ក្នុងស្ថានភាពវិបត្តិសង្គ្រាមឈ្លានពានរបស់យោធាថៃមកលើទឹកដីកម្ពុជានៅតាមតំបន់ព្រំដែន កុមារគឺជាក្រុមងាយរងគ្រោះបំផុត ដែលមិនត្រឹមតែបាត់បង់ផ្ទះសម្បែង និងការសិក្សាប៉ុណ្ណោះទេ ប៉ុន្តែថែមទាំងរងការប៉ះទង្គិចផ្លូវចិត្តយ៉ាងធ្ងន់ធ្ងរពីផលប៉ះពាល់នៃសង្គ្រាម។ ដើម្បីឆ្លើយតបនឹងបញ្ហានេះ អង្គការភ្លែនអន្តរជាតិប្រចាំកម្ពុជា សហការជាមួយអង្គការ TPO បានបង្កើតឱ្យមាន “កន្លែងកុមារមេត្រី” និងកម្មវិធីគាំទ្រសុខភាពផ្លូវចិត្ត ដើម្បីជួយស្តារស្មារតីជនភៀសសឹកឱ្យមានភាពប្រសើរឡើងវិញ។

លោក យី គឹមថាន នាយកស្ដីទីអង្គការភ្លែនអន្តរជាតិប្រចាំកម្ពុជា មានប្រសាសន៍ថា កាលពីរស់នៅក្នុងភូមិកំណើត កុមារមានសេរីភាពក្នុងការលេងកម្សាន្ត និងទៅសាលារៀនជាមួយមិត្តភក្តិ ប៉ុន្តែសង្គ្រាមបានផ្លាស់ប្តូរអ្វីៗគ្រប់យ៉ាង។ លោក យី គឹមថាន បន្តថា ការរត់គេចចេញពីគ្រាប់គាំភ្លើង បានដក់ជាប់នូវរូបភាពភ័យខ្លាចក្នុងចិត្តកុមារ។ នៅពេលមករស់នៅក្នុងជំរំជនភៀសសឹក ពួកគេត្រូវកាត់ផ្ដាច់ពីសហគមន៍ នឹកផ្ទះ នឹកសត្វចិញ្ចឹម និងព្រួយបារម្ភពីអនាគតដែលមិនប្រាកដប្រជា។

លោក យី គឹមថាន មានប្រសាសន៍ថា ស្ថានភាពទាំងនេះ បង្កឱ្យមានបញ្ហាដំណេក ភាពតានតឹង និងការបាក់ទឹកចិត្ត ប្រសិនបើគ្មានការជួយជ្រោមជ្រែងទាន់ពេលវេលាទេនោះ។ ដើម្បីដោះស្រាយបញ្ហាប្រឈមទាំងនេះ អង្គការទាំងពីរ បានដាក់ចេញនូវយុទ្ធសាស្ត្រ «ការគាំទ្រសុខភាពផ្លូវចិត្ត និងចិត្តសង្គម (MHPSS)» តាមរយៈសកម្មភាពសំខាន់ចំនួន ៣រួមមាន ទី១ ការបង្កើតកន្លែងកុមារមេត្រី (Child-Friendly Spaces) ដែល​បច្ចុប្បន្ន កន្លែងសុវត្ថិភាពនេះ​មាន​ចំនួន ៤ ត្រូវបានបង្កើតឡើងនៅក្នុងស្រុកបន្ទាយស្រី ខេត្តសៀមរាប។ ទីនេះជាកន្លែងដែលកុមាររាប់រយនាក់មកជួបជុំគ្នាជារៀងរាល់ថ្ងៃ ដើម្បីលេងកីឡា គូរគំនូរ និងធ្វើសកម្មភាពសិល្បៈច្នៃប្រឌិត ដែលជួយឱ្យពួកគេបញ្ចេញអារម្មណ៍តានតឹង និងទទួលបានការអប់រំក្រៅប្រព័ន្ធ ទោះបីជាសាលារៀនត្រូវបានបិទទ្វារក៏ដោយ។

ទី២ ការពង្រឹងសមត្ថភាពអាណាព្យាបាល ដោយ​គម្រោងបានផ្តល់ការអប់រំផ្លូវចិត្តដល់ឪពុកម្តាយ និងអ្នកថែទាំ ដើម្បីយល់ដឹងពីរបួសផ្លូវចិត្ត កាត់បន្ថយការរើសអើង និងរៀនពីបច្ចេកទេសគ្រប់គ្រងភាពតានតឹងក្នុងគ្រួសារ និងទី៣ ការផ្តល់សេវាប្រឹក្សាយោបល់ពីអ្នក​ជំនាញ ដោយ​ក្នុងនោះ ចំពោះកុមារ និងស្ត្រីដែលរងគ្រោះធ្ងន់ធ្ងរ អ្នកចិត្តសាស្ត្រនៃអង្គការ TPO បានផ្តល់ការប្រឹក្សាជាលក្ខណៈបុគ្គល រយៈពេលពី៣០នាទីទៅ៤៥នាទី ដើម្បីព្យាបាលរបួសផ្លូវចិត្ត និងស្វែងរកយន្តការស៊ូទ្រាំនឹងវិបត្តិ។

“កន្លែងកុមារមេត្រី” គឺជា​កន្លែង​សិក្សាមួយដែលត្រូវបានបង្កើតឡើងដើម្បីបម្រើផលប្រយោជន៍ល្អបំផុតសម្រាប់កុមារ ដោយធានាថា គ្រប់កុមារទាំងអស់ទទួលបានការអប់រំប្រកបដោយគុណភាព សុវត្ថិភាព និងសមធម៌ ដោយ​ផ្តោតសំខាន់លើការផ្ដល់នូវបរិយាកាសដែលកុមារមានអារម្មណ៍ថា ខ្លួនត្រូវបានគេស្រឡាញ់ ផ្តល់តម្លៃ និងមានឱកាសបញ្ចេញសមត្ថភាពយ៉ាងពេញលេញ។

បើតាមលោក យី គឹមថាន ការបង្កើតកន្លែងកុមារមេត្រីនេះ មានសារៈសំខាន់ណាស់ក្នុងការជួយឱ្យកុមារធូរស្បើយពីភាពភ័យខ្លាចដែលធ្លាប់រត់ឆ្លងកាត់គ្រាប់កាំភ្លើងដោយសារបញ្ហាសង្រ្គាម។ តាមរយៈកន្លែងកុមារមេត្រី អាចជួយឱ្យកុមារអាចបង្កើតទំនាក់ទំនងជាមួយមិត្តភក្ដិថ្មីៗ មានឱកាសស្ដាប់រឿងនិទាន អានសៀវភៅ និងការលេងល្បែងកម្សាន្ត ដើម្បីជួយបង្កលក្ខណៈសប្បាយរីករាយ និងជួយដល់ការអភិវឌ្ឍខួរក្បាលរបស់កុមារ។

តាមទិន្នន័យ​របស់ក្រសួងមហាផ្ទៃ គិត​ត្រឹម​ព្រឹកថ្ងៃទី២៦ ខែធ្នូ ឆ្នាំ២០២៦ អំពើឈ្លានពានរបស់យោធាថៃ លើដែនអធិបតេយ្យកម្ពុជា បានបណ្តាល​ឱ្យ​មានជនភៀសសឹក​សរុបចំនួន ៦៤៤ ៤៤២នាក់ ក្នុងនោះ​កុមារ​មាន​ចំនួន ២០៤ ៩៩២នាក់៕