ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ក្រោយលទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំ២០២២ត្រូវបានបិទប្រកាស ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានផ្ញើសារអបអរដល់សិស្សានុសិស្សថ្នាក់ទី១២ ដែលបានប្រឡងជាប់សញ្ញាបត្រមធ្យមសិក្សាទុតិយភូមិឆ្នាំសិក្សា២០២១-២០២២។
ជាមួយគ្នានេះដែរ ឯកឧត្តមរដ្ឋមន្រ្តី ក៏បានអំពាវនាវដល់សិស្សានុសិស្សទាំងអស់ ពិចារណាជ្រើសរើសសិក្សាជំនាញពាក់ព័ន្ធនឹងបច្ចេកវិទ្យាឌីជីថលដូចជា វិទ្យាសាស្រ្តកុំព្យូទ័រ (Computer Science) ទូរគមនាគមន៍ និងបណ្តាញ (Telcoms and Networking) បច្ចេកវិទ្យាក្លោដ (Cloud Computing) ការអភិវឌ្ឍសុសវែរ (Software Development) វិទ្យាសាស្រ្តទិន្នន័យ (Data Science) សន្តិសុខសាយប័រ (Cybersecurity) បច្ចេកវិទ្យាប្លុកឆេន (Blockchain) បច្ចេកវិទ្យាហិរញ្ញវត្ថុ (Fintech) បច្ចេកវិទ្យាបញ្ញាសប្បនិមិត្ត (AI) និងពាណិជ្ជកម្មតាមប្រព័ន្ធអេឡិចត្រូនិក (E-Commerce) ជាដើម។
ឯកឧត្តម ជា វ៉ាន់ដេត បានបញ្ជាក់ថា ការជ្រើសរើសជំនាញទាំងនេះ នឹងជួយឱ្យក្មួយៗអាចទទួលបានប្រាក់បៀវត្សខ្ពស់ មានទីផ្សារការងារ មានឱកាសបើកអាចីវកម្មដោយខ្លួនឯង និងអាចចូលរួមចំណែកលើកស្ទួយ និងអភិវឌ្ឍប្រទេសជាតិ ជាពិសេសមុខជំនាញទាំងនេះ មានការផ្តល់អាហារូបករណ៍ជាច្រើន រួមទាំងកម្មវិធីអាហារូបករណ៍ទេពកោសល្យឌីជីថលតេជោ។
បើតាមការបញ្ជាក់របស់ ឯកឧត្តមរដ្ឋមន្រ្តី នៅក្នុងឆ្នាំសិក្សាថ្មីនេះ អាហារូបករណ៍ទេពកោសល្យឌីជីថលតេជោ បានបន្តផ្តល់អាហារូបករណ៍សម្រាប់សិក្សាថ្នាក់បរិញ្ញាបត្រជំនាញបច្ចេកវិទ្យាឌីជីថល ដោយបង្កើនចំនួនរហូតដល់ ៥០០កន្លែងនៅគ្រឹះស្ថានឧត្តមសិក្សារដ្ឋ និងឯកជនចំនួន៤ រួមមាន បណ្ឌិតសភាបច្ចេកវិទ្យាឌីជីថលកម្ពុជា (CADT) សាកលវិទ្យាល័យភូមិន្ទភ្នំពេញ (RUPP) វិទ្យាស្ថានបច្ចេកវិទ្យាកម្ពុជា (ITC) និងសាកលវិទ្យាល័យអាមេរិកាំងភ្នំពេញ (AUPP) ជាដើម ដែលប្អូនៗអាចដាក់ពាក្យស្នើសុំអាហារូបករណ៍តាមរយៈតំណភ្ជាប់ www.cadt.edu.kh/scholarship ។
គួរបញ្ជាក់ដែរថា ខណៈពិភពលោកកំពុងឆ្ពោះទៅកាន់បរិបទឧស្សាហកម្ម៤.០ គេមើលឃើញថា ជំនាញពាក់ព័ន្ធនឹងបច្ចេកវិទ្យាឌីជីថល កំពុងមានតម្រូវការខ្លាំង និងបានដើរតួនាទីយ៉ាងសំខាន់ក្នុងការចូលរួមអភិវឌ្ឍន៍ប្រទេស។ បើតាមការបញ្ជាក់របស់ ឯកឧត្តម ជា វ៉ាន់ដេត ការជ្រើសរើសយកជំនាញពាក់ព័ន្ធនឹងបច្ចេកវិទ្យាឌីជីថល របស់សិស្សានុសិស្ស និងការខិតខំប្រឹងប្រែងរៀនសូត្រអភិវឌ្ឍចំណេះដឹង គឺជាការរួមចំណែកអភិវឌ្ឍកម្ពុជាឆ្ពោះទៅសម្រេចបានចក្ខុវិស័យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០៕
