វិទ្យាសាស្រ្ត​មិន​មែន​សម្រាប់តែបុរសទេ ការចង់ដឹងចង់ឃើញ ភាពវៃឆ្លាត និង​ការ​ច្នៃប្រឌិត គឺមានលក្ខណៈ​ជាសកល, យុវនារីគ្រប់រូបដែលជ្រើសរើសក្លាយជាវិស្វករ អ្នកវិទ្យាសាស្ត្រកុំព្យូទ័រ អ្នកស្រាវជ្រាវ ឬសហគ្រិន មិនត្រឹមតែសម្រាប់អនាគតខ្លួនឯងប៉ុណ្ណោះទេ ថែមទាំងសម្រាប់ការអភិវឌ្ឍប្រទេសជាតិផងដែរ។ នេះជា​ប្រសាសន៍​លើកឡើងរបស់​ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្នុងសន្និសីទស្តីពីអំណាច និង​សកម្មភាពរបស់ស្រ្តី នៅវិទ្យាស្ថានបច្ចេកវិទ្យាកម្ពុជា កាលពីដើមសប្តាហ៍​នេះ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា យោង​តាម​លទ្ធផល នៃការ​ប្រឡង​សញ្ញាបត្រ​មធ្យមសិក្សា​ទុតិយភូមិ​កន្លងទៅថ្មីៗនេះ គេមើលឃើញថា អត្រា​សិស្ស​ជាស្រ្តី​ទទួលបាន​និទ្ទេស A ដល់ទៅ ៥៦,៤១% នៃចំនួនសិស្ស​និទ្ទេស A សរុប ៣០០៣នាក់។ យ៉ាងណាតាមរយៈ ការធ្វើជាម្ចាស់ផ្ទះនៃសន្និសីទស្តីពីអំណាច និង​សកម្មភាពរបស់ស្រ្តី មិនត្រឹមតែជាការចែករំលែកចំណេះដឹង ផ្លាស់ប្តូរការគិតប៉ុណ្ណោះទេ តែក៏កំពុងកសាងទស្សនៈវិស័យរួមគ្នាមួយសម្រាប់អនាគតប្រែក្លាយកម្ពុជាទៅជាប្រទេសដែលមានលក្ខណៈអំណោយផល ផ្តល់ឱកាសសម្រាប់យុវតីវ័យក្មេងដែលមានសក្តានុពល ឱ្យក្លាយជាអ្នកវិទ្យាសាស្ត្រ វិស្វករ អ្នកបង្កើតថ្មីប្រកបដោយភាពច្នៃប្រឌិតខ្ពស់ និងនិរន្តរភាព។

លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និង​វិចិត្រសិល្បៈ មានប្រសាសន៍ថា យោងតាមប្រវត្តិសាស្រ្ត និងទំនៀមទម្លាប់តាំងពីបរមបុរាណមក កម្ពុជាមានប្រពៃណីឱ្យតម្លៃខ្ពស់ដល់តួនាទីស្ត្រីក្នុងសង្គម ហើយបច្ចុប្បន្នកម្ពុជាបានឈានចូលដល់យុគសម័យថ្មីដែលបាននិងកំពុងលើកកម្ពស់ស្ត្រី តាមរយៈការជំរុញលើកទឹកចិត្តឱ្យស្ត្រីចូលរួមក្នុងការអភិវឌ្ឍជាតិគ្រប់រូបភាព និងជំរុញឱ្យស្ត្រីសិក្សាបានខ្ពស់ ក្លាយជាវិស្វករជាដើម ជាក់ស្តែង មានលោកស្រី Claudie Haigneré បានក្លាយជាមន្ត្រីជាន់ខ្ពស់ឡើងដល់លម្ហអវកាស ដូច្នេះសូមស្រ្តីកម្ពុជាបន្តការខិតខំប្រឹងប្រែងរៀនសូត្រពង្រឹងសមត្ថភាពឱ្យបានរឹងមាំ។

នាឱកាសនោះដែរ ឯកឧត្តម Olivier Richard ឯកអគ្គរដ្ឋទូតបារាំងប្រចាំកម្ពុជា បានបង្ហាញនូវក្ដីរីករាយដែលបានឃើញកំណើនស្ត្រីក្នុងវិស័យវិស្វកម្ម និងវិទ្យាសាស្ត្រនៅកម្ពុជា ដោយជឿជាក់ថាស្ត្រីដែលកំពុងចូលរួមក្នុងសន្និសីទនេះ នឹងបន្តខិតខំប្រឹងប្រែងអភិវឌ្ឍខ្លួនឈោងចាប់ឱកាស ក្លាយជាអ្នកដឹកនាំផងដែរ។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែង​អំណរគុណ​ដល់រដ្ឋាភិបាលបារាំង ដែល​បាន​ចូលរួម​គាំទ្រ​ដល់​ការ​អភិវឌ្ឍធនធាន​មនុស្ស​នៅ​កម្ពុជា តាមរយៈការផ្ដល់អាហារូបករណ៍ និងកម្មវិធីការផ្លាស់ប្ដូរនិស្សិត និងការគាំទ្រដល់ការរៀបចំឱ្យមានកម្មវិធីនិងវេទិកាចែករំលែកបទពិសោធ ចំណេះដឹង ជាពិសេសបានបង្ហាញការប្ដេជ្ញាបន្តពង្រឹងនិងពង្រីកកិច្ចសហប្រតិបត្តិការបន្ថែមទៀតក្នុងវិស័យអប់រំ យុវជន និងកីឡានៅកម្ពុជា។

ជាមួយ​គ្នានេះ ឯកឧត្តមរដ្ឋមន្រ្តី ក៏បានកោតសរសើរចំពោះលោកស្រី Claudie Haigneré ជាអតីតគ្រូពេទ្យ និងជាអ្នកអវកាស ដែលនេះជាគំរូឧត្តមភាពមួយ ចូលរួមជំរុញលើកទឹកចិត្តដល់ស្ត្រីផ្សេងទៀត ឱ្យបន្តខិតខំប្រឹងប្រែងកសាងសមត្ថភាព និងឃើញយ៉ាងជាក់ច្បាស់ថា គ្មានឡើយដែនកំណត់សម្រាប់ស្រ្តីដើម្បីសម្រេចក្ដីស្រមៃរបស់ខ្លួន និងសូមផ្តាំផ្ញើដល់យុវតីទាំងអស់ថាត្រូវ “ហ៊ានជឿលើក្តីសុបិន្តរបស់អ្នក ហ៊ានប្រឡូកក្នុងពិភពវិទ្យាសាស្ត្រ ហ៊ានប្រឡូកក្នុងភាពច្នៃបង្កើតថ្មី អនាគតត្រូវការអ្នកទាំងអស់គ្នា”៕