ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានលើកទឹកចិត្តឱ្យ​មានការ​បង្កើតវេទិកាឌីជីថលអប់រំភាសាបារាំង និង​ប្រើប្រាស់​បណ្តាញផ្សព្វផ្សាយ​សង្គម​ឱ្យ​បានទូលំទូលាយ ដើម្បីចែករំលែកចំណេះដឹង និងលើក​កម្ពស់​ការរៀន​ភាសាបារាំង​នៅ​កម្ពុជា​ឱ្យ​កាន់តែ​ប្រសើរឡើង។

ការលើកទឹកចិត្តនេះ បានធ្វើឡើង​ក្នុង​ជំនួប ជាមួយលោកស្រី Rennie Yotova ប្រធានផ្នែកអប់រំភាសាបារាំង នៃអង្គការអន្តរជាតិហ្វ្រង់កូហ្វូនី និងការទទួលស្វាគមន៍វត្តមានគ្រូបង្រៀនស្ម័គ្រចិត្តបារាំងអន្តរជាតិ នៃកម្មវិធីបម្លាស់ទីគ្រូបង្រៀនស្ម័គ្រចិត្តបារាំងអន្តរជាតិ កាលពីរសៀលថ្ងៃទី១៥ មករា ឆ្នាំ២០២៥។

ក្នុងជំនួបនោះ បានផ្តោតសំខាន់ទៅលើកិច្ចសហប្រតិបត្តិការរវាងវិស័យអប់រំ និងអង្គការអន្តរជាតិហ្វ្រង់កូហ្វូនី ពិសេសការចូលរួមពង្រឹង និងលើកកម្ពស់ការបង្រៀន និងរៀនភាសាបារាំងនៅកម្ពុជា។

លោកស្រី Rennie Yotova បានលើកឡើងថា កម្មវិធីបម្លាស់ទីគ្រូបង្រៀនស្ម័គ្រចិត្តបារាំងអន្តរជាតិ ជាកម្មវិធីដ៏ល្អមួយ​របស់អង្គការអន្តរជាតិហ្វ្រង់កូហ្វូនីចាប់តាំងពីឆ្នាំ២០២០ និងក្នុងឆ្នាំ២០២៦នេះ អង្គការអន្តរជាតិហ្វ្រង់កូហ្វូនីបាន​ជ្រើសរើសគ្រូបង្រៀនស្ម័គ្រចិត្តបារាំង​អន្តរជាតិដែលមានសមត្ថភាពចំនួន១៣រូប មកបំពេញភារកិច្ចនៅ​តាមបណ្ដា​គ្រឹះស្ថានអប់រំ ក្នុងគោលដៅលើកកម្ពស់ការបង្រៀន និងរៀនភាសាបារាំង តាមរយៈសកម្មភាពបណ្ដុះបណ្ដាល ការបង្កើតក្លឹបសិក្សាភាសាបារាំង សកម្មភាពសិល្បៈ និងវប្បធម៌នានា ដើម្បីឆ្លើយតបទៅនឹងតម្រូវការជាក់ស្ដែងរបស់គ្រូ និងសិស្ស។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី មានប្រសាសន៍​ដោយស្វាគមន៍​ចំពោះវត្តមាន​គ្រូបង្រៀនស្ម័គ្រចិត្ត​បារាំងអន្តរជាតិ នៃកម្មវិធី​បម្លាស់ទី​គ្រូបង្រៀនស្ម័គ្រចិត្តបារាំង​អន្តរជាតិ ទាំង១៣រូប។ ឯកឧត្តមបាន​គូសបញ្ជាក់ថា វត្តមានរបស់លោកគ្រូ អ្នកគ្រូស្ម័គ្រចិត្ត មិនត្រឹមតែជួយពង្រឹងសមត្ថភាព​ភាសាបារាំង​ដល់សិស្សានុសិស្ស​ប៉ុណ្ណោះទេ ប៉ុន្តែថែមទាំងឆ្លុះបញ្ចាំង​ពីស្មារតីសាមគ្គីភាពអន្តរជាតិ និងជាការរួមចំណែកយ៉ាង​សំខាន់ក្នុង​ការត្រៀម​លក្ខណៈរៀបចំ កិច្ចប្រជុំកំពូលហ្វ្រង់កូហ្វូនី ដែលកម្ពុជានឹងធ្វើជាម្ចាស់ផ្ទះនាពេលខាងមុខ។

សូមជំរាបជូនថា ប្រទេសកម្ពុជានឹងធ្វើជាម្ចាស់ផ្ទះ​ក្នុងការរៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅខេត្តសៀមរាប ក្នុងឆ្នាំ២០២៦នេះ ដែលជាលើកទីមួយក្នុងរយៈពេលជិត ៣០ឆ្នាំចុងក្រោយ ដែលកិច្ចប្រជុំកំពូលហ្វ្រង់កូហ្វូនី ត្រូវបាន​រៀបចំឡើង​នៅតំបន់អាស៊ីអាគ្នេយ៍៕