ពិព័រណ៌ការងារ និង​ផលិតភាពជាតិឆ្នាំ២០២៣ បានចាប់ផ្តើមជាផ្លូវការហើយនៅព្រឹកថ្ងៃទី១០ ខែវិច្ឆិកា ឆ្នាំ២០២៣នេះ ដោយ​មានក្រុមហ៊ុន​ រោងចក្រ និងសហគ្រាសធំៗចំនួន១៥០ នឹងផ្តល់​ឱកាស​ការងារ​ប្រមាណជាង២ម៉ឺនកន្លែង សម្រាប់យុវជន សិស្ស និស្សិត និង​អ្នកស្វែងរកការងារធ្វើ។ ពិព័រណ៍​ការងារ និង​ផលិតភាពជាតិ​ដែលត្រូវ​ចាត់ទុកថា ជាព្រឹត្តិការណ៍​ការងារធំជាងគេប្រចាំឆ្នាំ នឹងប្រព្រឹត្តទៅរយៈពេល​២ថ្ងៃជាប់គ្នា គឺថ្ងៃទី១០-១១ ខែវិច្ឆិកា នៅអគារពិព័រណ៍កោះពេជ្រ ចាប់ពីម៉ោង៨ព្រឹក ដល់ម៉ោង៨យប់។

ឯកឧត្តម ហេង សួរ រដ្ឋមន្រ្តីក្រសួងការងារ និង​បណ្តុះបណ្តាលវិជ្ជាជីវៈ មានប្រសាសន៍ថា ពិព័រណ៍ការងារ និង​ផលិតភាពជាតិ បានធ្វើ​អស់រយៈពេល​១២ឆ្នាំមកហើយ បើក្រឡេកត្រឡប់ទៅខាងក្រោយ យើងនឹងឃើញថា ពិព័រណ៍ការងារ និង​ផលិតភាពជាតិ តែងតែត្រូវបានចាប់អារម្មណ៍ពីដៃគូពាក់ព័ន្ធនានាកាន់តែច្រើនទៅៗ ជាក់ស្តែងនៅក្នុងឆ្នាំ២០១១ ដែលយើងបានចាប់ផ្តើមដំបូង គឺមានតែស្តង់សម្រាប់អ្នកចូលរួមគឺមានតែ៣០ ហើយ​អ្នក​ដែលបានមកទស្សនាមានខ្ទង់ប្រមាណ ៥ពាន់នាក់ ហើយ​យើងមានសម្ភាសន៍ការងារនៅទីតាំងជាក់ស្តែងតែ២ពាន់កន្លែងទេ។ ប៉ុន្តែជាក់ស្តែងនៅថ្ងៃនេះ យើង​មានស្តង់ដែលចូលរួម១៥០ក្រុមហ៊ុន បូកជាមួយនឹងស្ថាប័នពាក់ព័ន្ធ គឺយើងមានរហូតដល់ទៅ ១៨៨ស្តង់ រីឯឱកាស​ការងារ គឺមានរហូតដល់ទៅ២ម៉ឺនកន្លែង ដែលនេះបង្ហាញឱ្យឃើញពីវឌ្ឍនៈភាព។

បើតាមការបញ្ជាក់របស់ឯកឧត្តមរដ្ឋមន្រ្តីក្រសួងការងារ ជារួមគោលដៅចុងក្រោយ គឺចង់ឃើញព្រឹត្តិការណ៍នេះ ក្លាយជាព្រឹត្តិការណ៍មួយ​ដែលទាំងអ្នកស្វែងរកការងារធ្វើ ក៏​ដូចជាអ្នកដែលកំពុងត្រូវការកម្លាំងពលកម្មអាចជួបគ្នាបាន ហើយ​អាចសម្រេច និង​ចាប់យកឱកាសនេះជាមួយគ្នា។ «ក្រុមហ៊ុនឯកជន អាចយកឱកាសនេះ ជាឱកាសរកបាននូវបុគ្គលិកដែលមានសមត្ថភាព រីឯយុវជន ក្មួយៗយើងដែលកំពុងស្វែងរកការងារ នេះជាឱកាសមួយ ជាកន្លែងមួយ ដែលប្អូនៗអាចដើរមើល ដើរសម្លឹង តើអាជីពការងារណាមួយដែលប្អូនៗស្រឡាញ់ពេញចិត្ត»។

សូមបញ្ជាក់ថា សម្រាប់ឱកាសការងារជាង ២ម៉ឺនកន្លែង នៅក្នុងឱកាសពិព័រណ៍ការងារ និង​ផលិតភាពជាតិ ដែលប្រព្រឹត្តទៅរយៈពេល២ថ្ងៃនៅអគារពិព័រណ៍កោះពេជ្រ គឺមានការងារមកពីវិស័យសំខាន់ៗដូចជា ធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រង សេវាកម្មលក់ដុំនិងរាយ ទេសចរណ៍ និងបដិសណ្ឋារកិច្ចម្ហូបអាហារ និងភេសជ្ជៈ អចលនទ្រព្យនិងសំណង់ ទូរគមនាគមន៍និងបច្ចេកវិទ្យាព័ត៌មានវិទ្យា ឧស្សាហកម្មនិងកម្មន្តសាល ព្រមទាំងវិស័យសេវាកម្មផ្សេងៗ ជាដើម។

សម្រាប់យុវជន សិស្ស និស្សិត និងអ្នកស្វែងរកការងារធ្វើទាំងអស់ អាចដាក់ពាក្យដោយផ្ទាល់ និងត្រូវបានសម្ភាសន៍ជ្រើសរើសភ្លាមៗដោយក្រុមហ៊ុន-សហគ្រាស ដែលចូលរួមតាំងបង្ហាញក្នុងបញ្ជរចំនួនជាង ១៨៨។ 

ក្រៅតែពីឱកាសការងារ នៅក្នុងឱកាសពិព័រណ៍ការងារ និង​ផលិតភាពជាតិ ក៏មានការរៀបចំផងដែលនូវសិក្ខាសាលាផលិតភាពដើម្បីលើកកម្ពស់ការយល់ដឹងស្តីពីការបង្កើនផលិតភាពការងារដោយមានការចែករំលែកចំណេះដឹង និងបទពិសោធន៍ពីវាគ្មិនជំនាញជាច្រើន៕