បន្ទាប់ពីបានដំណើរការយ៉ាងសកម្មពេញមួយខែវិច្ឆិកា «យុទ្ធនាការភ្នំពេញស្អាត» ដែលជាផ្នែកមួយនៃគម្រោង «ស្អាត» សម្រាប់ឆ្នាំ២០២៤ នេះ បានបិទបញ្ចប់ដោយទទួលបានសមិទ្ធផលដ៏អស្ចារ្យគួរជាទីមោទនៈ។

លោកជំទាវ ទេព កុលាប សហស្ថាបនិក នៃគម្រោងស្អាត មានប្រសាសន៍ថា យុទ្ធនាការភ្នំពេញស្អាតឆ្នាំ២០២៤ ផ្ដោតលើគោលគំនិតសំខាន់ៗចំនួន៣រួមមាន ចិត្តគំនិតស្អាត អាកប្បកិរិយាស្អាត និងប្រតិបត្តិស្អាត ក្រោមទិសស្លោក «តម្លៃជាខ្មែរ មោទនភាពអត្ដសញ្ញាណខ្មែរ សមត្ថភាពខ្មែរ និងភាពរួបរួមឯកភាពគ្នា ក្រោមទង់ជាតិខ្មែរតែមួយ» ។

លោកជំទាវ ទេព កុលាប បន្ថែមថា កម្មវិធីទាំងនេះ ជួយយុវជនទទួលបានចំណេះដឹងថ្មីៗក្នុងការអភិវឌ្ឍខ្លួន ចេះពីរបៀបអប់រំចិត្ត ផ្ដោតអារម្មណ៍លើការសិក្សា ដើម្បីក្លាយខ្លួនជាធនធានមនុស្សសម្រាប់កម្ពុជា។ លោកជំទាវបន្តថា «យុទ្ធនាការភ្នំពេញស្អាត» បានទទួលការគាំទ្រយ៉ាងពេញទំហឹងពីគ្រប់មជ្ឈដ្ឋានជារៀងរាល់ឆ្នាំក៏ព្រោះតែសក្ដានុពលនៃការចូលរួមសកម្មភាពស្អាត ការថែរក្សាបរិស្ថាន និងការលើកស្ទួយសោភ័ណភាពទីក្រុង។ ការគាំទ្រដ៏ខ្លាំងក្លានេះ ជាសញ្ញាសម្គាល់ពីស្មារតីនៃការទទួលខុសត្រូវ សេចក្ដីស្រឡាញ់ និងការចូលរួមសម្អាត ថែរក្សាបរិស្ថាន ដែលបានបង្កើតក្តីសង្ឃឹមយ៉ាងមោះមុតក្នុងការឈានទៅរក «កម្ពុជាគ្មានសំរាមរាយប៉ាយ»។

ថ្លែងក្នុងពិធីបិទ «យុទ្ធនាការភ្នំពេញស្អាត ឆ្នាំ២០២៤» កាលពីថ្ងៃពុធ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី ក្រសួងមុខងារសាធារណៈ និងប្រធានក្រុមប្រឹក្សាភិបាលនៃគម្រោងស្អាត មានប្រសាសន៍ថា យុទ្ធនាការភ្នំពេញស្អាត បាននាំមកនូវការជួបជុំគ្នា សម្រាប់អ្នកដែលមិនធ្លាប់មានឱកាសមកជួបជុំ និងបានបង្កើតភាពស្និតស្នាលបន្តិចម្តងៗ ក្នុងគោលបំណងបណ្តុះស្មារតីនៃការរួបរួមគ្នា។

ជាមួយគ្នានេះ ឯកឧត្តម ហ៊ុន ម៉ានី ក៏​បានថ្លែងកោតសរសើរ និងវាយតម្លៃខ្ពស់ចំពោះសមាជិក សមាជិកា នៃក្រុមការងារប្រតិបត្តិនៃគម្រោងស្អាតនិងយុវជនទូតសុឆន្ទៈទាំងអស់នៃគម្រោងភ្នំពេញស្អាតដែលបានខិតខំប្រឹងប្រែងលះបង់ពេលវេលាចូលរួមដើម្បីរៀបចំ និងបន្តអនុវត្តយុទ្ធនាការភ្នំពេញស្អាតដ៏មានអត្ថន័យនេះតាំងពីឆ្នាំ២០១៧ រហូតសម្រេចបានលទ្ធផលគួរជាទីមោទនៈមកដល់ពេលនេះ។

យុទ្ធនាការភ្នំពេញស្អាត ធ្វើឡើងក្នុងគោលបំណងផ្ដោតសំខាន់លើការបញ្ជ្រាបសារអប់រំ ដើម្បីលើកតម្កើងវប្បធម៌ និងសីលធម៌សមរម្យ។ គម្រោងស្អាត បានក្លាយទៅជាយុទ្ធនាការថ្មីបន្ថែម សម្រាប់ការចូលរួមជាមួយរាជរដ្ឋាភិបាលកម្ពុជា ដើម្បីស្វែងរក និងបង្កើតដំណោះស្រាយជូនសង្គមជាតិ ទាំងសោភណ្ឌភាព បរិស្ថាន ក៏ដូចជាការចូលរួមលើកទឹកចិត្ដ និងផ្ដល់ភាពជាគំរូ ដល់ប្រជាពលរដ្ឋ ជាពិសេសយុវជនឱ្យមានទំនួលខុសត្រូវលើការគ្រប់គ្រងសំរាមដោយខ្លួនឯង ដោយបន្ដផ្សព្វផ្សាយទៅការអ្នកដទៃ។

គួរជម្រាបជូនថា ក្នុងយុទ្ធនាការនេះ មានយុវជនជិត ២០០នាក់ បានចូលរួមក្នុងកម្មវិធីបោះជំរំស្អាត ហើយទទួលបានបទពិសោធន៏ថ្មីនៃការឡើងភ្នំដែលមានចម្ងាយប្រាំបួនគីឡូ រយៈពេលពីរថ្ងៃ ដែលនាំយុវជនទៅបរិយាកាសប្លែក ដើម្បីផ្តោតអារម្មណ៍ក្នុងការសិក្សា ហ្វឹកហាត់ និងអប់រំចិត្តខ្លួនក្នុងនាមជាខ្មែរស្អាត៕