ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីថ្ងៃទី១១ វិច្ឆិកា ក្រសួងអប់រំ យុវជន និងកីឡា ដោយមានការគាំទ្រពី ក្រុមហ៊ុន Danone បានប្រកាសបើកយុទ្ធនាការសុវត្ថិភាពចំណីអាហារតាមសាលារៀន ក្រោមប្រធានបទ “សុខភាពកុមារ និងជាតិដែក” រដូវកាលទី២។
យុទ្ធនាការនេះ ធ្វើឡើងស្របគ្នានឹងខ្លឹមសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអបអរសាទរទិវាជាតិអាហារូបត្ថម្ភ ដែលបានអំពាវនាវដល់ក្រសួងអប់រំ ត្រូវពង្រឹងវិធានការហាមឃាត់ការទទួលទាន ការចែកចាយ ការដាក់តាំងលក់ និងការផ្សព្វផ្សាយពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទ នៅក្នុងនិងជុំវិញបរិវេណគ្រឹះស្ថានសិក្សាចំណេះដឹងទូទៅ។
ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ក្រសួងអប់រំ បានបន្តលើកកម្ពស់ការអប់រំអាហារូបត្ថម្ភដល់សិស្សានុសិស្ស តាមរយៈកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ និងការផ្តល់សេវាអប់រំស្តីពីអាហារូបត្ថម្ភ។ ឯកឧត្តមបណ្ឌិតសភាចារ្យ ក៏បានអំពាវនាវដល់អង្គភាពពាក់ព័ន្ធទាំងអស់បន្តចូលរួមជាមួយសាលារៀនឱ្យបានផុសផុល ដើម្បីលើកកម្ពស់សុខភាព និងផ្តល់ការអប់រំប្រកបដោយបរិយាកាសល្អដល់សិស្សានុសិស្ស ស្របតាមទិសដៅអាទិភាពគោលនយោបាយអប់រំ គឺធានាឱ្យប្រជាពលរដ្ឋកម្ពុជាគ្រប់រូបទទួលបានការអប់រំប្រកបដោយគុណភាព សមធម៌ និងបរិយាបន្ន ពោរពេញដោយចំណេះដឹង បំណិន វិន័យ សីលធម៌ និងឥរិយាបថល្អ សុខភាពល្អ កាយសម្បទារឹងមាំ និងការសិក្សាពេញមួយជីវិត។
យុទ្ធនាការសុវត្ថិភាពចំណីអាហារតាមសាលារៀន រដូវកាលទី១ បានដាក់ឱ្យដំណើរការកាលពីថ្ងៃទី៧ ឧសភា ឆ្នាំ២០២៥ ក្រោមប្រធានបទ «សុខភាពកុមារ និងជាតិដែក» ។ យុទ្ធនាការនោះ មានគោលបំណងដើម្បីរួមគ្នាកាត់បន្ថយភាពស្លេកស្លាំងដោយសារកង្វះជាតិដែកលើកុមារ និងផ្សព្វផ្សាយការអនុវត្តសុវត្ថិភាពចំណីអាហារតាមសាលារៀននៅក្នុងប្រទេសកម្ពុជា។
ដោយឡែកយុទ្ធនាការសុវត្ថិភាពចំណីអាហារតាមសាលារៀន រដូវកាលទី២នេះ ផ្ដោតលើ ទី១. ការអប់រំពីសុវត្ថិភាពចំណីអាហារ និងពង្រឹងការចែកចាយអាហារូបត្ថម្ភតាមសាលារៀន ទី២. ការផ្តល់ ទឹកដោះគោទឹក Dugro ដែលជាផលិតផលទឹកដោះគោដំបូងគេ និងតែមួយគត់ ដែលត្រូវបានទទួលស្គាល់ពី ក្រសួង អប់រំ យុវជន និងកីឡា ដាក់តាមសាលារៀន និងទី៣. លើកតម្កើងការបរិភោគអាហារសុខភាព៖ អាហារដែលមានតុល្យភាព ដែលសម្បូរដោយអាហារូបត្ថម្ភមានជាតិដែក និងវីតាមីនស៊ី និងចៀសវាងភេសជ្ជៈផ្អែម។
សូមជំរាបជូនថា ដើម្បីលើកកម្ពស់អាហារូបត្ថម្ភដល់សិស្សានុសិស្ស ក្រសួងអប់រំ បានដាក់ចេញនូវគោលនយោបាយជាច្រើន រួមមាន គោលនយោបាយស្តីពី «សុខភាពសិក្សា» «អាហារូបត្ថម្ភ» និង «ការផ្តល់អាហារតាមសាលារៀន ឆ្នាំ២០២៤-២០៣៥» ដោយប្រើប្រាស់កសិផលក្នុងសហគមន៍ ស្របតាម «ក្របខ័ណ្ឌគោលនយោបាយជាតិគាំពារសង្គមឆ្នាំ២០២៥» ដើម្បីធានាបានសុវត្ថិភាពចំណីអាហារ និងអាហារូបត្ថម្ភ ព្រមទាំងគាំទ្រការអភិវឌ្ឍសេដ្ឋកិច្ចសហគមន៍មូលដ្ឋាន សំដៅឆ្លើយតបទៅនឹងបញ្ហាកង្វះអាហារូបត្ថម្ភ អសន្តិសុខស្បៀងក្នុងគ្រួសារ និងសហគមន៍ ការជំរុញភាពលូតលាស់ និងដើម្បីលើកកម្ពស់ ការសិក្សា របស់កុមារ៕
