អនាម័យស្តង់ដាប្រកបដោយបរិយាបន្ន នៅតាមសាលាឃុំ-សង្កាត់ នេះ បានសិក្សា និងគូរប្លង់ក្រោមកិច្ចសហការរវាងក្រសួងមហាផ្ទៃ និងអង្គការក្លែនអន្តរជាតិកម្ពុជា។

លោក យី គឹមថាន នាយក​អង្គការ​ភ្លែន​កម្ពុជា មាន​ប្រសាសន៍​ថា បញ្ហាចម្បងមួយដែលនាំឱ្យមានការរចនាប្លងបង្គន់អនាម័យប្រកបដោយបរិយាបន្ននៅតាមសាលាឃុំ សង្កាត់នេះ ក៏ដោយសារសង្កេតឃើញថា នៅតាមសាលាឃុំសង្កាត់​មួយ​ចំនួន​មិនទាន់មានបង្គន់អនាម័យប្រកបដោយបរិយាបន្ន ជាពិសេសសម្រាប់ជនមានពិការភាព ស្រី្តមានផ្ទៃពោះ ស្រ្តីវ័យជំទង់ កុមារ ចាស់ជរា ជាដើម។ បើតាម​លោក គឹមថាន កន្លងមក នៅសាលាឃុំមានតែមួយបន្ទប់ ប្រើទាំងស្រី ទាំងប្រុសរួមគ្នា ដោយមិនមានកន្លែងសម្រាប់ជនមានពិការភាព ហើយមនុស្សចាស់ជរាចូលទៅអាចរអិលដួល។

នាយក​អង្គការ​ភ្លែន​កម្ពុជា មានប្រសាសន៍បន្តថា ដើម្បីដោះស្រាយបញ្ហានេះ អង្គការភ្លែនបានពិភាក្សាជាមួយក្រសួងមហាផ្ទៃ ពីការរៀបចំឱ្យបង្គន់អនាម័យមានស្តង់ដាបរិយាបន្នមួយ ព្រោះថា ពលរដ្ឋគ្រប់ស្រទាប់វណ្ណៈ ទាំងអ្នកក្រ ទាំងអ្នកមាន ស្រ្តីមានផ្ទៃពោះ កុមារ ជនមានពិការភាព ត្រូវទៅទទួលសេវានៅសាលាឃុំ ហើយបង្គន់ស្តង់ដានេះ នឹងអាចជួយឱ្យប្រជាពលរដ្ឋដែលទៅទទួលសេវានៅសាលាឃុំ សង្កាត់អាចប្រើប្រាស់បាន ដោយសារការរៀបចំបែបលក្ខណៈបរិយាបន្ន និងមានលក្ខណៈមេត្រី។ លោកបន្តថា កិច្ចការនេះ ក៏ស្របនឹងចក្ខុវិស័យរបស់អង្គការភ្លែន ក៏ដូចជារាជរដ្ឋាភិបាល ក្នុងការធ្វើឱ្យប្រជាពលរដ្ឋ ជាពិសេសកុមាររស់នៅក្នុងបរិស្ថានអនាម័យ និងមានសុខភាពល្អ ក៏ដូចជាជំរុញឱ្យប្រទេសកម្ពុជាបញ្ឈប់ការបន្ទោរបង់ពាសវាលពាសកាល។

លោក យី គឹមថាន បញ្ជាក់បន្ថែមថា ការរចនាប្លង់បង្គន់អនាម័យ គឺបានគិតគូរទៅដល់ជនមានពិការភាព ដោយមានជម្រាល មានស្លាកសញ្ញាត្រឹមត្រូវ ទ្វារចូលអាចឱ្យរទេះអាចបង្វិលបាន និងមានបង្កាន់ដៃបង្កភាពងាយស្រួល។ លើសពីនេះ មានបន្ទប់សម្រាប់ស្រ្តីនៅដាច់ដោយឡែកពីបុរស ដោយគិតគូររៀបចំឱ្យមានកន្លែងផ្លាស់ប្ដូរសំឡីអនាម័យ មានធុងសំរាមត្រឹមត្រូវ។ ជាពិសេសមានបន្ទប់សម្រាប់កុមារា កុមាររីផងដែរ។

“យើងធ្វើម៉េចបង្គន់អនាម័យនេះ គឺមានលក្ខណៈមេត្រីភាពសម្រាប់ជនមានពិការភាព ស្រ្តីមានផ្ទៃពោះ ចាស់ជរា ក្មេងស្រី ស្រ្តី និងកុមារ”

នាយក​អង្គការ​ភ្លែន​កម្ពុជា បន្ថែមថា ការរៀបចំដំណើរការរចនាប្លង់បង្គន់អនាម័យស្តង់ដាប្រកបដោយបរិយាបន្ននេះ ប្រើរយៈពេលមួយឆ្នាំ ក្នុងការរៀបចំឱ្យចេញជាប្លង់គំរូ តាមរយៈការចុះប្រមូលព័ត៌មាន ប្រជុំពិគ្រោះយោបល់ជាច្រើនដំណាក់កាលជាមួយក្រសួងពាក់ព័ន្ធ អង្គការ ស្ថានប័នដែលធ្វើការទៅលើអនាម័យ ជាពិសេសសម្រាប់ជនមានពិការភាព និងជនងាយរងគ្រោះ។ លោកបន្តថា សម្រាប់​ប្លង់បង្គន់អនាម័យស្តង់ដាប្រកបដោយបរិយាបន្ននេះ បានសាកល្បង​សាងសង់​បង្គន់អនាម័យនៅឆ្នាំ២០២៤ ចំនួន៣ កន្លែងនៅខេត្តសៀមរាប គឺស្រុកក្រឡាញ់ ស្រុកអង្គរធំ និងនៅដើមឆ្នាំ២០២៥នេះ បានសាងសង់ចំនួន ២កន្លែងទៀត នៅក្នុងខេត្តរតនគិរី។ បន្ទាប់ពីបានសាកល្បងសាងសង់មក ក្រសួងមហាផ្ទៃបានសម្រេចដាក់ឱ្យប្រើប្រាស់ និងបញ្ជូនទៅតាមរាជធានីខេត្ត ក្នុងការពិចារណាសាងសង់បង្គន់អនាម័យស្តង់ដាប្រកបដោយបរិយាបន្ននៅតាមសាលាឃុំ សង្កាត់ ទូទាំងប្រទេស។

គួរជំរាបជូនថា បង្គន់អនាម័យស្តង់ដាប្រកបដោយបរិយាបន្ន សំដៅលើបង្គន់ដែលមានអនាម័យ សុវត្ថិភាព មានស្លាកសញ្ញាត្រឹមត្រូវ និងបម្រើដល់មនុស្សគ្រប់និន្នាការភេទ​គ្មានការរើសអើង និងមានជម្រាលសម្រាប់ជនមានពិការភាព​ផងដែរ៕