ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយប្រឡងបញ្ចប់ថ្នាក់ទី១២ ការជ្រើសរើសជំនាញសិក្សានៅតែជាក្ដីកង្វល់សម្រាប់សិស្សានុសិស្ស ។ ទន្ទឹមគ្នានេះ មានសិស្សានុសិស្សមួយចំនួនបានស្គាល់ច្បាស់ពីគោលដៅ និងក្ដីស្រមៃរបស់ខ្លួននៅថ្ងៃអនាគត ចំណែកសិស្សានុសិស្សមួយចំនួនទៀតនៅតែមិនច្បាស់ក្នុងចិត្តថា គួររៀនជំនាញតាមក្ដីស្រឡាញ់ ឬតាមទីផ្សារការងារ?
លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា ការជ្រើសរើសជំនាញសិក្សាបន្តនៅសាកលវិទ្យាល័យ យុវជនរៀនតាមក្ដីស្រឡាញ់ក៏បាន រៀនតាមទីផ្សារការងារក៏បានឱ្យតែរៀនចេះ នោះនឹងមិនពិបាករកការងារធ្វើឡើយ។ លោក គីម ដារ៉ា បន្តថា លោកសង្កេតឃើញថា ទីផ្សារការងារផ្នែកបច្ចេកវិទ្យាសព្វថ្ងៃមានតម្រូវការខ្ពស់ ព្រោះកំពុងខ្វះអ្នកជំនាញច្បាស់លាស់ ប៉ុន្តែបើមើលឱ្យច្បាស់ទៅ គឺនៅខ្វះស្ទើរតែគ្រប់ផ្នែក ព្រោះតែខ្វះអ្នកចេះពិតប្រាកដ។
«យុវជនរៀនជំនាញអ្វីមួយរៀនច្រើនគ្នា ប៉ុន្តែនៅពេលរកអ្នកចេះមិនសូវមាន។ ដូច្នេះផ្នែកណាក៏យើងនៅខ្វះដែរ ប្រសិនជាត្រូវការអ្នកចេះពិតប្រាកដ ប៉ុន្តែបើអ្នកចេះសើៗគឺសម្បូរ»
លោក គីម ដារ៉ា ស្ថាបនិកសាលាបង្វឹក Startup Community
លោក គីម ដារ៉ា បញ្ជាក់ថា យុវជនត្រូវតែសម្របខ្លួនឱ្យបានតាមតម្រូវការទីផ្សារការងារបច្ចុប្បន្ន ពីព្រោះទីផ្សារការងារនៅស្រុកខ្មែរត្រូវការអ្នកចេះច្បាស់។ ដូច្នេះ យុវជនគួរតែរៀនចេះឱ្យច្បាស់ កុំរៀនសើៗ កុំរៀនលេងៗឱ្យតែរួចពីដៃ ត្រូវប្រាកដប្រជាថា មានជំនាញច្បាស់លាស់។ លោកបន្តថា នៅស្រុកខ្មែរមិនទាន់មានជំនាញណាមួយគ្មានទីផ្សារការងារនោះឡើយ ពីព្រោះគ្រប់ជំនាញទាំងអស់នៅខ្វះអ្នកទៅធ្វើដូចជា គ្រូពេទ្យ វិស្វករ គណនេយ្យ ពន្ធដារ ហិរញ្ញវត្ថុ បុគ្គលិកធនាគារ ផ្នែកសន្តិសុខ និងជំនាញជាច្រើនទៀត។
លោក គីម ដារ៉ា បន្ថែមថា យុវជនមួយចំនួនដំបូងៗគិតថាខ្លួនស្រឡាញ់ជំនាញណាមួយនោះ ប៉ុន្តែដល់ពេលចូលរៀនជាក់ស្ដែងបានដឹងថា ឈប់ស្រឡាញ់ ព្រោះពេលរៀនពិបាកជាងការគិតដែលនាំឱ្យស្ដាយក្រោយ តែបើបានស្វែងយល់ឱ្យស៊ីជម្រៅលើជំនាញនីមួយៗជាមុនសិន គឺរៀនអ្វីដែលខ្លួនស្រឡាញ់ចូលចិត្តពិតប្រាកដទើបសម្រេចចិត្តចូលរៀន គឺមិនខុសបំណងនោះទេ។
ស្ថាបនិកសាលាបង្វឹក Startup Community បន្តថា យុវជនត្រូវយកចិត្តទុកដាក់ និងឱ្យតម្លៃទៅលើការរៀនសូត្រ ព្រោះការរៀនសូត្រដូចជាការសន្សំ ហើយមិនមែនជារឿងងាយនោះទេ ទាមទារឱ្យយើងត្រូវផ្ដល់តម្លៃ យកចិត្តទុកដាក់ ខំប្រឹង ទាល់តែស្ទាត់ជំនាញ។ លោកថា រៀនអ្វីមួយក៏ដោយបើយើងមិនយកចិត្តទុកដាក់ខំប្រឹងប្រែងទេយើងរៀនមិនពូកែទេ៕
