ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសអញ្ជើញជាអធិបតី ក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា២០២៣-២០២៤ និងទិសដៅឆ្នាំ២០២៤-២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានផ្តល់អនុសាសន៍ដល់ក្រសួងអប់រំ ក្នុងការបន្តពង្រឹងវិស័យអប់រំ ដោយថា មានវិធានមួយសំខាន់ នោះគឺការពង្រឹងការអប់រំថ្នាក់មូលដ្ឋាន ព្រោះការអប់រំ ត្រូវតែមានគ្រឹះរឹងមាំតាំងពីថ្នាក់មូលដ្ឋានមក។
សម្តេចធិបតីមានប្រសាសន៍ថា សម្រាប់ការអប់រំ ការពង្រឹងមូលដ្ឋានគឺជាកិច្ចការសំខាន់ ដោយកន្លងមកសម្តេចបានដាក់ទិសដៅ១២ឆ្នាំដំបូងសម្រាប់ការសិក្សារបស់សិស្ស ពោលគឺពីថ្នាក់បឋមសិក្សា រហូតដល់ចប់ថ្នាក់វិទ្យាល័យ, សម្តេចបញ្ជាក់ថា ក្នុងដំណាក់កាលទី១នេះ យើងចាំបាច់ត្រូវពង្រឹងការសិក្សានៅបឋមសិក្សាឱ្យបានច្បាស់ និងរឹងមាំ។
សម្តេចនាយករដ្ឋមន្រ្តីបញ្ជាក់ថា បើសិស្សរៀននៅថ្នាក់បឋមសិក្សាមិនមានមូលដ្ឋានរឹងមាំ គឺកុំនិយាយថា ពេលពួកគេទៅរៀនថ្នាក់អនុវិទ្យាល័យអាចចេះសរសេរត្រឹមត្រូវ បូកលេខត្រឹមត្រូវនោះ ហើយបើសិនជាមូលដ្ឋានថ្នាក់អនុ ឬវិទ្យាល័យមិនត្រឹមត្រូវ ក៏កុំថាទៅបានសញ្ញាបត្រ ឬទៅរៀនថ្នាក់បរិញ្ញាបត្រមានគុណភាពអី។
“…វាមានតែសញ្ញាបត្រ តែសញ្ញាឃើញវាអត់មាន អញ្ចឹងបានត្រូវពង្រឹងខាងក្រោមឱ្យរឹងមាំ”
សម្តេចនាយករដ្ឋមន្រ្តីបានមានប្រសាសន៍ជាថ្មីទៀតថា ដូច្នេះការពង្រឹងវិស័យអប់រំ ជាជំហានទី១ គឺត្រូវផ្តោតទៅលើការពង្រឹងបឋមសិក្សា ដោយមានតួអង្គ៣ គឺទី១ គណៈគ្រប់គ្រងសាលា, ទី២ បុគ្គលិកអប់រំ និងទី៣ គ្រូបង្រៀន ហើយក្នុងចំណោមតួរអង្គទាំង៣ គឺមានពីរតួរអង្គសំខាន់ គឺនាយកសាលា និងតួអង្គគ្រូបង្រៀន។
សម្តេចបានធ្វើការបញ្ជាក់ចំពោះតួអង្គនាយកសាលាថា គឺជាមេបានៃស្ថាប័ន ជាអ្នកកាន់ចង្កូត ជាអ្នកដើរតួនាទីក្នុងការសម្របសម្រួលដឹកនាំអនុវត្តគោលការណ៍ កម្មវិធីដែលក្រសួងដាក់មកឱ្យបានត្រឹមត្រូវ ដូច្នេះការជ្រើសរើសនាយកសាលាគឺចាំបាច់ឱ្យបានច្បាស់លាស់តាមនិយាម។
ដោយឡែកគ្រូបង្រៀននៅថ្នាក់បឋមសិក្សា ក៏សំខាន់និងជាកិច្ចការប្រឈម ដោយសម្តេចបញ្ជាក់ថា គ្រូបង្រៀនថ្នាក់បឋមសិក្សា គឺចាំបាច់ត្រូវគិតពីគុណភាព ដោយមិនមែនគិតពីបរិមាណឡើយ។ សម្តេចមានប្រសាសន៍ថា បច្ចុប្បន្នយើងត្រូវនិយាយពីគុណភាព គឺត្រូវមានគុណវុឌ្ឍច្បាស់លាស់ ហើយស្របតាមនិយាមដែលកំណត់ដោយក្រសួង។ ហើយការជ្រើសរើសគ្រូ ក៏កាន់តែសំខាន់ទៅទៀត ព្រោះគ្រូនៅផ្ទាល់ក្នុងការបង្ហាត់បង្រៀនសិស្ស។ “កុំគិតថាគ្រូបឋមទាប មិនសំខាន់… គឺជារឿងគ្រោះថ្នាក់ ព្រោះចាក់គ្រឹះមិនរឹងមាំ នឹងធ្វើឱ្យរង្គើរនៅខាងលើ… អញ្ចឹងត្រូវរើសគ្រូថ្នាក់បឋម ត្រូវរើសឱ្យបានត្រូវតែម្តង ឱ្យរឹងមាំ ទាំងនាយក ទាំងគ្រូ ធ្វើយ៉ាងម៉េចឱ្យមានគុណវុឌ្ឍ…”៕
