ការបួងសួងដែលត្រឹមត្រូវក្នុង​ឱកាស នៃពិធីបុណ្យ​កាន់បិណ្ឌ និង​ភ្ជុំបិណ្ឌនេះ យុវជនគួរគោរពទៅដល់បុព្វបុរស ដែលបានចាប់កំណើតនៅភពឋានមិនល្អ ហើយបួងសួងសូមឱ្យកុសល ដែលបានធ្វើនៅថ្ងៃនេះ បានទៅដល់សាច់សាលោ​ហិត ដែលបានចែកឋានទៅ សុំឱ្យពួកគាត់ រួចចាកផុតពីទុក្ខ ជាជាង​សុំសេចក្តីសុខផ្ទាល់ខ្លួន, នេះជាការលើកឡើងរបស់ លោកស្រ្តាចារ្យ យូ សុភា អ្នកជំនាញវប្បធម៌ នៃសាកលវិទ្យាល័យភូមិន្ទភ្នំពេញ។

លោកសាស្ត្រាចារ្យ មានប្រសាសន៍ថា ការបួងសួងអំឡុងពេលបុណ្យភ្ជុំ មិនមែនបួងសួងដើម្បីសុំសេចក្ដីសុខខ្លួនឯងនោះទេ ប៉ុន្តែជាការឧទ្ទិសកុសល ដល់បុព្វការីជន ដើម្បីឱ្យគាត់បានរួចផុតចាកពីទុក្ខ ដោយសារគាត់ធ្លាប់បានសាងបាបកម្មណាមួយ ដើម្បីគ្រួសារ និងកូនចៅ ហើយធ្វើឱ្យគាត់ភ្លាត់ស្នៀតទៅចាប់ជាតិ ចាប់កំណើត ក្នុងភពមិនល្អ។

“អំឡុងពេលភ្ជុំបិណ្ឌ ការបួងសួងមិនមែន សុំសេចក្ដីសុខផ្ទាល់ខ្លួន ចាក់ឆ្នោតត្រូវ ឬសុំឱ្យឡើងបុណ្យសក្តិតួនាទីអ្វីនោះទេ ព្រោះលទ្ធផលនេះស្ថិតនៅលើការប្រព្រឹត្តិរបស់យើង ប្រសិនបើយើងខិតខំតស៊ូ ព្យាយាម ប្រឹងប្រែង នោះយើងនឹងទទួលបានផលល្អ…”

ដោយឡែកចំពោះការរៀបចំចង្ហាន់ ដើម្បីយកទៅប្រគេនព្រះសង្ឃនៅវត្តអារាមវិញ បើតាម​លោកសាស្រ្តាចារ្យ មិនចាំបាច់មានអ្វីច្រើនក៏​បាន ព្រោះការធ្វើបុណ្យ គឺអាស្រ័យលើទឹកចិត្ត សទ្ធាជ្រះថ្លារបស់បុគ្គលម្នាក់ៗ បូករួមជាមួយនឹង ធនធានលទ្ធភាព ដែលមានជាក់ស្ដែង។ លោកបន្តថា អ្នកមានច្រើនអាចធ្វើច្រើន មានតិចធ្វើតិច បាយមួយវែក សណ្ដែកមួយគួរ ក៏ជាកុសល ផលបុណ្យរបស់យើងដែរ។

ពាក់ព័ន្ធនឹងការនិយាយស្ដីរបស់យុវជន លោកសាស្ត្រាចារ្យលើកឡើងថា យុវជនខ្មែរ ចាំបាច់ត្រូវចេះសង្រួម មិនថាតែផ្លូវវាចានោះទេ គឺត្រូវការទាំងផ្លូវកាយ វាចា និងចិត្តទាំងព្រមតែម្ដង។ លោកបន្តថា ប្រសិនបើបុគ្គលម្នាក់ៗសង្រួម តែការនិយាយស្ដី ប៉ុន្តែកាយវិការ នៅតែច្រង៉េងច្រង៉ាង ច្រឡឺសបឺស ចិត្តរបស់យើងនៅតែគិតមិនល្អ នោះសកម្មភាពរបស់យើង ក៏មិនស្របគ្នាដែរ។

បើតាមអ្នកជំនាញវប្បធម៌រូបនេះ ឥរិយាបថ និងអាកប្បកិរិយា មានសារៈសំខាន់ សម្រាប់យុវជន មិនថាតែសម្រាប់យុវជនសម័យថ្មីនោះទេ ប៉ុន្តែតាំងពីសម័យបុរាណមក ព្រោះអំឡុងពេលទៅវត្ត និងធ្វើការគោរពបួងសួង សីលធម៌ ដេក ដើរ ឈរ និងអង្គុយ ត្រូវតែសង្រួម។

ជាមួយគ្នានេះ លោកសាស្រ្តាចារ្យ យូ សុភា ក៏បានសំណូមពរទៅកាន់យុវជន ដែលនឹងទៅវត្តអារាម នៅកំឡុងពេលភ្ជុំបិណ្ឌថា ដើម្បីចូលរួម ធ្វើឱ្យសកម្មភាព នៃការធ្វើបុណ្យ និងបួងសួងអំឡុងពេលបុណ្យភ្ជុំបិណ្ឌកាន់តែមានរបៀបរៀបរាយ និងសណ្ដាប់ធ្នាប់ល្អ យើងទាំងអស់គ្នា គួរស្លៀកសំលៀកបំពាក់ឱ្យបានសមរម្យ តាមរបៀប នៃប្រពៃណីខ្មែរយើង ដោយនារីអាចពាក់អាវប៉ាក់ សំពត់ហូលផាមួង ឬសំពត់ខ្មៅធម្មតា ដើម្បីឱ្យមើលទៅសមជានារីខ្មែរ។ ចំណែកបុរសត្រូវ អាចប្រើអាវស ខោខ្មៅ គឺសមរម្យ៕