សៀមរាប — ការឈឺចាប់ ហើយមិនអាចហាស្តីបាន ឈឺចាប់ហើយបានត្រឹមតែកើតទុក្ខ ការរងនូវទុក្ខវេទនារបស់ប្រជាជនខ្មែរ ពីការឈ្លានពានទាំងកម្រោលរបស់ប្រទេសថៃមកលើដែនអធិបតេយ្យកម្ពុជា ម្តងហើយម្តងទៀត ដែលបណ្តាលឱ្យជនស៊ីវិលស្លាប់ និងរងរបួសជាច្រើននាក់ និងក្រុមគ្រួសារត្រូវព្រាត់ប្រាស់ ប្តីប្រពន្ធកូន ការចាកចោល​ផ្ទះសម្បែង ហេដ្ឋារចនាសម្ព័ន្ធ ផ្លូវថ្នល់ និងប្រាង្គប្រាសាទបុរាណដែលជាសម្បត្តិបេតិកភណ្ឌ ត្រូវបានរងការហិនហោចដោយសារតែការទំលាក់គ្រាប់បែកគ្រាប់ ផ្លោងមិនស្រាកស្រាន្តមកលើដែនអធិបតេយ្យកម្ពុជា។ការឈឺ​ចាប់ទាំងអស់នេះ បាន​អង្រួនឱ្យ​ចិត្ត និងបេះដូងអ្នកសិល្បៈករ សិល្បៈការនី វិចិត្រករ ប្រមាណ៦០ រូបមកពីទូទាំងប្រទេស រួមគ្នាជាជក់តែមួយ បង្ហាញពីអារម្មណ៍សោកសង្រេងតាមរយៈគំនូរមួយផ្ទាំងដែល បង្ហាញពីទុក្ខវេទនារបស់ប្រជាជនកម្ពុជាទៅកាន់ឆាកអន្តរជាតិ។

លោក តាន់ គឹមសួរ តំណាងអ្នករៀបចំព្រឹត្តិការណ៍ «សិល្បៈដើម្បីសន្តិភាព-Art for Peace» បានមានប្រសាសន៍​ថា ដើម្បីឆក់យកបេះដូង ក៏ដូចជាបង្ហាញទៅកាន់ពិភពលោកឱ្យបានដឹង ឱ្យបានឃើញពីទុក្ខវេទនាដែលកំពុងកើតមានឡើងនៅកម្ពុជា អ្នកសិល្បៈនិងវិចិត្រករ បានរួមគ្នាបង្ហាញនូវស្នាដៃសិល្បៈដែលខ្លួនមាន គូសដោយចិត្ត ដោយបេះដូង លាយឡំជាមួយនិងទឹកភ្នែក ឈឺចាប់ ដោយសារតែការអាណិតប្រជាជន ក្មេងចាស់ប្រុស​ស្រី ដែលរងគ្រោះមិនអាចពិព័រណ៍នាបាន។ លោកថា មានតែបង្ហាញទៅលើផ្ទាំងគំនូរ នៅកណ្តាលក្រុងសៀមរាប ដោយរំពឹងថា និងបានដឹងលឺទៅដល់សហគមន៍អន្តរជាតិ ពីទុក្ខវេទនា ដែលកម្ពុជាកំពុងជួបប្រទះដោយសារការឈ្លានពានពីប្រទសថៃនេះ។

សិល្បៈក សិល្បៈការិនី វិចិត្រករ គាត់​រួមគ្នា​ជាសម្លេងតែមួយ ជាជក់តែមួយ មកគូសអំពីការឈឺចាប់ ទុក្ខសោករបស់ប្រជាជន​យើង​ដែលកំពុងតែជួបប្រទះសោកនាដកម្ម​ដែលកំពុងតែកើតឡើងនៅលើទឹកដីយើង…

