ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សប្តាហ៍នេះអង្គការលើកកម្ពស់វិស័យអំណាន រូមធូរីដកម្ពុជា (RTR) បានរៀបចំវគ្គបំប៉នចំនួនពីរថ្ងៃជូនដល់លោកគ្រូអ្នកគ្រូនៅតាមសាលារៀនគោលដៅ អំពីវិធីសាស្ត្រអានអំណានប្រកបដោយប្រសិទ្ធភាព និងមានភាពទាក់ទាញសម្រាប់សិស្សានុសិស្ស ។ ផ្អែកតាមលទ្ធផលទទួលបានពីវគ្គបណ្តុះបណ្តាលរយៈពេលបីឆ្នាំនៃកម្មវិធីបណ្តុះបណ្តាលជាប្រចាំ ស្ថានភាពខ្ចីសងសៀវភៅអំណានរបស់សិស្សមានការកើនឡើងគួរឱ្យកត់សម្គាល់នៅក្នុងចំណោមសាលារៀនគោលដៅចំនួន ២១១សាលារៀនទូទាំងប្រទេស ។ បច្ចុប្បន្នរយៈពេលមួយឆមាសសិស្សម្នាក់ខ្ចីសងសៀវភៅពីបណ្ណាល័យនៅសាលារៀនរបស់ខ្លួន គិតជាមធ្យមបានចំនួន ៩ក្បាល ។
លោក ហោ សុខៈ នាយកកម្មវិធីអំណានរបស់អង្គការរូមធូរីដកម្ពុជា មានប្រសាសន៍ថា ការបណ្តុះបណ្តាលជាបន្តបន្ទាប់អំពីសកម្មភាពអំណាននៅក្នុងបណ្ណាល័យបានចូលរួមចំណែកពង្រឹកចំណេះដឹងរបស់សិស្សានុសិស្សនៅកម្រិតបឋមសិក្សា និងលើកទឹកចិត្តលោកគ្រូអ្នកគ្រូ ព្រមទាំងសិស្សានុសិស្សឱ្យចូលចិត្តអំណាន។
លោក ហោ សុខៈ នាយកកម្មវិធីអំណានរបស់អង្គការរូមធូរីដកម្ពុជា មានប្រសាសន៍បន្តថា មុនដំណាក់កាលរីករាលដាលជំងឺផ្លូវដង្ហើមកូវីដ-១៩ អត្រាខ្ចីសងសៀវភៅពីបណ្ណាល័យ គិតជាមធ្យម ៣២,៩ក្បាលក្នុងមួយឆ្នាំសម្រាប់សិស្សម្នាក់ ។ ចំណែកបច្ចុប្បន្នរយៈពេលមួយឆមាសសិស្សម្នាក់ខ្ចីសងសៀវភៅពីបណ្ណាល័យ គិតជាមធ្យមបានចំនួន ៩ក្បាល ឬប៉ានប្រមាណស្មើនឹង ១៨ក្បាល់ក្នុងរយៈពេលមួយឆ្នាំ ហើយអត្រាខ្ចីសងនេះនឹងបន្តកើនឡើងជាបន្តបន្ទាប់ ។
នាយកកម្មវិធីអំណានរបស់អង្គការរូមធូរីដកម្ពុជា បានបញ្ជាក់បន្ថែមថា គោលបំណងវគ្គបណ្តុះបណ្តាលកម្មវិធីម៉ោងបណ្ណាល័យនេះ បានជួយរំលឹកលោកគ្រូអ្នកគ្រូឡើងវិញអំពីវិធីអានឱ្យកាន់តែប្រសើរឡើង ដើម្បីទាក់ទាញសិស្សឱ្យចូលចិត្តអំណាន ព្រមទាំងបង្កើនលទ្ធភាពខ្ចីសងសៀវភៅពីបណ្ណាល័យឱ្យបានកាន់តែច្រើន ។
ជាមួយគ្នានេះដែរ វគ្គបំប៉នស្ដីពីសកម្មភាពអំណាននៅក្នុងបណ្ណាល័យដល់លោកគ្រូអ្នកគ្រូនៅទូទាំងសាលាគោលដៅ ក៏បានបញ្ជ្រាបពីវិធីសាស្ត្របង្កើននិរន្តភាពបណ្ណាល័យដល់លោកគ្រូអ្នកគ្រូ និងរបៀបជួយសិស្សនៅថ្ងៃព្រហស្បតិ៍ ដើម្បីឱ្យពួកគេរៀនសូត្របន្តជាប់មធ្យមភាគ ។ ឆ្លងកាត់សកម្មភាពបណ្តុះបណ្តាលនៅសាលារៀនតំបន់គោលដៅ ជាលទ្ធផលគ្រូបង្រៀនប្រមាណជាង ៩៧ភាគរយបានដឹកនាំសិស្សចូលបណ្ណាល័យយ៉ាងទៀងទាត់ ។
សូមជម្រាបថា អង្គការរូមធូរីដកម្ពុជាបានរៀបចំវគ្គបណ្តុះបណ្តាលពង្រឹងគុណភាពអំណានដល់លោកគ្រូអ្នកគ្រូនៅសាលារៀនគោលដៅនីមួយៗ មានរយៈពេល ៣ឆ្នាំជាប់ៗគ្នា ។ នាយក កម្មវិធីអំណាននៃអង្គការរូមធូរីដកម្ពុជា រំពឹងថា ស្ថានភាពខ្ចីសងសៀវភៅរបស់សិស្សនឹងបន្តកើនឡើងគួរឱ្យកត់សម្គាល់នឹងឈានទៅដល់អត្រាកំណើនខ្ចីសងដូចមុនការរីករាលដាលជំងឺកូវីដ-១៩ ។ សកម្មភាពខ្ចីសងសៀវភៅរបស់សិស្សកាន់តែច្រើនជាសញ្ញាវិជ្ជមានមួយបញ្ជាក់ថា សិស្សចាប់ផ្តើមស្រឡាញ់អំណាន ពង្រឹងគុណភាពអប់រំតាមរយៈអំណាន ព្រមទាំងបង្កើតទម្លាប់អានពេញមួយជីវិត ៕
