ខណៈដែលបច្ចេកវិទ្យារ៉ូបូទិច និងស្វ័យប្រវត្តិកម្ម ផ្ដល់នូវអត្ថប្រយោជន៍ជាច្រើន មនុស្សក៏បង្ហាញពីក្តីកង្វល់ចំពោះការវិវត្តន៍យ៉ាងឆាប់រហ័សនៃបច្ចេកវិទ្យានេះដែរ។ ក្នុងនោះ ក្តីកង្វល់ធំបំផុត ដែលមនុស្សភាគច្រើនព្រួយបារម្ភ គឺបច្ចេកវិទ្យាស្វ័យប្រវត្តិកម្ម នឹងជំនួសការងាររបស់ខ្លួន។ យ៉ាងណាក៏ដោយ បើយោងតាមស្ថិតិរបាយការណ៍ស្រាវជ្រាវ និងទស្សនៈរបស់អ្នកជំនាញ ឥទ្ធិពលអវិជ្ជមាននៃបច្ចេកវិទ្យានេះ គឺមានតិចជាងការគិតរបស់មនុស្ស។

ការសិក្សាមួយដែលធ្វើឡើងដោយវេទិកាសេដ្ឋកិច្ចពិភពលោក បានព្យាករណ៍ថា នៅឆ្នាំ២០២៥ បច្ចេកវិទ្យាស្វ័យប្រវត្តិកម្ម នឹងបង្កើតការងារបន្ថែមចំនួន ៩៧លានកន្លែង ហើយបច្ចេកវិទ្យានេះ នឹងជំនួសការងារមនុស្សចំនួន ៨៥លានកន្លែង។ ជាលទ្ធផល ការងារនឹងកើនឡើង ចំនួន១២លានកន្លែង។ តាមរយៈការសិក្សានេះ បានគូសបញ្ជាក់ថា ការពង្រឹងជំនាញ និងរៀនជំនាញ គឺមានសារៈសំខាន់ខ្លាំងសម្រាប់បុគ្គលិក ដើម្បីសម្របទៅនឹងបម្រែបម្រួលនៃទីផ្សារការងារ។

លោកបណ្ឌិត ឃុន គីមអាង ប្រធានផ្នែកបច្ចេកវិទ្យានៃក្រុមហ៊ុន AI Farm មានប្រសាសន៍ថា វត្តមាន និងការរីកចម្រើននៃបច្ច្ចេកវិទ្យារ៉ូបូទិច និងស្វ័យប្រវត្តិកម្ម នឹងមិនធ្វើឱ្យមនុស្សបាត់បង់ការងារនោះទេ ប៉ុន្តែបច្ចេកវិទ្យានេះ នឹងផ្លាស់ប្ដូររបៀបមនុស្សធ្វើការ តាមរយៈការជំនួសការងារមួយចំនួន ជាពិសេសការងារដែលប្រើកម្លាំងខ្លាំង និងការងារដដែលៗ ហើយនឹងបង្កើតការងារថ្មីៗមកវិញ។

លោក វឿន យ៉ុងអាន សាស្ត្រាចារ្យផ្នែករ៉ូបូទិច និងស្វ័យប្រវត្តិកម្ម នៃសាកលវិទ្យាល័យខេមតិច មានប្រសាសន៍បន្ថែមថា ប្រសិនបើយើងមើលពីទិដ្ឋភាពប្រវត្តិសាស្ត្រនៃបដិវត្តន៍ឧស្សាហកម្ម តាំងពីជំនាន់ទី១ រហូតដល់ទី៤ យើងមើលឃើញថា បច្ចេកវិទ្យាមិនបានជំនួសការងារមនុស្សទេ ប៉ុន្តែបានការផ្លាស់ប្ដូរទម្រង់ និងរបៀបធ្វើការ ឬយើងអាចនិយាយបានថា តាមរយៈបច្ចេកវិទ្យា នឹងបង្កើតការងារ ដែលមិនទាន់មានពីមុន។

លោកបណ្ឌិត ឃុន គីមអាង បន្ថែមថា ដើម្បីសម្របទៅនឹងបរិបទការងារ ដែលមានបច្ចេកវិទ្យារ៉ូបូទិច មនុស្សត្រូវពង្រឹងប្រសិទ្ធភាព និងសក្តិសិទ្ធភាពក្នុងការបំពេញការងារ ដើម្បីចូលរួមបង្កើនផលិតភាពការងារ និងជំរុញកំណើនសេដ្ឋកិច្ចសង្គម។ លើសពីនេះ សម្រាប់សាធារណៈជន ត្រូវបើកចំហខ្លួនឯង សម្រាប់ការរៀនជំនាញថ្មី​ដើម្បីពង្រឹងសមត្ថភាពបន្ថែម។

“យើងម្នាក់ៗត្រូវពង្រឹងប្រសិទ្ធភាព និងសក្តិសិទ្ធភាពក្នុងការងាររបស់យើង ដើម្បីបង្កើនផលិតកម្ម ដែលជួយជំរុញសេដ្ឋកិច្ច ហើយសាធារណៈទូទៅ គាត់ត្រូវបើកចំហខ្លួនឯង ក្នុងការរៀនជំនាញថ្មីៗ ដើម្បីពង្រឹងខ្លួនឯង និងកែប្រែខ្លួនឯង”

ទាក់ទងនឹងឥទ្ធិពលអវិជ្ជមាននៃបច្ចេកវិទ្យារ៉ូបូទិច លោក វឿន យ៉ុងអាន លើកឡើងថា ជាជាងដែលយើងនិយាយ​ពីផលប៉ះពាល់អវិជ្ជមានបែបណាខ្លះ ក្នុងការប្រើប្រាស់? យើងអាចសួរត្រឡប់មកវិញថា បើយើងមិនប្រើប្រាស់ តើនឹងរងផលប៉ះពាល់អាក្រក់យ៉ាងម៉េចវិញ? ហើយប្រសិនបើយើងតាមមិនទាន់បច្ចេកវិទ្យា ហើយមិនអភិវឌ្ឍបច្ចេកវិទ្យាទាំងនេះនៅក្នុងស្រុកយើងទេ នឹងមានផលប៉ះពាល់បែបណា?

ក្នុងនាមជាអ្នកជំនាញរ៉ូបូទិចលោក យ៉ុងអាន មើលឃើញថា បច្ចេកវិទ្យានេះ មានអត្ថប្រយោជន៍ច្រើន ក្នុងការពង្រឹងផលិតភាពការងារ ដែលជាប្រភពនៃកំណើនសេដ្ឋកិច្ចសង្គម ហេតុនេះ ប្រសិនបើកម្ពុជាមិនទទួលយកបច្ចេកវិទ្យានេះទេ បញ្ហារបស់យើងគឺផលិតភាព នឹងតាមមិនទាន់ប្រទេសដទៃទៀតឡើយ៕