ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ថ្លែងក្នុងពិធីបិទវគ្គបណ្តុះបណ្តាលឆ្នាំ២០២២ និងបើកវគ្គបណ្តុះបណ្តាលឆ្នាំ២០២៣ របស់សាលាភូមិន្ទរដ្ឋបាល (ERA) នាព្រឹកថ្ងៃទី២៧ ខែមេសា ឆ្នាំ២០២៣ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្នើឱ្យប្រជាពលរដ្ឋមេត្តារៀបចំឥរិយាបទថ្លៃថ្នូរ ខណៈប្រទេសកម្ពុជាទទួលធ្វើជាម្ចាស់ផ្ទះ នៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ។
ក្នុងនោះដែរ សម្ដេចតេជោ ហ៊ុន សែន ក៏បានស្នើដល់អាជ្ញាធររាជធានី-ខេត្តទាំងអស់ ត្រូវរៀបចំកន្លែងសម្រាប់ប្រជាជនទស្សនាការប្រកួតកីឡាឱ្យបានច្រើនកន្លែង ដោយត្រូវរៀបចំស្លាយ រៀបចំទីតាំង ដើម្បីឱ្យប្រជាពលរដ្ឋបានសប្បាយក្នុងឋានៈជាម្ចាស់ផ្ទះ ប្រកបដោយភាពថ្លៃថ្នូរ ព្រោះប្រជាពលរដ្ឋចង់មើលព្រឹត្តិការណ៍ប្រកួតកីឡានេះណាស់។
នាយករដ្ឋមន្ត្រី នៃព្រះរាជាណាចក្រកម្ពុជា បញ្ជាក់បន្ថែមថា កន្លែងប្រកួតមានកម្រិតទទួលចំនួនមនុស្ស ដោយសារពហុកីឡាដ្ឋានជាតិមិនធំពេកនោះទេ ក្នុងពេលដែលតម្រូវការមនុស្សចូលទស្សនាយ៉ាងច្រើន។ អាស្រ័យហេតុនេះ ការរៀបចំទីកន្លែងសម្រាប់ការមើលខាងក្រៅ គឺជារឿងចាំបាច់ ហើយដែលអាជ្ញាធរគ្រប់ទីកន្លែងត្រូវទទួលខុសត្រូវរៀបចំសម្រាប់ប្រជាពលរដ្ឋ និងត្រូវក្សាសន្តិសុខ។
សម្ដេចតេជោ ហ៊ុន សែន មានប្រសាសន៍ ៖
“ខ្ញុំសូមអំពាវនាវដល់ប្រជាពលរដ្ឋ សូមកុំសម្រុកចូលទៅកន្លែងទស្សនានៅដែលយើងគ្មានសំបុត្រ ព្រោះសំបុត្រគេបានកំណត់លក្ខខណ្ឌអាចចូលបានប៉ុន្មានម៉ឺននាក់? អាស្រ័យហេតុនេះ ការរៀបចំទីកន្លែងសម្រាប់ការមើលខាងក្រៅ គឺជារឿងចាំបាច់ ហើយដែលអាជ្ញាធរគ្រប់ទីកន្លែងត្រូវទទួលខុសត្រូវរៀបចំសម្រាប់ប្រជាពលរដ្ឋ និងត្រូវក្សាសន្តិសុខ”
ជាមួយគ្នានេះ សម្ដេចតេជោ ហ៊ុន សែន ក៏បានស្នើដល់ប្រជាពលរដ្ឋ និងអ្នកចូលរួមទស្សនាការប្រកួត ពេលមានការប្រកួតគាំទ្រនៅថ្ងៃខាងមុខ សូមកុំលេងគប់ទឹកចូលទៅក្នុងកន្លែងប្រកួត ព្រោះនេះមិនមែនជាទម្លាប់របស់ខ្មែរនោះទេ ។ សម្ដេចសង្កត់ធ្ងន់ថា សម្ដេចជឿថាខ្មែរធ្វើបាន មិនមែនអាចធ្វើបានទេ គឺខ្មែរធ្វើបានតែម្ដង។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រំពឹងថាបងប្អូនប្រជាពលរដ្ឋនឹងចូលរួមចំណែក ដើម្បីលើកកម្ពស់សេចក្ដីថ្លៃថ្នូរ ហើយសេចក្ដីថ្លៃថ្នូររបស់ជាតិយើងនេះ ក៏នឹងក្លាយទៅជាទម្លាប់ដ៏ល្អសម្រាប់ប្រទេសរបស់យើង និងបានជាការស្រឡាញ់រាប់អានពីសំណាក់កីឡាករ កីឡាការិនី និងភ្ញៀវដែលមកទស្សនាក្នុងប្រទេសរបស់យើង៕
