វិទ្យាល័យពេជ្រចិន្តា ខេត្តបាត់ដំបង ត្រូវ​បាន​ប្រកាស​ទទួលស្គាល់ថា ជាអង្គភាពផ្តល់សេវាសាធារណៈគំរូ ចំណាត់ថ្នាក់លេខ១ ក្នុងឆ្នាំ២០២៤។ ការទទួលស្គាល់នេះ ធ្វើឡើងក្នុងពិធីប្រកាសជ័យលាភីអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាលឆ្នាំ២០២៤ និងប្រកាសដាក់ឱ្យអនុវត្តសម្រាប់ឆ្នាំ២០២៥ រៀបចំ​ឡើង​ដោយ​ក្រសួងមុខងារសាធារណៈ កាលពីពេលថ្មីៗនេះ។

លោក ប៉ិច ឈឿត នាយកវិទ្យាល័យពេជ្រចិន្តា ដែលមាន​ទីតាំង​ស្ថិត​នៅស្រុកភ្នំព្រឹក ខេត្តបាត់ដំបង មានប្រសាសន៍ថា ក្នុងនាមជាគណៈគ្រប់គ្រង លោកពិតជាមានសេចក្ដីរំភើបរីករាយដែលវិទ្យាល័យពេជ្រចិន្តា បានទទួលលទ្ធផលល្អក្នុងការប្រកួត ការផ្ដល់សេវាសាធារណៈគំរូក្នុងវិស័យអប់រំនេះ។ លោក ប៉ិច ឈឿត បន្តថា លោកគ្រូ អ្នកគ្រូ សិស្សានុសិស្ស និងប្រជាជននៅក្នុងសហគមន៍ ក៏រំភើបរកអ្វីថ្លែងមិនបាន ចំពោះលទ្ធផលដែលបានមកពីការខិតខំប្រឹងប្រែងទាំងអស់គ្នា។

នាយកវិទ្យាល័យពេជ្រចិន្តា រូបនេះ បញ្ជាក់បន្ថែមថា វិទ្យាល័យពេជ្រចិន្តា អាចជាប់ចំណាត់ថ្នាក់លេខ១ ជ័យលាភីជាអង្គភាពផ្តល់សេវាសាធារណៈគំរូនេះ គឺមិនមែនជារឿងចៃដន្យនោះទេ ពោលគឺមានកត្តាធំៗចំនួន៥ រួមមាន ទី១. កត្តានាយក និងលោកគ្រូ អ្នកគ្រូ ជាមនុស្សដែលមានបេះដូងតែមួយចង់ឃើញសាលារបស់ខ្លួនរីកចម្រើន ដើរតាមចក្ខុវិស័យផែនការដែលបានកំណត់ច្បាស់លាស់ ដោយចង់ឃើញលទ្ធផលសិស្សមានទាំងគុណភាព និងមានសីលធម៌ល្អ, ទី២.​ ការចូលរួមរបស់សហគមន៍ ជួយកសាងហេដ្ឋារចនាសម្ព័ន្ធសាលា និងជួយឧបត្ថម្ភដល់សិស្សមានជីវភាពខ្វះខាត, ទី៣. កត្តាមាតាបិតាសិស្ស យល់ពីតម្លៃនៃការសិក្សា និងជួយជំរុញកូនឱ្យមករៀនគ្រប់ៗគ្នា, សហការជាមួយគ្រូក្នុងការជួយកូនក្នុងការរៀនសូត្រ និងយកចិត្តទុកដាក់ក្នុងការប្រជុំ ឬបង្កើតគណៈកម្មការគ្រប់គ្រងថ្នាក់រៀន, ទី៤. កត្តាសិស្ស មានវិន័យ​ មានសណ្ដាប់ធ្នាប់ និងលទ្ធផលសិក្សាល្អ និងទី៥. ការចូលរួមពីអជ្ញាធរ ថ្នាក់ដឹកនាំ អង្គការដៃគូ។

លោក ប៉ិច ឈឿត បន្ថែមថា លោកគ្រូ អ្នកគ្រូ បុគ្គលិកអប់រំនៅវិទ្យាល័យពេជ្រចិន្តា មានការសាមគ្គីផ្ទៃក្នុងល្អ មានអភិបាលកិច្ចសាលារៀនល្អ ដែលជាកត្តាសំខាន់សម្រាប់ដឹកនាំប្រកបដោយគណនេយ្យភាព តម្លាភាព និងប្រកបដោយភាពយុត្តិធម៌។ ទន្ទឹមគ្នានេះ វិទ្យាល័យពេជ្រចិន្តា ក៏មានក្រុមប្រឹក្សាកុមារយុវជន ដែលដើរតួនាទីសំខាន់ក្នុងការងារសាលាជំនួសលោកគ្រូ អ្នកគ្រូ ពោលគឺជាភ្នាក់ងារគ្រប់គ្រងសាលារៀន និងថ្នាក់រៀន, ភ្នាក់ងាររដ្ឋបាលសាលារៀន និងថ្នាក់រៀន និងជាភ្នាក់ងាររដ្ឋបាលការងារសង្គមរបស់សាលារៀន និងថ្នាក់រៀន។

