ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នាយកប្រតិបត្តិ នៃមជ្ឈមណ្ឌលកម្ពុជា ៤.០ ឯកឧត្តម អាំង សុវណ្ណរ័ត្ន មានប្រសាសន៍ថា ដើម្បីអាចសម្របខ្លួនទៅនឹងតម្រូវការទីផ្សារការងារនាពេលបច្ចុប្បន្ន យុវជនចាំបាច់ត្រូវមានជំនាញគោលឱ្យច្បាស់ និងត្រូវចេះប្រើប្រាស់ AI ជាជំនួយការឆ្លាតវៃ ។
ក្នុងសិក្ខាសាលាស្ដីពី «យុវជននៅក្នុងយុគសម័យ AI» នាព្រឹកថ្ងៃទី ១៩ ខែធ្នូ ឆ្នាំ២០២៥ ដែលរៀបចំនៅសាកលវិទ្យាល័យ ប៊ែលធី អន្តរជាតិ ឯកឧត្តម អាំង សុវណ្ណរ័ត្ន លើកឡើងថា ប្រជាពលរដ្ឋ ជាពិសេសយុវជនវ័យក្មេង ត្រូវប្រកាន់យកទស្សនៈនៃការសិក្សាពេញមួយជីវិត ដើម្បីធ្វើយ៉ាងណាឱ្យមានជំនាញគោលមួយយ៉ាងតិចសម្រាប់ការរស់នៅប្រចាំថ្ងៃ និងត្រូវសិក្សាពីជំនាញឌីជីថលបន្ថែម ជាពិសេសជំនាញទាក់ទងទៅនឹងបញ្ញាសិប្បនិម្មិត AI ដើម្បីបានជាមូលដ្ឋានដ៏សំខាន់ក្នុងការបំពេញការងារ ការធ្វើអាជីវកម្ម ក៏ដូចជាបង្កើនសមត្ថភាពរបស់ខ្លួន និងអាចសម្របខ្លួនទៅនឹងតម្រូវការទីផ្សារការងារនាពេលបច្ចុប្បន្ន។
នាយកប្រតិបត្តិ នៃមជ្ឈមណ្ឌលកម្ពុជា ៤.០ បន្ថែមថា គ្រប់បច្ចេកវិទ្យា តែងនាំមកនូវការវិវត្តថ្មីៗ និងបញ្ហាប្រឈម ដូច្នេះត្រូវប្រើប្រាស់ដោយប្រុងប្រយ័ត្ន និងគិតគូរឱ្យបានហ្មត់ចត់ ដើម្បីទាញយកគុណសម្បត្តិចេញពីបច្ចេកវិទ្យា AI ហើយប្រុងប្រយ័ត្នទៅលើបញ្ហាសុវត្ថិភាព ក៏ដូចជាបញ្ហាដែលនាំមកនូវគុណវិបត្តិផ្សេងៗចេញពីការប្រើប្រាស់ខុសក្រមសីលធម៌ ឬការប្រើប្រាស់ដែលមិនគិតដល់ប្រយោជន៍រួម។
“យើងជាអ្នកបង្កើតបច្ចេកវិទ្យា គ្រប់គ្រងបច្ចេកវិទ្យា កុំឱ្យបច្ចេកវិទ្យាជាអ្នកគ្រប់គ្រងយើង”
លោក ហ៊ឹន សុភាព អ្នកប្រឹក្សាយុទ្ធសាស្រ្ត និង AI និងជានាយកគ្រប់គ្រង DG Academy មានប្រសាសន៍ថា បច្ចុប្បន្ន AI បានដើរតួនាទីដ៏សំខាន់ក្នុងការជំរុញប្រសិទ្ធភាពការងារ ក្នុងនោះ AI ក៏អាចដើរតួជាជំនួយការដ៏ឆ្លាតវៃសម្រាប់សិស្ស និស្សិតក្នុងការសិក្សា។ ប៉ុន្តែកុំទុកចិត្ត AI ខ្លាំងពេក ពោលគឺសិស្សនិស្សិតត្រូវពង្រឹងសមត្ថភាព និងចំណេះដឹងរបស់ខ្លួនជាប្រចាំ។
លោក ផូ សោភ័ណ្ឌ អ្នកផលិតមាតិកា ផ្នែកអប់រំ និងបច្ចេកវិទ្យា បានលើកឡើងថា យុវជនត្រូវយល់ដឹងពី AI គឺដើម្បីទប់ស្កាត់ការបោកបញ្ឆោតចាប់ជំរិត និងការប្រព្រឹត្តិអំពើខុសច្បាប់នានាតាមប្រព័ន្ធអនឡាញ។ លើសពីនេះ ដើម្បីរក្សាសុវត្ថិភាព និងសេចក្តីថ្លៃថ្នូរក្នុងសង្គម។ លោក សោភ័ណ្ឌ បន្តថា ត្បិតតែ AI ធ្វើការងារជំនួសបានច្រើនមែន ប៉ុន្តែនៅការងារមួយចំនួនដែល AI មិនអាចជំនួសមនុស្សបាន រួមមាន ការគិតបែបស៊ីជម្រៅ, ច្នៃប្រឌិតខ្ពស់, ប្រសិទ្ធភាពទំនាក់ទំនង, ការវិនិច្ឆ័យសីលធម៌, ភាពជាអ្នកដឹកនាំ និងការងារជាក្រុម។
សូមជំរាបជូនដែរថា សិក្ខាសាលាស្ដីពី «យុវជននៅក្នុងយុគសម័យ AI» ត្រូវបានរៀបចំដោយមជ្ឈមណ្ឌលកម្ពុជា ៤.០ ក្នុងគោលបំណងដើម្បីបង្កើនការយល់ដឹងមូលដ្ឋានគ្រឹះនៃការប្រើប្រាស់ តួនាទី និងឥទ្ធិពលរបស់បច្ចេកវិទ្យា AI មកលើជីវិតប្រចាំថ្ងៃ ទាំងការសិក្សា និងការធ្វើអាជីវកម្ម ការប្រកបការងារ។ ជាពិសេស ជំរុញឱ្យយុវជនមានចំណេះដឹង និងជំនាញឌីជីថល ដើម្បីអាចប្រើប្រាស់ និងដោះស្រាយបញ្ហា ដែលកើតចេញពីការវិវត្តរបស់ AI៕