លោក តាន់ គឹមសួរ តំណាងក្រុមការងារសិល្បៈដើម្បីសន្តិភាព

លោក គឹមសួរ បន្ថែមថា ផ្ទាំងគំនូរដែលមានទទឹង ៥ម៉ែត្រ បណ្តោយ៣០ម៉ែត្រ មានក្រុមស្នូល៥នាក់ និងអ្នកគូសប្រមាណជា៦០នាក់ ហើយ​គេ​រំពឹងថា ផ្ទាំងគំនូរ​មួយ​នេះនឹងរួចរាល់នៅថ្ងៃទី២៣ ខែធ្នូ ខាងមុខនេះ ទៅតាមផែនការដែលបានកំណត់។ អ្នកវិចិត្រករ អ្នកសិល្បៈ បានបង្ហាញរូបភាពទាហានពលី គ្រោះថ្នាក់ ទុក្ខសោករបស់ក្រុមគ្រួសារជនរងគ្រោះដោយសារតែទាហានថៃបានធ្វើការបាញ់ ទម្លាក់គ្រាប់បែកគ្មានត្រាប្រណីមកលើប្រជាជនស្លួតត្រង់ បណ្តាលឱ្យស្លាប់បាត់បង់ជីវិត្ត និងរងគ្រោះថ្នាក់ សិស្សត្រូវរត់ចោលសាលារៀនដើម្បីសុវត្តិភាព ពិសេសគឺរូបភាពប្រមុខដឹកនាំដែលបានគិតគូរគ្រប់បែបយ៉ាងដើម្បីជាតិនិងប្រជាជន។

លោក សុបិន វិចិត្រករមកពីខេត្តសៀមរាប ដែលបានចូលរួមគូសនូវគំនូរនេះ បានបង្ហាញអារម្មណ៍ថា ផ្ទាំងគំនូរគឺជាភាសាសកល ដែលផ្ទាំងគំនូរមួយផ្ទាំងនេះគឺបានបង្ហាញពីអារម្មណ៍សោកសៅ ដោយសារតែការឈ្លានពានពីប្រទេសជិតខាង គឺជាការឈឺចាប់មួយសម្រាប់ប្រទេសយើងទំាងអស់គ្នា។

លោក សុបិន មានប្រសាសន៍ថា ក្រុមការងារទាំងអស់គ្នាដែលកំពុងតែប្រើភាសាបេះដូងតែមួយក្នុងចង្វាក់រួមតែមួយផលិតនូវរូបភាពដែលឆ្លុះបង្ហាញនូវសោកនាដកម្មដែលកំពុងតែកើតមានឡើងនៅដែនដីសុវណ្ណភូមិក្នុងព្រឹត្តិការណ៍ «សិល្បៈដើម្បីសន្តិភាព» ដែលរូបភាពទាំងនេះគឺជាសារដ៏មានសារសំខាន់ខ្លាំងណាស់ក្នុងការបង្ហាញទៅដល់សហគមន៍អន្តរជាតិឱ្យកាន់ដឹងអំពីការឈឺចាប់ និងការរងទុក្ខវេទនារបស់ប្រជាជនយើង។

“ការឈ្លានពានរបស់សៀម គឺជាការឈឺចាប់របស់ប្រទេសយើងទាំងមូល… ពួកយើងចង់បង្ហាញការឈឺចាប់នេះទៅកាន់ពិភពលោក ដើម្បីពិភពលោកដឹងថា ពលរដ្ឋ​ខ្មែរស្លូតត្រង់ និង​សុំ​ឱ្យ​មានអន្តរាគមន៍​ឈានទៅបញ្ចប់ការឈ្លានពាននេះ…”

លោក សុបិន វិចិត្រករមកពីខេត្តសៀមរាប

ផ្ទាំងគំនូរនេះនិងដាក់តំាងតាំងបង្ហាញនៅកណ្តាលក្រុងសៀមរាប ចាប់ពីថ្ងៃទី២៣ ធ្នូ តទៅ ដល់ភ្ញៀវជាតិ អន្តរជាតិ បានទស្សនា រហូតដល់កម្ពុជា ទទួលបានសុខសន្តិភាព ពីការឈ្លានពាន ទើបត្រូវបានដកចេញវិញ៕

អត្ថបទ ៖ ង៉ាន់ ទិត្យ