ចំណេះដឹងបានមកពីការតស៊ូអត់ធ្មត់ និងការខិតខំប្រឹងប្រែងសិក្សារៀនសូត្រ ដែលអាចជួយប្អូនៗសិស្សានុសិស្សឱ្យមានការងារល្អធ្វើនៅថ្ងៃអនាគត។ នេះបើតាមការលើកឡើងរបស់លោក ឃីម សុខហេង ស្ថាបនិកវិទ្យាស្ថានសិក្សាដើម្បីជោគជ័យ នៅក្នុងវេទិកាបំណិនជីវិត ដែលរៀបចំឡើងដោយសហភាពសហព័ន្ធយុវជនកម្ពុជារាជធានីភ្នំពេញកាលពីពេលថ្មីៗនេះ។

លោក ឃីម សុខហេង បន្ថែមថា ប្រសិនបើយុវជនដែលជាសិស្សានុសិស្សខិតខំប្រឹងប្រែងសិក្សារៀនសូត្រឱ្យខ្លាំង និងស្វ័យសិក្សាបន្ថែម នោះប្អូនៗនឹងឈានទៅដល់ការចេះដឹង ។ ទន្ទឹមនឹងនេះ នៅពេលប្អូនៗមានចំណេះដឹង ប្អូនៗនឹងមានលទ្ធភាពរកប្រាក់បានដោយខ្លួនឯង។

ស្ថាបនិកវិទ្យាស្ថានសិក្សាដើម្បីជោគជ័យ (LSI) បន្ថែមថា យើងអាចរស់នៅជាទីពឹងរបស់អ្នកដទៃ ប៉ុន្តែកុំរស់នៅជាបន្ទុករបស់អ្នកដទៃ ។ យើងអាចពឹងគេបានខ្លះទាន់នៅមានគេជួយជ្រោមជ្រែង ប៉ុន្តែយើងក៏ត្រូវប្រឹងឱ្យអស់ពីលទ្ធភាព។ នេះមានន័យថា ប្អូនៗទាន់នៅមានលោកគ្រូ អ្នកគ្រូបង្រៀនប្អូនៗត្រូវប្រឹងរៀន មានចម្ងល់អ្វីសួរគ្រូឱ្យអស់ ព្រោះដល់ពេលប្រឡងគ្រូមិនអានជួយអ្វីបានទៀតទេ។

នៅពេលឃើញគេសប្បាយ ឃើញគេដើរលេង មិនមែនខ្ញុំមិនចង់ទេ ប៉ុន្តែខ្ញុំប្រាប់ខ្លួនឯងថា មកភ្នំពេញគឺដើម្បីសិក្សា ដើម្បីបន្តការសិក្សា បន្តចំណេះដឹងឱ្យបានខ្ពង់ខ្ពស់ គឺជាអាទិភាព មិនមែនដើរលេងសប្បាយភ្លើតភ្លើនជាអាទិភាពទេ

លោក ឃីម សុខហេង ស្ថាបនិកវិទ្យាស្ថានសិក្សាដើម្បីជោគជ័យ (LSI)

បើតាមលោក ឃីម សុខហេង ទន្ទឹមនឹងមានចំណេះដឹង ប្អូនៗក៏ត្រូវមានសុជីវធម៌ និងភាពឧស្សាហ៍ព្យាយាមផងដែរ។ ក្នុងនោះ សុជីវធម៌ គឺគោរពមនុស្សដែលនៅជុំវិញខ្លួនយើង កុំព្រហើន កុំច្រង៉េងច្រង៉ាង ត្រូវចេះនិយាយឱ្យគេចូលចិត្តយើង គោរពលោកគ្រូ អ្នកគ្រូ គោរពមិត្តភក្ដិ កុំនិយាយប្រមាថ កុំជេរ កុំកុហកអ្នកដទៃ។ ចំណែកឧស្សាហ៍ព្យាយាម ត្រូវយកចិត្តទុកដាក់លើការរៀនសូត្រ ស្វ័យសិក្សា ព្រមទាំងចូលរួមក្លឹបសិក្សាជាមួយមិត្តភក្ដិ។

កាលខ្ញុំនៅរៀនមុខវិជ្ជាណាដែលខ្ញុំពូកែ គឺតែងតែជួយដឹកនាំគេ ជួយបង្រៀនគេ មុខវិជ្ជាណាដែលខ្ញុំខ្សោយ ហើយមានមិត្តភក្ដិពូកែ ខ្ញុំសុំទៅរៀនពីពួកគាត់នៅក្នុងក្លឹបសិក្សា

លោក ឃីម សុខហេង ស្ថាបនិកវិទ្យាស្ថានសិក្សាដើម្បីជោគជ័យ (LSI)

លោក ឃីម សុខហេង បន្ថែមថា ចំណេះដឹងគឺជារឿងសំខាន់ បើយុវជនមានតែជីវិតអត់ចំណេះដឹង តើគាត់ទៅធ្វើអ្វី? ដូច្នេះ យើងលើកទឹកចិត្តប្អូនៗសិស្សានុសិស្សឱ្យភ្ញាក់ស្មារតី និងមើលឃើញថា ការអប់រំពិតជាសំខាន់ ហើយប្រឹងប្រែងមិនងាករេ៕