សម្រាប់ការប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុប ដែលគ្រោងនឹងប្រព្រឹត្ត​ទៅនៅថ្ងៃទី០៨ ខែតុលា ឆ្នាំ២០២៤ខាងមុខ ក្រសួងអប់រំ យុវជន និង​កីឡា បានកំណត់យកមុខវិជ្ជា ប្រវត្តិវិទ្យា សម្រាប់ថ្នាក់វិទ្យាសាស្រ្ត និង មុខ​វិជ្ជា ផែនដី និង​បរិស្ថានវិទ្យា សម្រាប់ថ្នាក់វិទ្យាសាស្រ្តសង្គម ជាវិញ្ញាសាជម្រើស​សម្រាប់​ការ​ប្រឡង​សញ្ញាបត្រមធ្យមសិក្សា​ទុតិយភូមិនាពេលខាងមុខនេះ។

បើយោង​តាម​ប្រកាស​ស្តីពីការរៀបចំ និង​ការប្រព្រឹត្ត​ទៅ​នៃការប្រឡងសញ្ញាបត្រមធ្យមសិក្សា​ទុតិយភូមិ សម្រាប់ឆ្នាំ​សិក្សា​២០២៣-២០២៤ មុខវិជ្ជាជម្រើស​សម្រាប់ថ្នាក់វិទ្យាសាស្រ្ត គឺត្រូវ​ជ្រើសរើស​មួយ​មុខវិជ្ជា​ក្នុង​ចំណោមមុខវិជ្ជា​ភូមិវិទ្យា ប្រវត្តិវិទ្យា សីលធម៌-ពលរដ្ឋវិជ្ជា និង​ផែនដី និងបរិស្ថានវិទ្យា។ ដោយឡែកមុខវិជ្ជាជម្រើសថ្នាក់វិទ្យាសាស្រ្តសង្គម ត្រូវ​ជ្រើសរើស​មួយ​មុខ​វិជ្ជាក្នុងចំណោម​រូបវិទ្យា គីមីវិទ្យា ជីវវិទ្យា និង​ផែនដី និង​បរិស្ថានវិទ្យា។

លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ​ យុវជន​ និងកីឡា មានប្រសាសន៍ថា ការប្រឡងសញ្ញាបត្រមធ្យមសិក្សា​ទុតិយភូមិ ក្រសួងតែងតែមានជម្រើសពីរ សម្រាប់ប្អូនៗសិស្សានុសិស្សទៅតាមបណ្ដុំសិក្សាដែលបានជ្រើសរើសនូវកម្រិតសិក្សាចាប់ពីថ្នាក់ទី១១មក។ មានន័យថា យើងមានបណ្ដុំពីរគឺវិទ្យាសាស្ត្រ និងវិទ្យាសាស្ត្រសង្គម ត្រូវមានមុខវិជ្ជាជម្រើសក្នុងការប្រឡង។​ ឧទាហរណ៍ នៅក្នុងមុខវិជ្ជាវិទ្យាសាស្រ្ត មានមុខវិជ្ជា គណិតវិទ្យា រូបវិទ្យា ជីវៈវិទ្យា គីមីវិទ្យា ដែលជាមុខវិជ្ជាត្រូវប្រឡងជាដាច់ខាត ហើយក្រៅពីនោះមានមុខវិជ្ជាមួយចំនួនទៀតជាមុខវិជ្ជាជម្រើសដែលចេញពីការជ្រើសរើសរបស់ក្រសួង។ ដូច្នេះ នៅក្នុងឆ្នាំនេះ មុខវិជ្ជាជម្រើសសម្រាប់ថ្នាក់វិទ្យាសាស្រ្ត គឺមុខវិជ្ជាប្រវត្តិវិទ្យា និងមុខវិជ្ជាជម្រើសសម្រាប់ថ្នាក់វិទ្យាសាស្រ្តសង្គម គឺមុខ​វិជ្ជា ផែនដី និង​បរិស្ថានវិទ្យា។

គួរ​បញ្ជាក់ថា សម្រាប់ការប្រឡងសញ្ញាបត្រមធ្យមសិក្សា​ទុតិយភូមិ​សម្រាប់ឆ្នាំសិក្សា​២០២៣-២០២៤ នឹងប្រព្រឹត្តទៅរយៈពេល​២ថ្ងៃ គឺនៅថ្ងៃទី៨ និង​ថ្ងៃទី៩ ខែវិច្ឆិកា ឆ្នាំ​២០២៤ ដោយវិញ្ញាសាសម្រាប់ថ្នាក់វិទ្យាសាស្រ្ត រួមមាន ៖ ១.មុខវិជ្ជាជម្រើស, ២.ជីវវិទ្យា, ៣.គីមីវិទ្យា, ៤.ភាសាបរទេស, ៥. អក្សរសាស្រ្តខ្មែរ, ៦.រូបវិទ្យា និង ៧.គណិតវិទ្យា។ ដោយ​ឡែក​មុខវិជ្ជាភាសាបរទេស ជាវិញ្ញាសាតាមស្ម័គ្រ។

សម្រាប់វិញ្ញាសាថ្នាក់វិទ្យាសាស្រ្តសង្គមវិញ រួមមាន ៖ ១.មុខវិជ្ជាជម្រើស, ២.ប្រវត្តិវិទ្យា, ៣.ភូមិវិទ្យា, ៤.ភាសាបរទេស, ៥.គណិតវិទ្យា, ៦.សីលធម៌-ពលរដ្ឋវិជ្ជា និង ៧.អក្សរសាស្រ្តខ្មែរ។ ដោយឡែកមុខវិជ្ជាភាសាបរទេស ក៏​ត្រូវ​បានចាត់ទុកថា ជាវិញ្ញាសាតាមស្ម័គ្រដូចគ្នា ដោយ​ត្រូវ​យក​ផលសងនៃពិន្ទុ ដែលសិស្ស​ធ្វើបានដកនឹង​២៥។

បើយោង​តាមសេចក្ដីណែនាំស្ដីពីដំណើរការនៃការប្រឡងបាក់ឌុប វិញ្ញាសាសម្រាប់ថ្នាក់វិទ្យាសាស្រ្ត ត្រូវចែកឱ្យបេក្ខជនម្នាក់ៗ រួមមាន គណិតវិទ្យា គីមីវិទ្យា ជីវវិទ្យា រូបវិទ្យា និងភាសាបរទេស។ ដោយឡែកវិញ្ញាសាអក្សរសាស្រ្តខ្មែរ និងមុខវិជ្ជាជម្រើសប្រវត្តិវិទ្យា ជាវិញ្ញាសាដែលអនុរក្ស ត្រូវចម្លងដាក់លើក្ដារខៀន។ ចំណែក វិញ្ញាសាសម្រាប់ថ្នាក់វិទ្យាសាស្រ្តសង្គម ត្រូវចែកឱ្យបេក្ខជនម្នាក់ៗ រួមមាន គណិតវិទ្យា ភាសាបរទេស ។ ដោយឡែក វិញ្ញាសាអក្សរសាស្រ្តខ្មែរ ភូមិវិទ្យា ប្រវត្តិវិទ្យា សីលធម៌-ពលរដ្ឋវិជ្ជា រួមទាំង ផែនដីនិងបរិស្ថានវិទ្យា ជាវិញ្ញាសាដែលអនុរក្សត្រូវចម្លងដាក់លើក្ដារខៀន៕