លោក ប៉ិច ឈឿត បន្តថា សិស្សានុសិស្សនៅក្នុងវិទ្យាល័យពេជ្រចិន្តា គឺមានសមត្ថភាពខ្លាំងពូកែដែលទូទាំងប្រទេសគេទទួលស្គាល់ អាចប្រកួតប្រជែងក្នុងថ្នាក់តំបន់ និងពិភពលោកបាន។ លើសពីនេះ សិស្សចេះដឹកនាំសិស្ស រៀនខ្លួនឯងឱ្យពូកែ ចេះចែករំលែក រៀនសហការជាក្រុម ទាំងអស់នេះហើយជាកត្តាជំរុញឱ្យលទ្ធផលសិក្សាល្អប្រសើរ។

វិទ្យាល័យពេជ្រចិន្តា មានគ្រូបង្រៀនសរុបចំនួន ៣៧រូប ស្រី១០រូប,​ សិស្សមាន១៨២៣នាក់ ស្រី៨៤៤នាក់។ លោក ប៉ិច ឈឿត បន្ថែមថា បើធៀបនឹងការខ្វះគ្រូ គឺខ្វះរហូតដល់៣១ នាក់ ប៉ុន្តែដោយសារការប្រឹងប្រែងរបស់លោកគ្រូ អ្នកគ្រូ ធ្វើការមិនគិតយប់ថ្ងៃ ខិតខំជួយសិស្ស រហូតទទួលបានលទ្ធផលល្អ និងទទួលបានពានសេវាសាធារណៈគំរូ ដូចពេលបច្ចុប្បន្ននេះ។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា វិទ្យាល័យពេជ្រចិន្តា បានបង្ហាញពីការខិតខំប្រឹងប្រែងរបស់ខ្លួន និងមានភាពលេចធ្លោជាច្រើនឆ្នាំមកហើយ ទាំងការងារគ្រប់គ្រង លទ្ធផលសិក្សារបស់សិស្ស ការចូលរួមរបស់សហគមន៍ក្នុងការគាំទ្រសាលារៀន និងការរៀននិងបង្រៀន។ លោកជំទាវបន្តថា ទាំងនេះបង្ហាញពីនវានុវត្តន៍ និងគំនិតច្នៃប្រឌិតក្នុងការលើកកម្ពស់ការអប់រំ ក៏ដូចជាលទ្ធផលនៃកំណែទម្រង់អប់រំ។

បើតាមអនុក្រឹត្យស្ដីពីការវាយតម្លៃ និងការទទួលស្គាល់អង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាល ត្រង់ជំពូកទី២ មាត្រាទី៥ បញ្ជាក់ថា ការវាយតម្លៃ និងការទទួលស្គាល់អង្គភាពផ្ដល់លេវាសាធារណៈគំរូ ផ្អែកលើលក្ខណៈវិនិច្ឆ័យគោលសំខាន់ទាំង៨ រួមមាន ១. ស្តង់ដាសេវាសាធារណៈ, ២. ស្តង់ដា ឬនិយាមនៃការផ្ដល់សេវាតាមវិស័យអប់រំ ឬសុខាភិបាលផ្អែកលើករណីពាក់ព័ន្ធ, ៣. ការគ្រប់គ្រងហិរញ្ញវត្ថុសាធារណៈនៅក្នុងអង្គភាព, ៤. ការគ្រប់គ្រង និងការអភិវឌ្ឍធនធានមនុស្សនៅក្នុងអង្គភាព, ៥. ការរៀបចំនិងការកែលម្អបរិស្ថានអង្គភាព, ៦. ទំនាក់ទំនងល្អជាមួយប្រជាពលរដ្ឋ សហគមន៍និងដៃគូអភិវឌ្ឍន៍ ព្រមទាំងការចូលរួមវាយតម្លៃពីអ្នកប្រើប្រាស់សេវាសាធារណៈ, ៧. ការសោះស្រាយបញ្ហាប្រឈមនានាជាមួយមន្រ្តី ប្រជាពលរដ្ឋ ឬសហគមន៍ និង ៨. ការផ្ដួចផ្ដើមគំនិតថ្មីៗនិងនវានុវត្តន៍ដើម្បីធ្វើឱ្យអង្គភាពដំណើរការកាន់តែប្រសើរ៕