​កម្មវិធី Innovative teach challenge រដូវកាលទី២ ត្រូវ​បានសម្ពោធជាផ្លូវការកាលពីចុងសប្តាហ៍​កន្លងទៅនេះ ក្រោមប្រធាទ «កសាងអនាគតប្រកបដោយនវានុវត្តន៍ថ្ងៃនេះ» ។

ឯកឧត្តម ឈៀង វណ្ណមុនិណ្ណ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិសហគ្រិនខ្មែរ ដែលជាស្ថាប័នគាំទ្រកម្មវិធីនេះ បានមានប្រសាសន៍ថា កម្មវិធីនេះ នឹងជំរុញឱ្យមានការគិតគូរអំពីនវានុវត្តន៍ច្រើនបន្ថែមទៀត ក្នុងប្រទេសកម្ពុជា។

ឯកឧត្តមបន្ដថា សម្រាប់ការប្រកួតនៅឆ្នាំនេះមានលក្ខណៈពិសេសជាងឆ្នាំមុន ដោយសារមានការប្រកួតថ្នាក់ជាតិនៅវគ្គបន្ទាប់ ដែលជាការប្រមូលក្រុមនិសិត្សឆ្នើម ៣ក្រុមពីគ្រប់ ២៥ សាកលវិទ្យាល័យ ទូទាំងប្រទេសកម្ពុជា។ ការប្រកួតប្រជែងនេះគឺជាការប្រមូលផ្តុំនូវចំណេះដឹង និងការសម្រិតសម្រាំងយកគំនិតនវានុវត្តន៍ និងគំនិតធុរកិច្ចដែលថ្មី និងផ្តល់ប្រយោជន៍ដល់ប្រទេសកម្ពុជា។

ការប្រកួតប្រជែងនវានុវត្តន៍នេះនឹងជំរុញ ការគិតគូរប្លែកៗ និងចាប់យកបច្ចេកវិទ្យាថ្មីៗឱ្យបានច្រើន ក្នុងវិស័យធុរកិច្ច ហើយការគិតគូរប្លែកៗនេះ នឹងជំរុញសេដ្ឋកិច្ចជាតិយើងឱ្យបានរីកចម្រើនកាន់តែលឿនថែមទៀត។

ឯកឧត្តម ឈៀង វណ្ណមុនិណ្ណ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិសហគ្រិនខ្មែរ

លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យ ខេមតិច មានប្រសាសន៍ថា ការបង្កើតកម្មវិធីនេះឡើង គឺមានគោលបំណងចម្បងបី៖ ទី១ ចង់បន្ថែមនូវកម្មវិធីដែលទាក់ទងទៅនឹងសហគ្រិនភាព ក៏ដូចជាការបណ្ដុះនូវធុរកិច្ចថ្មី ដែលជាចំណែកចូលរួមដ៏សំខាន់ នៅក្នុងចក្ខុវិស័យអភិវឌ្ឍប្រទេសកម្ពុជាសម្រាប់ឆ្នាំ២០៣០ និង២០៥០, ទី២ ជំរុញគំនិតធុរកិច្ចថ្មី ដោយផ្ដោត​លើ​បច្ចេកវិទ្យា និង STEM និងទី៣ ជំរុញឱ្យមានការគិតពីធុរកិច្ចថ្មី គំនិតថ្មី ដែលមាននវានុវត្តន៍នោះឱ្យខុសពីបរិបទមុន ខណៈបរិបទមុន យើងផ្ដោតទៅលើការអភិវឌ្ឍខ្លួនឯង ហើយពឹងផ្អែកទៅលើរដ្ឋាភិបាល និងដៃគូ បរទេសច្រើន ក្នុងការដោះស្រាយបញ្ហាសង្គម។

