ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសអញ្ជើញត្រួតពិនិត្យវឌ្ឍនភាព នៃការសាងសង់ព្រលានយន្តហោះអន្តរជាតិតេជោ បានលើកឡើងថា ជាទិសដៅរបស់កម្ពុជា គឺពង្រឹងសមត្ថភាពកូនខ្មែរ ដើម្បីសាងសង់សំណង់ធំៗនានា និងផលិតនូវផលិតផលនានាដោយខ្លួនឯងប្រកបដោយគុណភាពខ្ពស់ និងស្តង់ដាអន្តរជាតិ។
សម្តេចធិបតីមានប្រសាសន៍ថា ការសាងសង់អាកាសយានដ្ឋានអន្តរជាតិតេជោលំដាប់ថ្នាក់4F យើងមានវិស្វករខ្មែរជាច្រើននាក់កំពុងធ្វើការងារនៅទីនេះ, ពួកគេធ្វើការផង រៀនជំនាញផង ។ ជាមួយគ្នានេះ សម្តេចស្នើដល់វិស្វកខ្មែរទាំងអស់សូមចាប់យកជំនាញនៅទីនេះ ដើម្បីនៅថ្ងៃក្រោយអាចមានសមត្ថភាពធ្វើដោយខ្លួនឯង។
សម្តេចនាយករដ្ឋមន្រ្តីបន្តថា ពិតណាស់ បច្ចុប្បន្ននេះ វិស្វករជាកូនខ្មែរបានសង់សំណង់អគារខ្ពស់ៗជាច្រើន ក៏ដូចជាស្ពានជាច្រើនផងដែរ ខណៈកាលពី៣០ឆ្នាំមុន យើងមិនមានអ្វីទាំងអស់ ដូច្នេះសម្តេចសង្ឃឹមថា ទៅថ្ងៃអនាគតខាងមុខ យើងនឹងមានវិស្វករ ដែលមានសមត្ថភាពអាចធ្វើអគារធំៗបែបនេះ។
គួរជំរាបជូនថា គម្រោងអភិវឌ្ឍសាងសង់អាកាសយានដ្ឋានអន្តរជាតិតេជោ លំដាប់ថ្នាក់4F ត្រូវបានបែងចែកជា ៣ដំណាក់កាល។ ដំណាក់កាលទី១ អាកាសយានដ្ឋានអន្តរជាតិនេះ អាចទទួលអ្នកដំណើរបានប្រមាណ ១៣លាននាក់ក្នុងមួយឆ្នាំ, ដំណាក់កាលទី២ អាចទទួលបានអ្នកដំណើរ ៣០លាននាក់ក្នុង១ឆ្នាំ និងដំណាក់កាលទី៣ អាចទទួលបានអ្នកដំណើររហូតដល់៥០លាននាក់ក្នុងមួយឆ្នាំ។
កាលានុវត្តភាពថ្មីនេះ នឹងក្លាយជាសក្តានុពលស្រូបទាញដ៏ខ្លាំងក្លា និងសំខាន់សម្រាប់វិស័យទេសចរណ៍ក្នុងភូមិសាស្ត្ររាជធានីភ្នំពេញ និយាយដោយឡែក ព្រមទាំងវិស័យទេសចរណ៍នៅទូទាំងប្រទេស និយាយជារួម។ បន្ថែមពីនេះ ក៏នឹងអាចទាក់ទាញដល់វិនិយោគិន មកវិនិយោគនៅកម្ពុជា រួមទាំងផ្តល់ប្រយោជន៍សេដ្ឋកិច្ចដល់ប្រជាពលរដ្ឋផងដែរ។
ផ្លូវអាកាស គឺជាអាទិភាពគន្លឹះទី២ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ-ដំណាក់កាលទី១ ហើយក៏ជាកិច្ចការអាទិភាពទី២ នៃបញ្ចកោណទី២ ដោយផ្តោតលើការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងឡូជីស្ទិក ដែលមានគោលដៅយុទ្ធសាស្ត្រផ្តោតលើការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ ការកសាង និងការអភិវឌ្ឍហេដ្ឋារចនាសម្ព័ន្ធថ្មីៗ៕
