ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីប្រគល់រង្វាន់ជ័យលាភីសិស្សនិទ្ទេស A នៃបណ្តាញសាលារៀនវេសឡាញ កាលពីពេលថ្មីៗនេះ លោកឧកញ៉ា ប៉ិច បូឡែន ប្រធាននាយកប្រតិបត្តិ នៃក្រុមហ៊ុនវេសឡាញ អេឌ្យូខេសិន គ្រុប បានផ្តាំផ្ញើ និងណែនាំដល់សិស្សានុសិស្សដែលទទួលបាននិទ្ទេស A ក៏ដូចជាសិស្សានុសិស្សដែលបានជាប់សញ្ញាបត្រមធ្យមសិក្សាទុតិយភូមិ សូមចងចាំនូវមូលដ្ឋានទាំង៥នៃការអភិវឌ្ឍខ្លួន។
បើតាមលោកឧកញ៉ា ប៉ិច បូឡែន ទោះជាសិស្សានុសិស្សពូកែយ៉ាងណា តែត្រូវចងចាំមូលដ្ឋានទាំង៥ នៃការអភិវឌ្ឍខ្លួន ដែលរួមមាន ៖ ១. ចំណង់និងឆន្ទះ (ដាក់គោលដៅឱ្យច្បាស់ និងតាំងចិត្តធ្វើ), ២. ចំណេះ (ការយល់ដឹងទូទៅឱ្យបានទូលាយ ស៊ីជម្រៅ), ៣. ជំនាញ (រៀនឱ្យចេះច្បាស់ មានជំនាញអាជីពឱ្យប្រាកដ), ៤. ចរិត (សុជីវធម៌ សីលធម៌ ការប្រាស្រ័យទាក់ទងក្នុងសង្គម) និង ៥. ចំណងទាក់ទង (បង្កើតមិត្តល្អៗដែលអាចប្រឹក្សាយោបល់ដល់យើង)។
លោកឧកញ៉ាពន្យល់ថា ការមានចំណង់គោលដៅច្បាស់នឹងធ្វើឱ្យយុវជនមើលឃើញផ្លូវដែលខ្លួនត្រូវដើរ ព្រមជាមួយនេះ យុវជនត្រូវមានចំណេះដឹងច្បាស់ និងជំនាញពិតប្រាកដ ដែលទាំង៣ចំណុចនេះ ជាផ្នែកកំពុងឈានទៅរកភាពជោគជ័យ។ ជាមួយគ្នានេះ អត្តចរិត គឺជារឿងមួយដែលយុវជនត្រូវគិតគូរ, លោកឧកញ៉ាបន្តថា នៅក្នុងប្រព័ន្ធអប់រំ យើងតែងតែអប់រំយុវជនឱ្យមានចរិតសុភាពរាបសា រម្យទម ចេះគោរពចាស់ទុំ ដូច្នេះនៅក្នុងពិភពការងារ សូមយុវជនយើងព្យាយាមអនុវត្តប្រកបដោយបញ្ញា។
ដោយឡែកចំណងទាក់ទង គឺកាន់តែសំខាន់ក្នុងពិភពការងារ ក៏ដូចជាអាជីវកម្ម, លោកឧកញ៉ា ប៉ិច បូឡែន មានប្រសាសន៍ដោយលើកជាឧទាហរណ៍ថា បុគ្គលខ្លះមានភាពឆ្នើម ពូកែ ប៉ុន្តែពេលធ្វើការ គឺមិនអាចចុះសម្រុងជាមួយអ្នកដទៃ មិនអាចធ្វើការងារជាក្រុមបាន។ លោកឧកញ៉ាមានប្រសាសន៍ថា ចំណងទាក់ទង ឬដែលគេហៅថា បណ្តាញធនធានសង្គម គឺមានន័យណាស់ ព្រោះក្នុងការធ្វើអាជីវកម្ម ក៏ដូចជាក្នុងពិភពការងារ គឺត្រូវការគេគោរពស្រឡាញ់ ដូច្នេះការកសាងបណ្តាញទំនាក់ទំនងល្អ គឺនាំឱ្យឈ្នះ ឈ្នះ ទាំងអស់គ្នា យើងក៏បានផល អ្នកដែលធ្វើការជាមួយក៏បានផល។
យ៉ាងណាក៏ដោយពាក់ព័ន្ធនឹងការជ្រើសរើសជំនាញសម្រាប់ការសិក្សាដើម្បីអាជីពទៅថ្ងៃអនាគតវិញ លោកឧកញ៉ា ប៉ិច បូឡែន បានណែនាំដល់សិស្សានុសិស្សទាំងអស់ តាមដានមើលទិដ្ឋភាពបរិបទបម្រែបម្រួលសង្គម និងសេដ្ឋកិច្ច៕
