ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅឆ្នាំ២០២២ សិស្សសាលាកម្រិតបឋមសិក្សា ៦,៥ភាគរយ នៅសហភាពអឺរ៉ុប កំពុងរៀនភាសាបរទេស ពីរ ឬច្រើនជាងពីរភាសា ក្នុងនោះប្រទេសលុចសំបួរ មានអត្រាអ្នករៀនភាសាបរទេសច្រើនបំផុត, នេះបើយោងតាម Eurostat ។
យោងតាម euro news មានអត្ថប្រយោជន៍ជាច្រើន ដែលទទួលបានពីការរៀនភាសាបរទេសនៅវ័យក្មេង ដោយហេតុថា ការសិក្សាភាសាបរទេសអាចធ្វើកុមារយល់ដឹងពីពិភពលោកកាន់តែទូលំទូលាយ, អនុញ្ញាតឱ្យកុមារអាចសន្ទនាជាមួយជនជាតិដទៃ, អាចស្វែងយល់ពីដើមកំណើតភាសាកាន់តែច្បាស់ និងងាយស្រួលទំនាក់ទំនងនៅពេលមានឱកាសទៅបរទេស។ លើសពីនេះ ពួកគេនឹងមានសមត្ថភាពប្រើប្រាស់ភាសាពហុភាសា ហើយមានឱកាសការងារសម្បូរបែប, ងាយស្រួលទំនាក់ទំនង និងពង្រឹងកិច្ចសន្ទនាអន្តរវប្បធម៌។
ការសិក្សាលក្ខខណ្ឌវិទ្យាសាស្ត្រ ក៏បានបង្ហាញផងដែរថា មនុស្សម្នាក់ដែលនិយាយច្រើនជាងមួយភាសា អាចពន្យារពេលនៃការផ្ដើម នៃជំងឺភ្លេចភ្លាំង។ ត្បិតថា ការសិក្សាភាសាបរទេសកាន់តែឆាប់ កាន់តែល្អសម្រាប់ការរស់នៅ និងខួរក្បាល ប៉ុន្តែការរៀនភាសាបរទេស ក្នុងចំណោមប្រជាជន នៃប្រទេសនីមួយៗមិនស្មើគ្នាទេ។
លុចសំបួ គឺជាប្រទេសតែមួយគត់ក្នុងសហភាពអឺរ៉ុប ដែលមានសិស្សបឋមសិក្សា រហូតដល់ ៧៩,៦ភាគរយ កំពុងរៀនភាសាបរទេសពីរ ឬច្រើនជាងនេះ។ បើតាម Eurostat មូលហេតុ ដែលនាំឱ្យកុមារ លុចសំបួរ រៀនច្រើនភាសា ដោយសារតែភាសាផ្លូវការរបស់ប្រទេសនេះ មានបីសំខាន់ រួមមាន ភាសាបារាំង អាឡឺម៉ង់ និងលុចសំបួរ ប៉ុន្តែភាសាបារាំង និងអាឡឺម៉ង់ ត្រូវបានរាប់ថា ជាភាសាបរទេស។ ចំណាត់ថ្នាក់បន្តបន្ទាប់មកទៀតគឺ ប្រទេសឡាតវី ៣៧,២ភាគរយ, ក្រិក ៣៤,៩ភាគរយ និងអេស្តូនី ៣៣,៦ភាគរយ។
គិតត្រឹមឆ្នាំ២០២២ ការសិក្សាភាសាបរទេសពីរ ឬច្រើនជាងនេះ ក្នុងចំណោមជនជាតិអឺរ៉ុប កំពុងកើនឡើងទូទាំងសហភាពអឺរ៉ុប។ ដោយនៅចន្លោះឆ្នាំ២០១៣ និង២០២២ សិស្សបឋមសិក្សា ក្នុងសហភាពអឺរ៉ុប ដែលរៀនភាសាបរទេសយ៉ាងហោចណាស់ពីរ បានកើនឡើងពី ៤,៦ ទៅ ៦,៥ ភាគរយ។ ទន្ទឹមនឹងការកើនឡើង ប្រទេសក្នុងសហភាពអឺរ៉ុប ចំនួន ៩ មានតួលេខនៃអ្នករៀនភាសាធ្លាក់ចុះ ក្នុងនោះមានប្រទេសពីរ ដែលតួលេខធ្លាក់ចុះ គួរឱ្យកត់សម្គាល់ ដោយ ប៉ូឡូញ ធ្លាក់ចុះ ៦,៨ភាគរយ និងលុចសំបួរធ្លាក់ចុះ ៤,២ ភាគរយ។
ដោយឡែក នៅកម្រិតមធ្យមសិក្សាបឋមភូមិ ៦០,៧ភាគរយ នៃសិស្សកំពុងរៀនភាសាបរទេសពីរ ឬច្រើនជាងនេះ ក្នុងឆ្នាំ២០២២។ ការសិក្សារបស់ Eurostat បានបង្ហាញថា ភាគរយខ្ពស់បំផុតគឺ ប្រទេសហ្វាំងឡង់ មានចំនួន ៩៨ភាគរយ, អ៊ីតាលី ៩៦ភាគរយ និងក្រិក ៩៦ភាគរយ។ ផ្ទុយទៅវិញ អត្រាទាបបំផុត ត្រូវបានគេរកឃើញនៅក្នុងប្រទេស អៀកឡង់ ដែលមានអ្នកសិក្សាភាសាចំនួន ២ ឬលើសនេះនៅកម្រិតមធ្យមសិក្សាបឋមភូមិចំនួន ៦,១ភាគរយ, ហុងគ្រី ៦,៦ភាគរយ និងអូទ្រីស ៧,៧ភាគរយ។
ការសិក្សាក៏បានបង្ហាញផងដែរថា ដូចនៅកម្រិតបឋមសិក្សាដែរ ការរៀនភាសាបរទេសមានការកើនឡើងនៅកម្រិតមធ្យមសិក្សា។ បើប្រៀបធៀបនឹងឆ្នាំ២០១៣ មានសិស្សដែលរៀនយ៉ាងហោចណាស់ពីរភាសា ៥៨,៤ភាគរយ បានកើនឡើងដល់ ៦០,៧ភាគរយ ក្នុងឆ្នាំ២០២២។ ក្នុងនោះ ប្រទេសដែលមានភាគរយកើនឡើងខ្ពស់ជាងគេ គឺ ឆេកមាន ២៤,១ភាគរយ, បារាំងមាន ២១,៨ភាគរយ និងប៊ែលហ្សិកមាន ១៨,៥ភាគរយ ខណៈប៊ែលហ្សិក ជាប្រទេសដែលមានភាសាផ្លូវការបី រួមមាន ភាសាហូឡង់ បារាំង និងអាល្លឺម៉ង់៕