ប៉ុន្តែពេលនេះ យើងជំរុញឱ្យនិស្សិត ក៏ដូចជា យុវជន យុវនារី ឱ្យគិតថា ក្រៅពីមានបានខ្លួនឯង តាមរយៈសហគ្រិនភាព ក្នុងបរិបទថ្មី តើពួកគេ​ក៏​អាចឃើញបញ្ហាសង្គម បានដោយរបៀបណាខ្លះ? នេះជាប្រសាសន៍បន្ថែមរបស់ លោកបណ្ឌិត ឃៀង សុធី។

បើទោះបីកម្មវិធីនេះ មានឈ្មោះជាការប្រកួតក៏ដោយ ក៏យើងត្រូវគិតថាវាជាការប្រកួតប្រជែងបែបសហការគ្នា យើងត្រូវដោះស្រាយបញ្ហាជាមួយគ្នា ព្រោះថាពិភពលោកកំពុងតែជួបបញ្ហា ដូចជាបញ្ហា​ ទាក់ទងជា មួយ នឹងបញ្ញាសិប្បនិម្មិត  ការឡើងកម្ដៅផែនដី  និងការប្រែប្រួលអាកាសធាតុជាដើម។

លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យ ខេមតិច

គួរជម្រាបជូនថា កម្មវិធី Innovative Teach Challenge ត្រូវបានបង្កើតឡើងនៅឆ្នាំ២០២៣ ដោយមានគំនិតផ្ដួចផ្ដើមសហការបង្កើតឡើងដោយសាកលវិទ្យាល័យ ខេមតិច និងសហគ្រិនខ្មែរ។ សម្រាប់រដូវកាលទី២នេះ កម្មវិធីបានសហការជាមួយ សាកលវិទ្យាល័យចំនួន ២៥ ទូទាំងប្រទេស ដើម្បីប្រកាសជ្រើសរើសសិស្ស និស្សិត ដែលមានគំនិតច្នៃប្រឌិតថ្មីៗក្នុងសម័យបច្ចេកវិទ្យាទូទាំងប្រទេសឱ្យចូលរួមប្រកួតប្រជែង។

ក្នុងនេះដែរនិស្សិតដែលនឹងត្រូវជ្រើសរើសចំនួន ១០ក្រុមចុងក្រោយនឹងទទួលបានការបណ្តុះ បណ្តាលចំនួន ០៨ វគ្គលើប្រធានបទទាក់ទងនឹងការបង្កើតធុរកិច្ចថ្មី​ ផែនការអាជីវកម្ម និងពង្រឹងជំនាញសហគ្រិនភាពរហូតដល់ថ្ងៃធ្វើបទបង្ហាញជាសាធារណៈប្រកួតប្រជែង យកជ័យលាភីទាំងបីក្រុមផងដែរ។​

• ជ័យលាភីទី១​នឹងទទួលបាន​៣៥០០ដុល្លារអាមេរិក
• ជ័យលាភីទី២នឹងទទួលបាន​២៥០០ដុល្លារអាមេរិក
• ជ័យលាភីទី៣នឹងទទួលបាន២០០០ដុល្លារអាមេរិក
• ជ័យលាភីចំនួន៧ក្រុមដែលបានឆ្លងមកវគ្គផ្តាច់ព្រ័ត្រនឹងទទួលបាន៥០០ដុល្លារអាមេរិក

សម្រាប់និស្សិតដែលកំពុងសិក្សានៅតាមបណ្តាគ្រឹះសា្ថនឧត្តមសិក្សា និងវិទ្យាស្ថានបណ្ដុះបណ្ដាលបច្ចេកទេស និងវិជ្ជាជីវៈ ដែលមានចំណាប់អារម្មណ៍ អាចដាក់ពាក្យចូលរួមការប្រកួតប្រជែងគម្រោងនវានុវត្តន៍បច្ចេកវិទ្យារបស់ខ្លួន ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែកក្កដា ឆ្នាំ២០២៤។ ការដាក់ពាក្យប្រកួតតាមរយៈតំណភ្ជាប់ https://forms.gle/KUo7ps6Amkz584dRA ៕