ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្ពុមេរា នឹងរៀបចំជាកម្មវិធី «លិខិតជូនបុប្ផាណា៖ ៥០ឆ្នាំអំពីការចងចាំ និងការតស៊ូ» ដើម្បីផ្តល់ឱកាសដល់អ្នកអាន និងយុវជនកម្ពុជាបានសិក្សាឈ្វេងយល់បន្ថែមអំពីប្រវត្តិសាស្រ្ត និងឆ្លុះបញ្ចាំងគំនិតទៅអនាគត។ កម្មវិធីនេះ គ្រោងនឹងធ្វើឡើងនៅថ្ងៃសៅរ៍ចុងសប្តាហ៍នេះ នៅទីតាំងសហគមន៍ផ្ទះចាស់ (ផ្សារចាស់) ចាប់ពីម៉ោង ៤ រសៀល ដល់ ៧ យប់។
អ្នកស្រី សូ ភីណា ជាអ្នកនិពន្ធ និងជាអ្នកបោះពុម្ពផ្សាយនៃកម្ពុមេរា មានប្រសាសន៍ថា កម្មវិធី «លិខិតជូនបុប្ផាណា៖ ៥០ឆ្នាំអំពីការចងចាំ និងការតស៊ូ» នេះ មានគោលបំណងផ្តល់ឱកាសដល់អ្នកអាន និងយុវជនកម្ពុជាបានសិក្សាឈ្វេងយល់បន្ថែម អំពីជីវិតរបស់នាងបុប្ផាណា និងទទួលបានឱកាសឆ្លុះបញ្ចាំងអំពីអនាគត បន្ទាប់ពីព្រឹត្តិការណ៍ប្រវត្តិសាស្រ្តដ៏ជូរចត់នៃ ៥០ ឆ្នាំមុន។ អ្នកចូលរួមនឹងមានឱកាសចូលរួមក្នុងកិច្ចពិភាក្សា ទស្សនា និងឈ្វេងយល់ ពីពិព័រណ៍ «បុប្ផាណានៃការចងចាំ» និងសរសេរលិខិត កំណាព្យ ឬពាក្យពេចន៍នានាជូនបុប្ផាណា។
អ្នកបោះពុម្ពផ្សាយនៃកម្ពុមេរា រូបនេះ បញ្ជាក់ន្ថែមថា កម្មវិធី «លិខិតជូនបុប្ផាណា៖ ៥០ឆ្នាំអំពីការចងចាំ និងការតស៊ូ» មានសកម្មភាពបីទាក់ទងគ្នា គឺ ពិព័រណ៍ «បុប្ផាណានៃការចងចាំ» ដែលអ្នកចូលរួមនឹងបានឈ្វេងយល់បន្ថែមអំពីខ្លឹមសារដកស្រង់ពីប្រលោមលោក «បុប្ផាណា៖ ផ្កាមិនរុះរោយ», ការចែករំលែករបស់អ្នកអានអំពីសារៈសំខាន់នៃការអាន និងសិក្សាឈ្វេងយល់អំពីប្រវត្តិសាស្រ្ត និងអ្នកចូលរួមអាចសរសេរពីអ្វីដែលមានក្នុងចិត្តរបស់ពួកគេ អំពីអតីតកាល និងអនាគត ក្នុងនាមជាយុវជនជំនាន់ក្រោយ។
អ្នកស្រី សូ ភីណា បានស្វាគមន៍ និងលើកទឹកចិត្តអ្នកគ្រប់គ្នាឱ្យចូលរួមក្នុងកម្មវិធីនេះ ទាំងអ្នកអានសៀវភៅ បុប្ផាណា៖ ផ្កាមិនរុះរោយ, ទាំងអ្នកអានសៀវភៅប្រវត្តិសាស្រ្តគ្រប់ប្រភេទ មកចូលរួមជាមួយគ្នា ដើម្បីរំឭកដល់វិញ្ញាណក្ខន្ធដល់នាងបុប្ផាណា ចងចាំប្រវត្តិសាស្រ្ត និងឆ្លុះបញ្ចាំងគំនិតទៅអនាគត តាមរយៈសកម្មភាពនានានៃកម្មវិធីនេះ។
«ជាយុវជន ខ្ញុំមានជំនឿយ៉ាងមុតមាំថា ការចងក្រង ស្រាវជ្រាវ និពន្ធ វិភាគពីប្រវត្តិសាស្រ្តក្នុងទម្រង់ណាក៏ដោយ សុទ្ធតែមានសារៈសំខាន់ណាស់ ក្នុងការអប់រំ លើកកម្ពស់ការយល់ដឹងអំពីមូលហេតុ និងជាពិសេសការចូលរួមបង្ការកុំឱ្យអតីតកាលខ្លោចផ្សារកើតឡើងម្តងទៀត»។
អ្នកស្រី សូ ភីណា បន្ថែមថា ក្រៅពីកម្មវិធីនេះ នៅមានកម្មវិធីជាច្រើនទៀត ដែលរៀបចំឡើងដើម្បីរំឭកខួប ៥០ ឆ្នាំ បន្ទាប់ពីការឡើងកាន់អំណាចរបស់របបខ្មែរក្រហមកាលពីខែមេសា ឆ្នាំ១៩៧៥ ដូចជា កម្មវិធី «ការបន្លឺការចងចាំរំឮកពីអតីតកាល អប់រំសម្រាប់អនាគត» រៀបចំដោយមជ្ឈមណ្ឌលធនធានសោតទស្សន៍បុប្ផាណា, វេទិកាចែករំលែក «ការផ្សះផ្សា និងការលើកលែងទោសបន្ទាប់ពីអំពើប្រល័យពូជសាសន៍» រៀបចំដោយសហគមន៍សិក្សាអាស៊ីអាគ្នេយ៍នៃសាកលវិទ្យាល័យអាមេរិកាំងភ្នំពេញជាដើម ដែលយុវជន ក៏ដូចជាសាធារណជនគួរចូលរួមសិក្សាឈ្វេងយល់ទាំងអស់គ្នា។ លើសពីនេះ នៅមានបណ្ណសារ ដែលជាឃ្លាំងផ្ទុកនូវសំណៅ ឯកសារ រូបភាព វីដេអូនានា ដែលជាទូទៅបើកចំហសម្រាប់អ្នកសិក្សាជានិច្ច ដែលអ្នកសិក្សាមិនគួររំលង៕
