ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យធនធានមនុស្សនៅព្រឹកថ្ងៃទី២០ ខែកុម្ភៈ ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានប្រាប់ទៅដល់រដ្ឋមន្រ្តីក្រសួងអប់រំ យុវជន និងកីឡា សិក្សាពីការផ្តល់កូតា នៃការបណ្តុះបណ្តាលជំនាញវិជ្ជាជីវៈ ទៅដល់សាលាឯកជននានា។
តាមគោលនយោបាយថ្មី រាជរដ្ឋាភិបាលនឹងផ្តល់អាហារូបករណ៍សម្រាប់ការបណ្តុះបណ្តាលជំនាញវិជ្ជាជីវៈទៅដល់យុវជនក្រីក្រចំនួន១លាន៥សែននាក់ជារៀងរាល់ឆ្នាំ ដោយក្នុងនោះក៏មានការបែងចែកកូតាប្រមាណ ២ ទៅ៤ភាគរយ សម្រាប់ជំនាញវិជ្ជាជីវៈដូនតា ដែលគ្រប់គ្រងដោយក្រសួងវប្បធម៌ផងដែរ។
សម្តេចតេជោ បានអះអាងថា ការផ្ដល់កូតាឱ្យវិស័យឯកជនចូលរួមក្នុងការបណ្ដុះបណ្ដាលវិជ្ជាជីវៈនេះ គឺនឹងផ្ដល់ភាពងាយស្រួល និងជាការលើកទឹកចិត្តលើការបណ្ដុះបណ្ដាលវិជ្ជាជីវៈផងដែរ។
សម្តេចតេជោ ហ៊ុន សែន លើកឡើងថា ការរៀនជំនាញវិជ្ជាជីវៈ គឺរៀនលឿន និងឆាប់ទទួលបានការងារធ្វើ ។ ក្នុងនោះបើយោងតាមទិន្នន័យ ក៏បានបង្ហាញដែរថា អ្នកដែលរៀនជំនាញវិជ្ជាជីវៈ គឺមានឱកាសទទួលបានការងារធ្វើខ្ពស់ជាងអ្នកដែលរៀនថ្នាក់បរិញ្ញាបត្រ។
សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
“នេះជាបញ្ហាធំងាយរកការងារធ្វើ ព្រោះនេះបានធ្វើឱ្យប្រជាពលរដ្ឋរបស់យើងមានជំនាញវិជ្ជាជីៈសម្រាប់បម្រើដល់ការអភិវឌ្ឍន៍”
ការអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវបានចាត់ទុកថា គឺជាកត្តាមិនអាចខ្វះបានក្នុងការជួយអភិវឌ្ឍសេដ្ឋកិច្ចសង្គម និងជំរុញឱ្យអ្នកសិក្សាទទួលបាននូវចំណេះដឹង ជំនាញបច្ចេកទេសជាមួយសមត្ថភាពពិតប្រាកដ ដើម្បីក្លាយខ្លួនជាពលករជំនាញ អ្នកជំនាញបច្ចេកទស ព្រមទាំងចូលរួមចំណែកយ៉ាងសំខាន់ក្នុងការអភិវឌ្ឍសង្គម និងសេដ្ឋកិច្ចជាតិ។
ដោយមើលឃើញពីសារៈសំខាន់នេះ រាជរដ្ឋាភិបាលបានដាក់ចេញនូវគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ដោយមានចក្ខុវិស័យលើកកម្ពស់ជីវភាពរស់នៅ សេចក្តីថ្លៃថ្នូររបស់ប្រជាពលរដ្ឋ បង្កើនបាននូវកម្លាំងពលកម្ម ឬធនធានមនុស្សកម្ពុជាប្រកបដោយចំណេះដឹង ជំនាញ ឥរិយាបថការងារ សីលធម៌វិជ្ជាជីវៈ ផលិតភាពខ្ពស់ និងមានលក្ខណៈប្រកួតប្រជែងសម្រាប់ការងារពេញមួយជីវិត៕
