ក្រសួងអប់រំ យុវជន និងកីឡា កំពុងកំណត់ស្តង់ដារៀបចំការសិក្សាថ្នាក់បណ្ឌិតនៅតាមគ្រឹះស្ថានឧត្តមសិក្សា ក្រោមឱវាទក្រសួងអប់រំ យុវជន និងកីឡា ដើម្បីពង្រឹងគុណវុឌ្ឍិបណ្ឌិតនៅកម្ពុជា ដែលរួមមាន លក្ខខណ្ឌនៃការជ្រើសរើសបេក្ខជនបណ្ឌិត ប្រធានបទនិក្ខេបបទ ការរៀបចំកម្មវិធីសិក្សា យន្តការពិនិត្យវឌ្ឍនភាពនៃការសិក្សា និងការស្រាវជ្រាវ គុណវុឌ្ឍិគ្រូបង្រៀន និងគ្រូដឹកនាំ ការសរសេរ និងការពារនិក្ខេបបទបញ្ចប់ការសិក្សា។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការកំណត់ស្តង់ដាដើម្បីរៀបចំការសិក្សាថ្នាក់បណ្ឌិតនេះ ធ្វើឡើងក្នុងគោលបំណងពង្រឹងគុណភាពនៃការអនុវត្តការបណ្ដុះបណ្ដាលថ្នាក់បណ្ឌិតនៅតាមគ្រឹះស្ថានឧត្តមសិក្សានានា នៅក្រោមឱវាទក្រសួងអប់រំ យុវជន និងកីឡា។

អ្នកនាំពាក្យក្រសួងអប់រំ បន្ថែមថា ចំពោះការវាយតម្លៃនិក្ខេបបទថ្នាក់បណ្ឌិត ក្រសួងអប់រំ តែងតែធ្វើការងារជិតស្និទ្ធ ជាមួយគ្រឹះស្ថានឧត្តមសិក្សានានា និងធ្វើការត្រួតពិនិត្យពីការរៀបចំនិក្ខេបបទ ក៏ដូចជាដំណើរការនៃការការពារនិក្ខេបបទ និងចំណុចបច្ចេកទេសនានា មុននឹងអនុញ្ញាតិទទួលស្គាល់ផ្តល់សញ្ញាបត្របណ្ឌិត។ បច្ចុប្បន្ននេះ ក្រសួងក៏បានរៀបចំយន្តការត្រួតពិនិត្យកម្រិតក្រសួង (Software) ក្នុងការពិនិត្យមើលអំពីការចម្លងស្នាដៃ ឬការប្រើប្រាស់ប្រព័ន្ធបញ្ញាសប្បនិម្មិតជាដើម។

ថ្លែងក្នុងកិច្ចប្រជុំពិគ្រោះយោបល់ ស្ដីពី “ការពិនិត្យវឌ្ឍនភាពនៃការកំណត់ស្តង់ដាដើម្បីរៀបចំការសិក្សាថ្នាក់បណ្ឌិត” កាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានផ្ដល់អនុសាសន៍ដល់ក្រុមការងារ ដើម្បីឱ្យការកំណត់ស្តង់ដាលើការរៀបចំការសិក្សាថ្នាក់បណ្ឌិត កាន់តែមានប្រសិទ្ធភាព និងគុណភាព ត្រូវរៀបចំគណៈកម្មការត្រួតពិនិត្យ និងវាយតម្លៃតាមជំនាញ, មាននីតិវិធីនៃការជ្រើសរើសនិស្សិតចូលរៀនផ្អែកលើការពារសំណើស្រាវជ្រាវបឋម។

ឯកឧត្ដមបណ្ឌិតសភាចារ្យ ហង់ជួន ណារ៉ុន ស្នើ​ឱ្យ​មានការ​ពង្រឹងគុណវុឌ្ឍិគ្រូដឹកនាំឱ្យមានសមត្ថភាពលើប្រធានបទស្រាវជ្រាវ និងនិក្ខេបបទច្បាស់, ផ្សព្វផ្សាយយន្តការពង្រឹងគុណភាពថ្នាក់បណ្ឌិតនេះ ឱ្យបានទូលំទូលាយជាមួយគ្រឹះស្ថានឧត្តមសិក្សារដ្ឋ និងឯកជន, រៀបចំបណ្ណាល័យអេឡិចត្រូនិក ក៏ដូចជាប្រមូលផ្តុំរាល់និក្ខេបបទដែលមានការឯកភាពឱ្យផ្សព្វផ្សាយបន្ត និងដាក់នៅបណ្ណាល័យ។ ទន្ទឹមគ្នានេះ មានយន្តការច្បាស់លាស់ក្នុងការគ្រប់គ្រងក្រមសីលធម៌នៃការបោះពុម្ពផ្សាយ ជាពិសេសការពារលើការលួចចម្លងស្នាដៃ និងការប្រើប្រាស់បញ្ញាសិប្បនិម្មិត (AI)ទាំងស្រុងក្នុងការសរសេរនិក្ខេបបទ និងការបោះពុម្ពផ្សាយ។

គួរបញ្ជាក់ថា នៅរាល់ដំណើរការនៃការរៀបចំក្របខណ្ឌកម្មវិធីសិក្សា ក៏ដូចជាក្របខណ្ឌកម្មវិធីបណ្ដុះបណ្ដាល ដើម្បីទទួលបានសញ្ញាបត្រនីមួយៗ ក្រសួងអប់រំតែងរៀបចំស្របទៅតាមក្របខណ្ឌគុណវុឌ្ឍិជាតិកម្ពុជា ដែលក្របខណ្ឌនេះ ជាក្របខណ្ឌកម្រិតថ្នាក់ជាតិ៕